Flaute

Eigentli weiss ich gar nid so genau was schriiibe... es sind ettlichi Beschwerde id Redaktion iitrudlet das mol wieder e Fortsetzig mo geh, aber mini Redaktore hend leider nünt zbrichte. Alles bem alte L

Also guät, äs paar Chlinikeite sind do scho passiert:

Mir sind ändlich färtig mit äm Boudi. Er isch jetzt 15 höcher gleit und hät ä Solarzelle ufm Zelt. Also wämä so ä Auto hät, dänn isch mä niä färtig.... irgendöppis mome immer mechä und verbessere... aber immerhin ischs sowiet färtig wiämers hend welä.... alläs wichtige isch erneueret und sött die erste Wuche hebe J oder hoffentlich au länger

Bis es jedoch sowiit gsi isch....... uiuiuiui de Marco het grausam graui Hoor übercho ab däm Auto. Sisch än rächtä Murks gsi. Aber do mome Ihn grad mol looobe... Er hät das würkli super gmacht. Ich mein.... är isch jo kann Mech oder so... Applaus Applaus

Do häts doch no ä chlini story zum verzelle vo wägä „guät gmacht“...

Einäs Tages noch dem de McGuyver de Chopf zum 10000 mol aagschlage het am Boudi, isch är so was vo uusgrastet und het in Grill iägingged, so dass de grad mol paar Meter gspickt isch. (Do säg ich nur: Zum Glück isch Tina nid nöcher gstande wiä dä Grill)

Tina hät dänn brav de Grill wieder zämägsammlet und de Marco hät no viel meh aagfange fluächä und grausam humple. De Chopf hät äm nümmä weg gmacht, aber jetzt däfür de Zeche... (Tina hät dänn mol wieder müäsä is Füstli lachä) Am Obed hät de Dr Dr Dr Martin Trüeb (Jetzt scho mit 3 Dr Titel ....1 mol für die liäb Füürsorg, 1 mol für die Nähkünst und 1 mol für di super Schliiifkunst) im Marco sin Zeche denn füürsorglich undersuächt und festgstellt, dass dä Zeche zwor no dra isch aber worschindli ka Luft me übercho hät be däm Schock... total blau und ufdunse isch de gsi. 1 mol voltaren druf gschmiert und wieder guät isch gsi. Guät also soo schnäll isch dänn das au nid guät gsi...  De arm Marco humplät nämmli jetzt no und stönt wiä än groosse weme im uf de Zeche stoht (ich bi ihm würkli nid äxtra uf de Zeche gstande.... au äs zweite mol nid.... überhaupt ka Absicht gsi)

De Absoluti Oberknaller hät dän aber Tina bote e paar Täg spöter. Sie isch mol wieder chli aapisst gsi will äs Solar Pannel verspötig gha hät (wiä do jo alläs) und denn hend ihre no 2 Mexä drii gred wo Sie hät welä äs Füür machä.... Zickenterrer mol 10

Segs wiäs well... Sie hät dänn früäh is Bett welä und no än Film à la Härzschmärz luägä... Brav hät si es Stägli welä ufä und zoberst obe, wosi grad het welä is Zelt iä hüpflä do hät dLeitere ka Lust me gha und hät än Abgang gmacht. Natürli mit dä Tina druf. Klein Tina hät dänn eifach mol churz än Sturzfluug gmacht. Pummm tätsch klirr häts gmacht. De Marco isch den mol zlaufe cho und hät fürchterlich aagfange lachä. Är hät fasch nümm chönä schnuuuufe wils än so vertätscht hät. (also mol so under üüüs: was isch den das für än Fründ?)

Noch däm äs Tindli denn immernonig ufgstande isch und chli umägjömmerlät hät hätter dän mol gfroged öbmer ächt in Spitol müänd. Aber sie häts dän doch gschafft zum sich ufzraffe und zrede. (Wohl vermerkt: de Marco isch immerno am lache gsi) Wo sie de Boudi aagluägäd hät und gseh het was für än riiiise Chratzer sie ihm zuägfüägt hät ischs Sie grad i Tränä usbroche L Armä armä Boudi.

