GUT GEBRÜLLT LÖWE: Colombia, the best!

Wie Italie

De Kaufi, en Kolleg vom Marco hät gseit, dass Kolumbie wie Italie usgseht. Das isch ab jetzt au üsen meist gseite Satz: Do gsehts jo us wie in Italie! Und es isch würkli eso. Sit mir vode Cholemiene richtig Süde gfahre sind, hät sich dLandschaft extrem gänderet. Alläs isch chräftig grüän und dLandwirtschaft boomt do. Äs isch unglaublich schön.... halt äbä wie in Italie. Je wiiter mir in Süde und somit au id Höchi cho sind, desto chälter ischs worde. ÄNDLI ischs mol wieder chli agnähmer mit de Temperature. ÄNDLI chamä au mol wieder än Pulli und langi Hose alega... Die erst Nacht ide Chälti hend mir üs definitiv äs bizli andersch vorgstellt.... klar hend mir üs uf di chüälere Temperature gfreut, aber so 20 Grad wär grad agnehm gsi..... Aber da uf dSchlucht vo Chicamocha uf 2500 liiit, hend mir natürli abartig as Arsch gfrohre! Tina hät scho fasch wele ihri Händschä füräsuächä. Aber dNacht isch den gar nid so schlimm gsi wie agno. Mir sind denn wiiters uf San Gil, dört häts üs aber gar nid gfalle und drum sind mir grad wiiters uf Barichara. Es ganz hübsches Kolonialstädli. Klein aber fein säg ich do! Wie meistens, hend mir üses Zelt grad neb de Chile ufgstellt, chli abseits vom Städlilärm.

Villa de Leyva

Next Stopp isch Villa de Leyva gsi. Au ä sehr schöns Kolonialstädli, und do hend mir au en super coole Stellplatz gha imne Backpacker. Grad am erste Tag hend mir dChrige und de Kölbi kenne glernt. Ihren Blog hend mir bereits kennet und jetzt hemmers sogar aatroffe. Shät au no ä Französischs Päärli uf äm Camping gha, nu leider hend die nu französisch gred. Und da Tina jetzt spanisch lernt, falled ihre die franz-Wörtli eifach nümm ii.... jammer schaaad. Noch 3 Täg erhole in Villa de Leyva sind mir wiiters gange zude Salz Kathedrale. Uf em Wäg dört ane hemmer no chli ä Problem mit de Polizei gha. Da mir kei Versicherig SOAT glöst hend. Mir hend üs aber ziemli dumm gstellt, und so, dass mir den doch nünt zahlt hend. Uf em negste SOAT Büre hend mir aber wele ä so ä Autoversicherig machä. Nu leider hend die üs mitteilt, dass Usländer gar kei Versicherig bruched für die erste 3 Monät... Mir hend zwor äs Gfühl das es nid so ganz stimmt, aber was wemmer machä? Bim negste Bulle dömmer halt wieder genau gliich dumm... Eigentli seit de Name Salt Cathedral jo scho dass es e Kathedrale und somit christlich isch. Mir hend üs aber ä Salzmine vorgstellt, wome informiert wird über dMinearbet.... Naja äs isch ä stylischi Chile inere Salzmine gsi mit ganz viel verschiedene Chrüz. Tina häts rächt beiidruckend gfunde und de Marco.... naja nid so ganz. Aber schön ischs scho gsi.

Reservat Rio Claro

Mir sind wiiters über Hügel und Täler richtig Rio Claro gfahre. Äs isch unglaublich schön gsi... wie in Italie.

Au de Park vom Rio Claro isch würkli sensationell schön. Mir hend üs en Ring gmieted und sind e Stund ufwärts gloffe und hend üs abätriibe loh. All paar Meter hets wieder ä neus ooooooo, wooooow, megaaaa geh. De Campingplatz isch jedoch gar nid so zum empfele. Vo 10 WCs isch grad mol eis nid verschisse gsi. Überall isch Abfall umäglägä und irgendwie ischs nid so sympa gsi.

Noch 2 erholsame Täg hemmer üs vo üsem vo üsem Camping Hund verabschieded (de Marco hät än zwor umsverrecke wele mitneh, aber Tina isch do hart blibe, öppert muä jo bi verstand bliiibe gell Hans) und sind noch Guatapé. Äs Dörfli sälber isch mol am schöne Stausee glägä, nu leider häts fasch ka Wasser meh idem See. Mir hend aber trotzdem ä super schöns Plätzli gfunde chli usserhalb. sPanorama isch sensationell gsi. Mir hetted no meh Täg chönä bliebe. Einsami Stilli, bis uf paar plääärendi Hünd und swirre vode Rössli.

Dur Medellin sind mir nur duregfahre. Will mir am Tag vorher mol wieder ä Fleisch sälber grillt hend, hemmer am nögste Tag furchbar de schiesser gha und hend so schnell wiä möglich e Schlofplätzli wele finde. Imne chline Steibruch hend mir den au es stills, abglägäs Örtli gfunde womor üs hend chönä usruäh.

Zona Cafetera

Mir hend üs scho schampaar uf en guätä Kafi gfreut. Und wo gits guätä Kafi wenn nid im Abaugebiet sälber? Do hemmer üs schüüüli giiirt. Zmitzt i de Kafizone hend mir noch em beste Kafi gfroged. dAntwort womor übercho hend isch gsi... Mir baued zwor de best Kafi a do, aber sälber hend mir nur wässrigi Pfützänä. De Herr häts sich entschuldiget so direkt zsii, aber es isch dWohred. Mir hends den aber trotzdem no eine probiert. Und wie scho gwüsst hets me noch Tee gschmöckt wiä noch Kafi.

