Was gits langwiiligers als dKüste vo Peru????

Ganz klar, dOschtküste vo Argentinie

No 2500km bis uf Buenos Aires und mir hend jetzt scho ka Lust meh. Üsen Gspröchstoff goht langsam zänd, di ganz Musig lamped üs langsam zude Ohre us und äs isch eifach langwiilig. Ab und zuä chrüüzed mir mol wieder Reisendi, aber niämert macht än erfreute Iidruck. Die einzige wo super fründlich und guät druf sind, das sind dArgentiniär. Diä händ nämmli momentan Ferie und me märkts. Riese Wohnmobil und Wohnwägä reised vom Norde in Süde.

Mir froged üs wa diä denn dört unne wend? Dört ischs jo chalt, nass und windig??!? Aber genau das suächäd diä Lüüt wo vode heisse Region Buenos Aires abä chömäd.

Noch 600 Kilometer hämmer ändli mol wieder öppis gfund interessant isch. De versteinereti Wald. S Dummerchen Tina hät sich vorgstellt wiä das än Wald isch wo versteinered isch... wiäs dä Namä jo scho seit... nun ja..... de Marco hät das besser gwüsst (wiä so vieles)

De Wald bestoht nur no us e paar vereinzelte Baumstämm wo am Bode leged und wiä gseit us Stei sind. Vor vielne vielne Johre het dVulkanäschä de Wald iigäschered und mit Rege Wind und Mineralie ischs denn zu Stei worde.

800 km spöter hend mir den ändli de wichtigst Punkt uf de Ostküste erreicht. De Lüchtturm Punta Ninfas. Weme Glück hät gseht mä dört Orkas. 

Und da mir ab und zuä Kinder des Glücks sind, hemmer Orkas und ganz viel Seeleuä und Seeelefante gseh. Mir sind ganz us em Hüsli gsi wo mir diä abartig schönä Tier gseh hend. Hend gar nid würkli demit grechnet dass mir diä riiise Viicher zgsicht bechömäd. De Marco hät gmeint, „entweder sind das Seeleue im Wasser oder denn Haie“ „Weder noch mein Lieber, dass sind Orkas“! häts Tindli ganz eufoorisch gseit.

Am nögste Tag hend mir dWasserfläschä iipackt und sind uf Orka-Suächi gangä. Und siehe da, do sind au scho wieder dähär zschwümmä cho mit de 2 Baby Orkas. 3 Meter vom Strand entfernt sinds ganz ruhig dKüste ufä und wieder abägschwumme. Isch irrsinnig gsi.

Und wiiter gohts.... Mir sind noch 2 Täg relaxä denn wieder in Boudi ghocked und wiiter düüsed de Wärmi entgege. Mir sind sogar mol no is Meer go bade gange, und sisch würkli agnehm warm gsi. Hetted mir nid denkt.

Mir hend uf em weg in Norde jedi Attraktion uf em Weg wele aluägä dass es bizli Abwächslig drii bringt. Drum simmer den au zude Sierra de la Ventana gfahre. Eigentli hemmer gar ka Lust gha uf Wandere, aber häjo... Bewegig tuät jo guät... Wie de Zuefalls so hät wele, isch genau i dem Johr de ganz Park gschlosse wils dWäg sarniered. Puh hemmer nomol Glück gha. Hihi. Hend üs den en Camping bimne See die nöchi gsuäch und ändli mol wieder Kleider gwäschä. Mir hönd üs wiä chlini Chind gfreut zum go bade go, nu womer diä Brüäh gse hend, ischs üs gar nüm so noch plantsche zmuät gsi.

Uf em Weg noch ufä, hends mir denn nomol probiert mit plantsche im Meer. Es tönt jetzt vilicht äs bizli als wäräd mir Susis, aber damol sind mir nid is Wasser, wils üs zfest gwindet het und dStänd überloffe gsi sind. Aber Meer hend mir jo den au no gnuäg in Brasilie.

In Balarce sind mir is Motore-Museum vom Juan Manuel Fangio. Nei, diä Idee isch bestimmt nid vode Tina cho... aber sogar sie häts super guät gfunde und das söll was heisse!