Zum Glück isch be Ihre aber nünt broche gsi. Nur paar Schürfwunde,2 blaue SkiBei und ä blaui Hüft.

Mir sind am letschte Dunnstig as Thanks Giving iiglade worde vom Gary. Isch würkli mega lässig gsi. De Gary hät gseit äs fangt am Obed aa... und will är ka genaui Ziit gseit het simmer natürli au nid dävo uusgange das für Ihn Obed scho am nomittag am 3i isch.

Alli Gäst hend sich ziemlich schön gmacht und dPenners (Marco & Tina) sind immerno die Mecher Klamotte die Garage umenand girrt. Häjo hemmer dänkt dänn gömmer doch no churz go duschä (au wänns nonig nötig gsi wär) ..... dTina hät scho di neue Klamotte usegsuäch do hemmer gmerkt, dass mir jo gar nid chönd go dusche, wil üsi Duschi im Durchgang vom Huus id Garage isch wo dLüüt di ganz Ziit hin und her spaziiiired... Häjo hemmer dänk...für öppis gits jo DEOs gäll und hend üs eifach id Sunntigs Klamotte gschmisse (Mir hend gar ka Sunntigsklamotte J)

Noch ä bizli Small Talk hets den au scho Znacht geh am 5i. Woooow isch das fein gsi. Mir hend scho sit langem nünt meh sooo feins gässä wiä a dem Fäst. (Also Tina isch scho ä super Chöchin....Meh als super, aber das hät au Sie nonig fertig brocht.)

Wiäs halt so isch häts Trutan geh mit green Beans und und und ganz feini süässi Härdöpfel und komisch guätem Brot. Eifach hammer mössig.

Gege Obed simmer den no chli as Füür ane ghocked dusse und hend pläuderlet.

De Eduardo, sind Sohn de Ed,  de Polo und de Pancho sind au iiglade gsi am Fest. De Eduardo isch en Künstler wo ab und zuä i sim riiise Wohnmobil im Garte usse huuset, de Polo isch de Sklav do und de Pancho isch Choch und wohnt eifach do imne Wohnwage.

De Ed isch au än Künschler. Er wohnt scho sit 12 Johr in Hollywood. Er isch Musiker und Schauspieler. Hät aber no kann Erfolgt gha. Er hät üs den au mol no äs Liädli vorträllerlät uf de Gitarre... aber au be de Gäst hättor nid würkli chönä Ufmerksamkeit errege. Mir hend denn mol no usägfunde dasor scho 36i isch... mir hend än so afangs mitte 20i gschätzt... also än ganz komische Kauz gsi und het gred als wärer uf Droge... Aber anschiinend isch das sis Ich.

Irgendwenn frogt üs de Eduardo so am füür wo mir den als nögsts ane gönd (mir hends em scho paar mol gseit i de letschte paar Wuche) Mir hönd em den nomol erklärt, dass mir uf Moab wend.  Do hättor aagfange zverzelle das äs dört scho bald wird schneie unds saumössig chalt isch dört. Sisch aber wunderschön und super läss. E knappi halb Stund spöter froged de Halbschuäh Eduardo üs doch i allem ärnst wieder wo ane das mir als nögsts gönd.... Aber jetzt chunnt jo de Best.... Mir sägäd nomol brav dasmor uf Moab gönd, do seit er doch voll: Wo isch das? Er hät ka Ahnig gha vo Moab und hät üs e halb Stund vorher volltexted wiä chalt aber schön dases dört isch.

Mir hend dWelt nümm verstande.

Noch dem abartig intressante Thanks Giving hemmer üs den au no paar Täg frei gönnt und sind an Strand gfahre. Eigentli hemmer jo welä go wellnesse zude Orr Springs. Dört ischs aber leider scho usbuächäd gsi.

