Costa Rica

Üsi Erwartige sind nid sehr hoch gsi vo Costa Rica, will mir scho sehr viel Negativs ghört hend. Vorallem aber das es sehr sehr tüür söll sii. Noch guätä 3 Wuchä do i dem schöne Land chönd mir aber sägä dases do würkli sehr schön isch. Au wenns halt scho ziemli touristisch isch, hend mir immer wieder sehr schöni Ort gfunde wome ganz ungstört het chönä sii. Will mir halt fasch immer frei camped hend und gross Aktivitäte gmacht hend ussert wandere, chönd mir au nünt zudene Priise sägä. dNationalpärk sind mit 6-10.- pro Person au nid würkli tüürer gsi wiä i andere Länder. Wamir sehr gmerkt hend ischs Benzin und zum Teil es Ässä ide Lädä.

dGrenze vo Nicaragua nach Costa Rica hend mir zeme mit de Beate und em Marc gmacht. Au wenns guäti dreiähalb Stund duured het bis mir de ganz Papierkram zämä gha hend, so ischs dennoch e agnehms warte gsi. De Marco het mit em Marc chönä über Autos und so rede und dFrauä über die wichtige Themä im Läbä.

Vo ettliche Reisende hend mir scho ghört das me in Costa Rica umbädingt bide Agi und em Guido uf Bsuäch go muäs grad noch de Grenze. Das hend mir natürlich au gmacht. Das Päärli isch vor 15 Johr vode Schwiiz do anä usgwanderet und hend sich 68 Hektare Land kauft. Näbäd äm Huus hends en chline Fluss wos Krakodil drin het und ide Bäum hets Fuultier, Papageie, Brüllaffe und no vili anderi intressanti Tier. Ebefalls hend es paar verschideni Weg dur ihres Land, dasme alli Plantage, Rössli und Chüäli chan go aluägä.

Es hät üs so guät gfalle, das mir grad 2 Nächt dört blibe sind uf em Camping.

Platte!!!

Chum simmer abgfahre im Paradies, do händ mir au scho üsen erste Platte gha. De Marco und de Marc hend den das grad zeme gwechslet und innert weniger Minute hend mir au scho wider chönä wiiters fahre richtig Arenal.

Punktesystem

Will mir finded dasmor fuuli Säck sind, hend mir scho in Nicaragua es Punktesystem iigführt. Pro Stund Wandere gits ein Punkt. Wenns ziemli aasträngend isch gits 2 Pünkt. Natürli gebed au jeglichi anderi Sportlichi Aktivitäte Pünkt wie Kajake etc.

Mir hend am Afang gseit dasmor 13 Pünkt müänd ha, aber mir sind den scho die 3te Wuche uf 10 Punkt abä gheit. Aber mir finded das langed also au. Übertriibe wemmers jo nöd gäll.

Vulcan Arenal

Arenal

Bis vor 4 Johr het de Arenal no Lava gspuckt, aber leider jetzt nümmä. Trotzdem hend mir üs dMüäh gmacht und sind uf de Vulkan Chato go wandere zum go Punke sammle. Es isch au nid mol so aastrengend gsi wiä beschriebe und mir sind au scho noch zweiähalb Stund wieder bide Autos gsi. Mit 4 hemmer eigentli grechned und wils zum Teil steil duruf gange isch hemmer mit 6 Pünkt grechnet, aber schlussendli hemmer numä 4 übercho.Snif

Noch dere (doch aasträngende) Wanderig hemmer üs Thermalquelle verdiänt. Knausrig wiä mir sind, hemmer diä Quelle usgwählt wo gratis isch. Und ei mol meh, het sichs glohnt. Es hät zwor viel Lüüt dört gha aber alläs Iheimischi und das hät üs nid wiiters gstört. Mir hends gnosse zum üs im heisse Wasser zwäschä und üs zentspanne.

Will üs es nünt machä grad so gfalle het, hemmer am Obed ka Lust gha zum choche und sind am Obed is super schöne Schwiizer Restaurant LOS HEROES. Shät Rösti und Cordon bleu geh bem Marco und bede Tina Züri Gschnätzläts mit Rösti. Hm misch das fein gsi. Das Restaurant isch gführt vomne Schwiizer und sinere Costa Ricanische Frau. dChellner sind Iheimischi, aber i Schwiizer Trachte. Zum Hotel ghört no e Drehrestaurant mitere Schmalspurbahn, ganz viel Chuäh, e Kapelleli und 2 wiiteri Chalets. Alles im Schwiizerstyle baue. Natürli hets au alles a Schwiizer Landwirtschaftszubehör.

Das Restaurant passt wie agosse i diä Region. Es siäht a dem Lago de Arenal us wiä i de Schiiz. Vilicht gfallt üs au wäg däm so guät do.

Monte Verde

de Marco mit sine Chinde

Noch dem mir uf em Parkplatz vom schwiizer Resti pfused hend, simmer wiiters gfahre richtig Monte Verde. Bereits am Morge hets scho i strööme gseit, aber es isch no wiiters gange. Die Ganz Reis dur das Gebiet hets eifach nüm welä ufhöre regne. Das isch au de Grund gsi, worum mir eifach numä durdurä gfahre sind und wider id Wärmi. Mir hends fasch nid chönä glaubä, aber sobald mir bizli vo dem Berg abächo sind, scho isch wieder alläs verdööred gsi. Ganz en krasse Kontrast. Wo mir am e Übernachtigsplätzli am suächä gsi sind, hend üs es paar Iheimischi entdeckt und üs zumne härzige Plätzli gführt amne Bach wos no ganz viel wiiteri Iheimischi gha hend wo grad Ferie gmacht hend. Mir sind vo aafang a ufgno worde i dem Kreis und nochdem mir dSlakline zwüsched 2 Bäum gspanne hend, hemmer au ettlichi Chind um üs umä gha. Am nögste Morge am halbi 7i sind dChind schowieder be üs gstande und hend wele go balanciere uf em Seil. sEint oder ander Chind hät sich es paar blaui Fläckä gha nochanä, dStürz hend uf jedefall sehr gföhrlich usgseh.