Buenos Aires

Noch fasch 2 Wuchä dur di trostlos Wüästi fahre, hend mir überglücklich Buenos Aires erreicht ohni üs nu ei mol zverfahre.

(Scho klar mit de Tina als Navi)

die nägste 4 Nächt werded mir endli mol wieder Läbä wiä könige hemmer denk, und genau das hend mir au gmacht.

Es Bett isch guät 2 mol so gross gsi wiä äs Dachzelt, mir hend ä WC gha wome sWC Papier dörf id Schüssle gheie und sgeilste ä Duschi.

Mir hend i dene 5 Täg so viel duschäd wiä susch i 2 Monät.

Jede Morge am 7i ischs los gange mit em Fitness (guät vilicht ischs amig ((also eigentli immer)) chli spöter worde), dusche und denn ändli go zmörgele. Wow, hend mirs gnosse weme de Toast eifach in Toaster chan iä lege und scho ischs toasted. Mir müänd das jo no sälber grille uf em Herd.

sHotel isch super stylisch gsi und no wichtiger: de Subway und Starbucks sind grad um dä Eggä gsi. Und sit Wuchänä hend mir üs scho wiä chlini Chind uf diä 2 Lädä gfreut.

Also zude Stadt:

Als ersts hend mir üsi Dollar/CHF/EURO uf em Schwarzmakt müäsä go tuusche. De Bluedollar isch momentan be fasch 11.  Uf em ganz legale Markt ischer be ca. 6.70. De Franke wett üs niämert wächsle. Niämert zeigt würkli intresse... Per Zuäfall chömmern den aber doch au no wächslä... Womor wieder zu Geld cho sind, hend mir so ä Hop on Hop off Tour gmacht mit em Turibus. Isch sehr beidruckend gsi. Üs hät das sehr guät gfalle. Schnäll isch üs klar gsi, wän mir müästäd in Argentinie wohne, denn wärs sicher do. Guät äs hät au äs paar Egge wos nid so sicher isch... mir hend das erfahre, womor mol wieder sGfühl gha hend mir müänd no än Spatziergang go machä, will mir so lang ghocked sind. DTuriPolizei hät üs jedoch ufghalte, wo mir is würkli schlimme Revier hend wele laufe. (Guät de Marco händs eigentli durälaufe loh, nu sTindli hends zrugg ghalte)

Sie hend denn erklärt, wenn Turiste i diä Zone iä gönd, werdeds abgstoche und usgno. Aha aha, so isch das. Polizei üsen Fründ und Hälfer hät üs denn verzellt wiä mir das Gebiet chönd umlaufe.

Miteme chline Umwäg sind mir den lebendig am Ziel acho.

In Stadtteil La Boca hend mir üs den mit Lederware iideckt. Natürli hend mir zwänig Gäld debii und und hend am nägste Tag grad nomol müäsä dört ane go... Tina und ihri Täschä...

Am letschte Tag hend mir üs Ziit gno zum go shoppe. Aber wiä mir usägfunde hend, sind mir überhaupt nid so shoppingbegeisteret. Am halbi 1 sind mir scho die Bierpause gsi ide Hoffnig dases nochane richer goht zum pöschtele... Mir sind leider falsch glägä, noch dem Liter Bier hend mir üs gar nüm wele bewege.

Am Friitig Morge sind mir ganz entspannt wieder us Buenos Aires usegfahre (ohni verfahre verstoht sich) und sind über dGrenze noch Uruguay gfahre

Aamerkig: Au wen üs Argentinie (vor allem Patagonie) nid so zuägseit hät, so heisst das no lang nid dases nid schön isch. Da mir scho sit bald 16 Monät underwägs sind, hömmer müäsä feststelle, dass üs eifach nümm so viel beidruckt wiä am Aafang. Swir alleg Ziit zum bald retour i üsi Haamät zgo und chli uuspanne und verarbeitä.

Patagonie – die Traumdestination?