Mir sind denn ad Küste gfahre uf Mendocino und ufä richtig Eureka und het dRüäh gnosse. Isch abartig schön gsi.

Häjo und jetzt warted mir eigentli nur no uf paar Ersatzteili für ufd Reis. De Gary meint das es recht schwierig isch zum diä ufztriibe i dene Länder wo mir ande gönd.

Ah und mir sind jetzt stolzi Bsitzer vomne IPad. Mir chömäd zwor hinne und forne nonig druus, aber das chunnt den scho mit de Ziit.

So das wärs gsi us de Welt vo üs. Mir hoffed das mir so schnell wiä möglich wäg vo Sonoma chömäd. Diä Lüüt meined do doch scho ernsthaft Sonoma isch üses Dihei.

Zzz üses dihei isch doch Schaffuuuuuuse.

und so wiiters

Nochdem sich Tina wieder erholt het vom Off Road fahre, het de Marco mit schrecke festgstellt, das de Boudi nümm ganz dicht isch. Er chas Wasser nümm phalte. Es sind nid nur 2-3 Tröpfli id Hösli, sondern grad es paar Liter. Haiii Boudiii bisch nümm dä jüngst hemmer denkt. Das mir de Boudi wieder chönd wiederbelebe hemmer scho gwüsst. Aber üsi grösser sorg isch gsi, wiä chömäd mir zu neuem Wasser und wo chönd mir den pfusä... Mir hend guten Mutes üses letscht Trinkwasser im Boudi geh und sind is nögste Hotel gfahre. Fräch wiä Tina isch, het Sie de Army grüän Kanister gno und isch is Hotel go froge öb Sie chli Wasser dörf haa. Leider hät eifach niämert Ziit gha für Sie und drum hät Sie sich sälbständig ufs WC suächä gmacht. Gesucht gefunden. Bim 2te Kanister hät dän öpper für üs Ziit gha und mir sind go frooge öb mir es bizli Wasser dörfäd ha... Sie hend üs den ganz liäb is Undergschoss verwiese a sone chlises Brünneli. Ganz worschindli hend die a de reception denkt mir seged Penners (Hend jo doch scho sit bald ere Wuchä nümm dusched....worschindli hets au so gschmöckt)

Anyway, da mir de Kanister leider nid under da chline Brünneli undere brocht hend hemmer mit 2 Dose Bier (womor schnäll kauft hend und wiä dä blitz trunke hend) de 20 Liter Kanister ufgfüllt. Ke Ahnig wiä lang das mir do drag ha hend, aber sisch üs ziemli lang vorcho.

Will de Boudi immerno sehr viel Wasser verlohre het, hemmer immer chli angst gha, dass mirs nümm bis zum nächste Campground schaffed, aber wiä immer het üsen Toyota üs nid enttüscht. Uf em Wäg zum nögste Schlofplätzli hemmer den au nomol en Bär gseh. Damol hemmer vo afang a gmerkt, das es kein Hund isch J

Am nägste Morge het de Mac Guyver im Boudi sis Wasser-Problem glöst und mir hend chönnä ohni Problem heim fahre.

Wieder dihei in Sonomä hämmer als aller ersts ä Duschi gno (öbs jetzt nötig gsi isch oder nid) hend en gmüätliche Obäd gmacht und sind die letschte paar Täg und Ihri Highlight nomol durägange.

Am Mäntig hemmer üs grad als ersts a di hindere Fenster gmacht. DFenster hemmer üsädruckt und Aluminiumplatte iä ghämmeret. Tönt jo ganz eifach.... Aber ich säg eu: Nei war es nicht-nid ä biz! Mir sind guäti 9 Stund a dene 2 Platte gsi. Irgendwiä hends eifach nid so welä passe. Zersch het de Mac Guyver anstatt ufs Alu uf de Boudi ghämmeret und denn het dHeidi no verseit bim Kitte. Gar kann Glückstaag gsi, aber au so Täg gits.