Mir wäräd gärn no chli länger blibe, aber es hät so en abartig feste Wind gha wo üs nid so passt het.

Nicoya Halbinsle

Üs hets den doch wieder as Meer zoge und so simmer vo Playa de Coco bis abä uf Montezuma gfahre.

Irgendwo im Nirgendwo hend mir den mol en Stopp gmacht und üsi Zelt ufgschlage. Ganzi 3 Täg simmer a dem Strand blibe, es hät üs so guät gfalle. Am 2 April hät däns Tindli no Ihren Geburri gfiired und sie hät än super schönä Tag gha. dBeate und de Marco hend sich vom Morge bis am Obed um Sie kümmered und es hätorä a nünt gfählt. Am morge am 2 het de Marco scho zerst mol es Geburri Liädli trällerlet ( PS: aller liäbstä Davide, ich weiss jetzt wiä schlimm das isch) zum Zmorge hemmer den selbergmachti Schoggibrötli bachäd, zum Zmittag hemmer e Läbchuächähüsli baue und den au grad gässä und zum zNacht het de Marc e super guäts Risotto köcherlet.

Zwischeddrin hend mir no Hering gsuächt will üses Vorzelt isch mol wieder vom Winde verweht worde. Somit hend mir Geburri, Ostere, und Wiähnachte gfiired.

Au die nögste paar Täg hend mir super lässi Plätz am Strand gfunde mit super Uussichte das mir Schildchrote gsend. Nu leider hämmer kani gfunde. Snif

Für dJungs isch natürli es beste Erlebnis gsi wos hend chönä dur dFlüss fahre mit de Autos. Meh hät richtig dFunkle ide Auge gseh.

In Montezume hemmer üs den vom Marc und de Beate verabschieded und sind wiiters richtig Jaco wo de Marco go Fallschirmspringe gange isch. 3 Jungs im alter vo 21 23 und 25 hend vor anderthalb Monät dä Sprungplatz eröffnet und de Marco isch de erst international Fun Jumper gsi. Woooow

Noch 2 Täg hemmer üs den schowieder mit de Beate troffe. Sie het nur schnäll de Marc uf de Flughafe brocht und ab jetzt isch die Tante B mit üs underwegs bis uf Panama (oder je noch dem au länger.... vilicht wemmer sie gar nüm goh loh)

Wil mir no 5 Täg Ziit hend bis die Claudia und die Iris chömäd simmer no chli go offroadä und is Orosi Tal gfahre. Tina isch scho fasch Autochrank worde, wo mir den es nögste Schlofplätzli gfunde hend. sPlätzli isch zwor nid so schön gsi und sisch rächt dräckig, aber dLüüt hend üs immer so härzlich grüässt das es üs guät gfalle het.

Am nögste Tag hemmer üs den wieder mol es paar Pünkt müäsä verdiänä und sind im Park go wandere. Natürli hets genau den gregnet und mir sind nid so richtig in Stimmig cho. Aber 1 Punkt häts doch immerhin geh.  Am nögste Morge hend mir den mol wieder üsi Chleider gwäschä im iii schalte Fluss und hend üs mit Spanisch und Yoga Ziit vertriebe. dBeate und Tina sind jetzt sehr sportlich worde. Täglich e paar Minute Yoga macht eim e super Gfühl. De Marco het sIntresse nonig so dra gfunde.

Vulcan Irazu

es isch Arschchalt gsi uf em Vulcan Igazu

Am 4i am Obed simmer endli acho am Parkplatz vom Irazu uf 3248 Meter über Meer. Tina hät kann Schritt us äm Auto gmacht. Es isch eifach viel zchalt gsi für di churze Hösli und em T-shi. In Nullkomanix sind dJeans, Thermowösch und de Faserpelz usgrabe gsi. Mir hend alli zämä gschlottered und üs ufs schlimmste iigstellt für dNacht. De Marco hät es Füür gmacht und dBeate de Znacht vorbereited und Tina hät alli Schlofsäck,Deckene und so wiiters zämä gsuächt und sZält iigrichtet.

sWolkemeer uf em Iguazu

Mir hend de ganz obäd fliessig Teeli, Jägertee und Eierlikör trunke.

DBeate het üs den nomol e extra Decki geh und so hend mir nid e bizli gschlottered i de Nacht. Sisch scho fasch chli zwarm gsi.

Am Morge am 6i sind mir den uf de Top vom Irazu gloffe. Will de Park erst am 8ti ufmacht, hemmer no chli müäsä Chlättere. Di arm Beate hemmer no müäsä zu ihrem Glück zwinge.

Mir hend scho noch de erste Meter nümm möge will dLuft so dünn gsi isch und sind au wieder froh gsi womor be üsem Camp acho sind.

Natürli hemmer zersch no Yoga gmacht i dere Ziit wo de Marco de Zmorge vorbereitet het. Super Iiteilig.

Mir hend a üsem letschte Tag ohni dGirls no wele zum Vulcan Paos. Mir sind au dört gsi und chli unnedra üses Lager ufgschlage, aber für 1 Stund umäwatschle sind üs den 10.00.- ztüür gsi und drum hend mir eifach nu dUussicht gnosse und hend üs uf de Weg richtig San José gmacht zum am Obed den dIris und dClaudi go abhole.

Marco fliessig am Kleider wäschä

mir sind eifach di totale romantiker

zum Glück sind mir nid im Wasser