Nochdem mir de Carretera Austral „und tschüss“ gseit hend, simmer wieder uf Argentine cho. Die erst Nacht, wo mir sGfühlt ka hend, üses Zelt flügt nögstens usenand. Aha, das isch demfall jetzt de berüähmt Patagonischi Wind. Stundeland sind mir dur die troche und langwiilig Gegend gfahre, bis mir dCuevas de los Manos erreicht hend. Mir hend dört denn mol schücht gfroged öb de Wind do normal seg. Als Antwort hemmer übercho: „Wele Wind? Hüt isch doch windstill!“ WINDSTILL??? Mir hönd gmeint üsen Guide macht en Scherz, aber nei es isch de total ÄRNST gsi. 2 Täg lang sind mir wiiters dur diä Landschaft gfahre, ohni gross Abwächslig. Ab und zuä sind Guanacos oder Nandus adä Stross gstande oder au mol än Fuchs. Susch häts rein gar nünt geh. Autos hend mir au so guät wiä kani gseh. 

Wo mir richtig El Chalten gfahre sind, hemmer ändli mol wieder öppis schöns erblickt – de Fitz Roy und de Cerro Torre. dFahrt hät sich glohnt. Eigentli hend mir jo nur 2 Täg iiplaned gha für diä Destination, aber schlussendli sinds 5 drus worde. Perfekts Wätter hät uf üs gwartet. Natürli häts au do ziemli gwinded, aber sisch gliich super gsi. dBrasilianer Ana und Rodrigo (mit dene wo mir vo Panama verschifft hend) hend üs verzellt dass me do no chan go IisChlättere goh und noch 2-3 Bierli mit dene 2, hends üs voll aagsteckt gha vo ihrem Abentüür.

Tina hät ziemli angst gha vor em chlättere. Sie hät zwor nümm so sehr Höheangst wiä au scho, aber so ganz wohl ischs ihre jo doch nid gsi. Ä zrugg häts jetzt sowiso nüm geh, also hät mä halt diä Stigiise ad Schuäh anäbunde, dIisbickel id Händ gno und los ischs gange.

Völlig färtig hämmer am nögste Tag grad no ä 7 stündigi Wanderig gmacht. Am Obed hemmer den au entsprächend guät chönä schlofä.

De Moreno Gletschter isch eine vode wenige Gletscher wo no wachst. Mir hend gar nid so rächt gwüsst was üs do erwartet, da mir vom Chlättere jo scho än rächt grosse Gletscher gseh hend, hemmer denkt dass üs de Moreno nüm so umhaut.... Aber trotz allem, de Gletscher do isch würkli „WOW“. Äs intressantischte isch wohl gsi, zhöre wiä einzelni Iisbrocke is Wassergheiäd mit eme riese Lärm.

Da für di nögste paar Täg schlächts Wätter agseit gsi isch für die Region und es paar Reisefründe vo üs über Wiähnacht / Neujohr hend wele in Ushuaia verbringe, hend mir üs entschiede, zum zersch uf Feuerland zdüüse und denn wieder ufä zum Torres del Paine.

Shät üs den aber doch nid glanged dWiähnachte in Ushuaia zverbringe. Zwüschedinne hömmer ä super Plätzli gfunde amne Windstille Ort im Wald womor hend chönä Füüre. Die erste 2 Täg hend mir Guetzli und Zopf bached und am 3. Tag hemmer Grossputz gmacht. Shät eifach super passt. Tina hät gfunde, sisch chli wiä „Muätterlis und  Vätterlis“ spiele gsi. Nu is damol halt so chli äs richtige Läbä gsi. Marco hät leider niä „Müätterlis und Vätterlis gspielt. Er hät früähner nu „Dökterlet“ hihihi

Königspinguinä

Idä Nöchi vo üsem Revier hend sich vor paar Joohr ä Hordä Königspinguin verirrt und hend sich uf em Rasä niedergloh.

Mir hönd üs das Spektakel nid wele entgoh loh. Natürli ischs än Mäntig gsi womor dört acho sind und Montags ist geschlossen. Doch damol hät de Mannsgoggel verbarme ka mit üs und hät ä Usnahm gmacht. Isch würkli ganz super gsi. Nu en chline Fluss hät üs trennt vode Pingus und mir sind lang lang ide Wise ghocked und hend diä Tierli beobachtet.