Am Ziistig isch der Tag des Marcos gsi:

Zersch wetter Tina in Teich iä gheie und denn bricht grad de Rand us Stei in Teich iä (fasch inklusive Tina und Marco) 10 Minute spöter fahrt de Marco retour und nimmt es frisch gsetzte Tannebäumli mit. Sin Kommentar do dezuä isch gsi: „Ich han no dänkt do häts doch mol no än Baum gha.“ Do dezuä monich de Marco beschütze : Me gseht also würkli fasch nünt bem retour luägä. 

Ah do hetti fasch no vergässä zum erwähne dasor au no grad sini Schuäh chli kaputt gmacht het. Er het bemnä Stei iighänkt und isch hange blibe. Aber wichtig do däzuä ischo jo, dass er ein Tag vorher de Tina gseit hät: „Es git erst neui Schuäh wänn üsi Reis fertig isch“ ........ Tinä hät sini Schuäh dän wieder gflickt mit ihrnä Nähkünst J

Im lauf vodere Wuche hemmer immer mol chli öppis gschaffed am Auto... Da immer nonig alli Teili vom neue Fahrwerch acho sind, hemmer dört leider nonig chönä aafange. Und mir reged üs ziemlich uf, dass de Gary immer mol wieder öppis vergisst zum bstelle oder üsi Teili grad öppert anderem git.

Aber mir hend jetzt en neue Chüäler, es paar neue Netzli als Staufach, e Duschi J (was aber nid heisst, dass mir ab jetzt meh duschäd) und Tina häts doch ändlich mol gschafft zum de Fahrersitz zflicke. Aber no wichtiger, Sie isch jetzt no diplomierti Brot bäckerin. Absolut super feins Brot macht Sie (und das ohni Ofe).

Je chälter dases wird, desto spöter stönd mir uf. Vor em halbi 8i, 8i schaffeds mir leider nid us dä Fädere. Iiiiszapfä chalt isches.... Und am Obed ischs jo denn au scho wieder dunkel ab em halbi 6i und no viiiiil chälter als am Morge.

De Gary hät üs gseit, dasmor sini Holzheizig zbenutze die Garage. Und mir sind gottefroh do drüber. Ab em halbi 5i wird do aagführed was goht, dases am Obed chlei wärmer isch.

Irgendwenn um Mitternacht überwinded mir denn üses innere Schweinehund zum idi iiszapfe chalt Nacht usezgo und i üsi Schlofsäck zgumpe. Wichtig isch do  no zerwähne: Mittlerwiilä schlofäd mir scho i üsnä Thermo-lange underhose und de Socke (Tina het sogar no em Bodi und e Thermo-T-shi a). Anders wärs glaub nid uszhalte. Sobald mir i üsnä Säck ine sind gits den au  no en 200 meter Sprint dasmir au schön warm hend und chönd iipfüsele.

Au no wichtig zerwähne isch, dasmor jetzt ä Espresso Maschine hend. Also so e richtig italienischi wiä dä Davide hät. Eini womor au uf em Herd chönd machä. J Au no wichtig isch üsen neue Autoradio mit Boxe.

Da dä Boudi momentan no ohni Chüäler do stoht (will au do nonig alli Teili do sind), hemmer vom Gary e 2. Gfährt übercho. Und nid nur eifach eine sondern en FJ62 miteme 5,7 Liter Chevy V8 Motor J Dä Marco isch ab wiänä Zäpfli i dem Fahrzüüüg

******

No ä wichtigi Durchsag: Redaktor Schmidli du bisch de absolut Oberhammer.  Er häts doch ernsthaft gschafft sich mitte is Gscheh iäzmogle uf em Nürburgring und hät mit sine Motorsport Kollege chli chönä pläuderlä. De Alex Zanardi känn er jo zum Glück scho johrelang ...gäll Andi.

Mir hend Tränä glached am dim Mail!