Vo de Landschaft her chönd mir aber nu positivs brichte. Die Natur do obe isch eifach nu wunderschön. Vor Ort ischs viel schöner wiä uf der Bilder, eifach mega schön!

Es so beliäbtä Dörfli Salento hend mir nu churz gstreift und sind wiiters zude Wachspalme, womor am nögste Tag e super schöni Wanderig gmacht hend. Noch 3 Stund wandere, hemmer ä atemberaubendi Ussicht gnosse über sganze Tal! Und es erste mol hend mir müäsä zuägeh, dass mir üs do chentäd niederloh.... e schöni Finca baue und äs Läbä gnüsse. Aber zum Glück hend mir das Gäld jo nid....

Panne und anderi Problem

Uf em Wäg noch Girardot hend mir serst mol so würklich Problem gha mit üsem Boudi. Während de Mac Guyver probiert het alles wieder in Lot zbringe mit Hilf vomne andere Mech, het sHeidi sich als Verchehrskadette bemüäht. Natürli het de Boudi genau inore Kurve müäsä trötzele (chent meine er seg wiiblich) sHeidi het das aber super gmacht. Es Lächlä do, es winke dött und die LKW fahrer sind hin und weg gsi vode Verchehrskadette Heidi.

Militär, üsen Fründ und Helfer

Mir hend üs vo aafang aa willkomme Gfühl!

de Marco und sini neue Fründe

Wills in Girardot anschiinend sehr gföhrlich isch, hend mir Hilf bim Militär gholt. Mir hend liäb gfroged öb Sie uf üs chönd ufpasse die Nacht. Die stönd jo sowiso Wach di ganz Nacht. Aber nix da! Die hend üs grad iiglade i Ihres Revier. Shät den grad en Willkommenskafi geh vode Familie (wos Militär wohnt) und denn ischs los gange mit em Spanisch schwafle. Sisch ab und zuä meh äs Wörter-Rötsel gsi, als es flüssend rede, aber mir hends mit Bravur gmeisteret. Es Grosi und schline Meitli hend sich den grad dTina gschnapped und hend mit ihre Spiele gspielt. De Marco het sich i dere Ziit mit sine Militärbuäbä underhalte.

Am nögste Morge het es Meitli vor em Auto gwartet bis mir vorwached sind, und scho ischs wiiters gange mit spiele. Als Dankeschön hets den au no en leckere Zmorge geh. Mir hend gar nid gwüsst wiä mir das verdiänt hend. Eigentli hetted mir jo zdanke gha. E Familie wo sälber fasch ka Gäld hät fürs Ässä und Kleider lad üs no iii! Mir hend natürli no de ganze Familie und em Militär Süässigkeite verschänkt. Aber mir hend au gseit, dass Sie nochanä guät müänd Zäh butzä, susch gits Löcher.

Fallschirm Club

De Marco isch am Samstig go springe gange und Tina hät susch chli nünt tuä. Noch em letschte Sprung ischs den los gange mit em Firobedbier. Mir sind den au grad no iiglade worde zum im Huus vom Fallschirm Club zwohne... Huus isch do jo wohl undertriebe... Das Huus het 1 Pool, 2 Yacuzzis, en Gärtner und e Putzfrau gha. Es isch jo so abgfahre gsi. Ab Obed hets den au no ä super Pool Party geh. Der Morgen darauf isch ziemli verschwumme gsi. De Marco het nüm möge go springe (worum au immer) und mir sind iiglade worde zum nomol e Nacht im Huus zverwiiile (oder au länger)... Natürli älei, will di andere jo wieder hend müäsä go schaffe am Mäntig. Häjo, do hemmer diä Glägäheit gnutzt und hends Läbä gnosse im Ligästüähl und im Pool. Bis uf diä abartig Moskito- Ploog ischs de absoluti Hammer gsi.

Tina bim Flüge :)

De Süde vo Kolumbie

Nochdem mir bereits 4 Wuche i dem schöne Land verbrocht hend, simmer ziemli zügig richtig Ecuador gfahre. Mir hend no än Stop bide Tatacoa Wüästi iigleit und no eine be San Andres, zum Skulpture go aluägä. Nochane ischs den no churz uf Popayan und scho wiiters zu Las Lajas und den über dGränzä.

finde Walter!

Aber de Absolut Höhepunkt vo dere letschte Wuche in Kolumbie, isch gsi, dFahrt vo Popayan über dBerge ad Grenze. E sagehafti Kulisse! So öppis hend mir no nie gseh. Do bliebt eim grad dSpucke weg. So öppis muä mäh eifach mol gseh ha.

Zämäfassig vo Kolumbie

Mir chönd numä positivs über Kolumbie verzelle! Bis uf dHafegebüüür, isch do würkli alläs perfekt gsi. sÄssä isch sehr fein do, dMensche sind richtig herzhaft und würded alläs für eim machä. dPolizei isch sehr hilfsbereit, sMilitär isch au immer für ein Schwatz bereit und dLandschaft isch eifach genial. Es hät do vo Wüästi bis Näbälwald alläs. Me chan bi 45 Grad schwitze oder be Minus 5 Grad frühre.