Summer in Ushuaia

„Summer – Regen – Matsch“ so hend mir Ushuaia kenne glärnt. Zersch häts no chli gschneit und denn isch Rege drus worde.

dStadt isch eigentli ganz härzig, aber mir hend so schnell wiä möglich wieder wele weg. Irgendwo ane wos nid soo chalt und wos chli gmüätlicher isch. Die meiste Reisende hend üs bemittleidet, will mir ka Kabine hend zum inäsitze. Mir hend halt müäsä dusse choche und ässä. Aber mir sind halt eifach harti Siächä!

Uf jedefall sind mir den noch guätä 3 Täg scho wieder in Norde gfahre und denn uf Punta Arenas. Die schönsti Stadt in Patagonie! Wunderschöni Hüser und dKüste isch au sehr schön gmacht. Mir sind no de Friedhof go Bsuächä wo all diä Schofsbarone begrabe sind. Prunkvolli Grabstätte! Diä Stadt hät üs sehr guät gfalle, aber meh als en Tag hend au nid dört verbrocht.

Grab vode Riiche

Ab noch Puerto Natales go Silvester fiire.

Mit ChrigiKölbi hend mir abgmacht zum is neue Johr iä zfiiire, aber wo mir uf em Camping acho sind, häts no ganz viel anderi Schwiizer und Dütschi Reisendi dört gha womor scho kennt händ.

Tim und Klara

Noch dem dä Kölbi ä Füür gmacht hend, hemmer alli zämä grilliert und ä mega lässä Obed zämä vebrocht. De Tim und Klara hend de Marco und mich nümm us de Auge loh und hend ununderbroche wele spiele mit üs. Nochdem de Marco mol irgendöppis vo „ich loh mi di hei grad underbinde“ gschwaflet het, hend dEltere vom Tim und de Klara dchind schleunigst wieder zu sich gnoh hihihi

Torres del Paine - Äs letschte grosse Wanderabentüür

Scho sit Wuchä hend mir üs immer wieder informiert über diä 4-10 Tägig Tour am Torres del Paine. Machäd mir dUmrundig oder doch numä die 4-5 tägig W-Wanderig? Sisch alläs anders cho.... wiä immer.

Noch dem mir mit eme munzige Kater ufgwached sind am 1. Januar, hend mir üs langsam uf de Weg in Park iä gmacht. sWätter isch nid ganz so fründlich gsi und shät ab und zuä chli grägnät. De Aaschiss hät mä üs glaub ziemli guät agseh. Segs wiäs well, am nögste Morge isch das Wätter immer nonig besser gsi. DBerge sind ganz vernäbläd gsi und dMotivation hät üs extrem schnell verloh. Nochdem mir üs den aber nomol zämägno hend, simmer doch mol loos gwanderet zum de Torres zbewundere.

DLandschaft hät üs nid würkli aagsproche, aber zum Glück isch de Wäg nid so aastrengend gsi. Scho noch de erste Stund isch vom Näbäl fasch nünt meh zgseh gsi und mir hend de ä super guäti Uussicht gha uf de Torres. Richtig guät gluunt simmer wieder zum Auto gloffe und hend üs vorbereitet für die negste 2 Täg mit äm Zält.

Beidi Rucksäck sind voll bepackt gsi und de 2. Abschnitt vo de Wanderig hät chönä aafange. Irgendwiä het äs Wätter den aber doch nid so mitgspielt und nochdem mir wieder zrugg is Resti cho sind vode Wanderig zum Grey Gletschter, häts agfange zum richtig abälääärä. In Nullkomanix isch di ganz Hüttä voll gsi vo Wanderer.

Eigentli hend mir jo no wiiters wele laufe uf de Zeltplatz und am nögste Tag nomol ä Tageswanderig machä bevors wieder retour goht.... aber....... mir hend so aaaaaaabsolut ka Bock meh gha uf wandere, schlächts Wätter, abgstorbeni Wälder und Muskelkater, dass mir das alläs abgseit hend und zrugg zum Auto gange sind.

Für üs isch de Torres del Paine zwor än absolut genialä Berg, aber dNatur rundumä hät üs nid würkli gfalle.

Argentinie – mol wieder ab id Wärmi

Noch dene letschte paar Täg im chalte, regnerische und windige Summer vo Patagonie händ mir üsi 7ä Sachä packt und sind so was vo schnäll (max. 80 km/h) richtig Wärmi gfahre

De Marco hät Coiffeur dörfä spiele

Buenos Aires mir chömäd