*****

Kings Canyon und Sequoia Nationalpark

Nochdem mir üs wieder erholt hent vo üsem lange Marsch, hemmer üs uf de Wäg in nögste Nationalpark gmacht. (Also de Muskelkater ide Wade, isch bede Tina no bis hüt zspüre)

*****

Do möchted mir üs grad no bide Claud und dä Iris bedanke, wo üs Ihri Johrescharte vo de Nationalpärk vode USA gschänkt hönd.

*****

Womor den im Nationalpark acho sind, simmer grad mol go diä riese Bäum go aluägä. Natürli het me a jedere Taflä aghaltä zu läsä wa druf stoht. Ihr mönd wüsse, de Marco isch sehr a de Gschicht und a Fakte intressiert. Nid das da schlächt wär oder so, aber er luägt denn au immer das sini Mithängsel alläs au richtig tüänd durelese. Denn chas siii, dass Träumer wie Tinas nu schnell swichtigste in Kürze läsäd und fliessig die schönä Bilder aaluägäd und denn natürlich dLandschaft. Das chan ab und zuä zu Konflikt führe, aber dTina isch längst nümm so dumm wiä Sie usgseht. Sie gits sich schampar Müäh zum de Text richtig durezlese und chan uf Froge au antworte J

Hüt ischs mol nid allzu schöns Wätter. Dä blau Himmel loht sich nur sältä Blicke. Aber trotzdem das es bald chent cho rägnä cho, loht Tina ihri Rägäjackä im Auto. Eigentli hät Sie us Sicherheit dJacke scho wele mitneh, aber de Marco het Sie susch wieder grausam gmobbt (das isch eis vo sim gröste Hobby). Mir sind denn gstartet zu dene schönä riese Sequoias. Marco het gmeint das sind nu grad mol 800 Meter bis dört ane. Noch dem das es den doch scho aagfange het tröpfle und mir sicher scho meh als 2 Kilometer gloffe sind, het den au de besserwüsser Marco mol gmeint, das mir eventuell falsch sind... Tina het den no churz dAriell gspielt ufeme Stei (worum au immer) und denn simmer wieder zum Auto gloffe. Wo de Marco de Plan nomol genau aagluägäd hät, isch em ufgfalle, das mir am falsche Ort sind zum de grösst Sequoia Baum zgseh. Tina hät sich is Füstli glached und hät schampar freud gha, das de Marco nid immer rächt hät.

Sisch den scho langsam am iidunkle gsi, womor es Plätzli gfunde hend ufeme Campground. Fliessig hemmer no ziemli viel Holz zämägsammlet das mir nid mönd früühre am Obed. Sisch jo jetzt doch scho November und dNächt sind do au um de Gfrüührpunkt umä. Do chönd Ihr Schwiizer üs scho sägä, dases be eu chälter isch, aber bitte vergässäd do debii nid, das mir imne Zelt schlofed und ka Heizig hend.

Zum Znacht hets mol wieder Spaghetti mit Tomatesauce geh und es isch absolut spize gsi und alli sind glücklich gsi.

Am nögste Morge simmer wiiters gfahre in Süde. Wil üsi Tankazeig gmeldet het, das es doch scho bald mol Ziit isch zum tanke, simmer zude nögste Tankstell gfahre. Uf em Wäg richitg Süde het sich usegstellt, das die SUPER Charteleserin Tina, doch nid so SUPER isch. Uf de Charte stoht nämmli, das die Tankstell im Winter gschlosse isch. Jänu wo gschaffed wird, passiered au Fähler (oder?!?!!?). Zum Glück het üsi Tankaazeig nid so ganz gstumme und mir hend no gnuäg Benzin gha zum wieder e halb Stund in Norde zfahre zude andere Tankstell wos i dem Park hät.

Mit vollem Tank het de Marco gfunde.. „ Ich bin au ein Jeep“ und mir sind ab vode Stross. Mann soll bedenken: Mir hend jedemenge Kilos im Auto und üsi Reife währed die Schwiiz scho gar nümm erlaubt mit dem Profiiiil. Dezuä simmer au nid höchergleit. Aber das stöhrt i dem Ziitpunkt de Herr Stamm nonig. Guten Mutes fahred mir diä Schotterpistene ufä und abe bis den irgendwenn de Marco die „Ich han kei Ahnig vo Nünt – Tina“ frogt. Hmm meinsch de Boudi schafft das bis dört ufä... Tina git do dezuä kein Komentar ab wil Sie nu scho vom aneluägä fasch afangt brüälä. ( das war ein Fehler)

Zude nögste Stunde monich glaub nünt gross schriiibe.... Bilder langed do vollkomme

Yosemite Nationalpark

Da de Garagist e Wuche id Ferie isch, hemmer üs Gedanke gmacht, was mir i dere Wuche mache söläd. Do es Fahrwerch nonig iitroffe isch, hets de Marco de Scheff Mechaniker und sini Assistentin nonig chönä sälber iibaue... Janu mir hend den üsi 7ä Sachä packt (hmm vilicht sind au paar Sachä meh gsi) und hend üs uf de Weg gmacht in Yosemite Nationalpark.

DFahrt isch durch dPrärie gange und mir hend diä wunscherschön endlos Landschaft gnosse. Bevors uf dHügel id Sierra Nevada Richtig Nationalpark gange isch, hemmer e super Plätzli gfunde zum pfuuse. Am nögste Tag in Park iägfahre miteme stahlblaue Himmel. Vo üs ligend de El Capitan und de Half Dome. Die 2 berüähmtischte Granitmonolite im Park. Mir sind us em stuuhne nümme üsä cho. Es Chlätter Eldorado zu üsnä Füäss (nu blöd hemmer genau hüt es Chlättergstältli dihaam vergässä )

El Capitan

Nochere churze aber intensive Wanderig zum Yosemite Fall, wo leider ka Wasser gha het, hemmer au grad no härz aller liäbst Richard kännä glärnt wo üs iiglade het, be ihm uf em Campingplatz zpfuuse. Mir hend das aagebot dankend aagno, wil es im ganze Nationalpark verbote isch zum Wild zcampe.

Wiä mir so sind, hemmer üs grad wiä dihei gfühlt und hend aagfange choche. Es sensationalls guäts Steak hets geh mit Härdöpfel und Salot. Hmmmm isch das super gsi. Do seit mir de Marco mol so näbädbii „ hä luäg au do lauft en Hund??!?“ Wo de Hund denn aber 2 Meter vo üs entfernt gsi isch, het de sich als Schwarzbäär entpupt. Hui mir sind grad biz sproochloos gsi. Müänd mir jetzt angst ha, oder isch das do normal? Ghört de Bär vilicht zum Campingplatz? Mir hönd em den chli noorglüchtet und er isch a üs verbiizottlet zude Nochbore. Die näbäddra hend en aber erst bemerkt, wo de Teddybär öppe 1 Meter hinder dänä gstande isch. De Maa isch ufgschosse wiä de Blitz, fasch über sis Holzlager gheit und het de Bär verschreckt. Äs Bärli isch den abmarschier, aber nid würkli beiidruckt gsi.

Mir hend den chlei e schlechts Gwüsse gha, worum mir schlächtä Sieche üsi Nochbore nid vorgwarnt hend.

******

Zur Info: De Bär ghört nid zum Campingplatz

******

Am Obed am halbi 10i isch den de liäb Richard vo sinere Wanderig retour cho und er hät verzellt wasor alläs erläbt hät. Voller Adrenalin ischor us em schwärmä nümm usä cho und hät verzellt und verzellt. Mir hend den no zämä äs Bierli drunke und sin ab i üsi Suite go pfuse. Die Nacht am halbi eins isch Tina notzment verwached wilsi komischi Grüsch ghört hät. Im normalfall stellt sich Tina jo tod (wiä de Davide) aber damol het sie de Marco gweckt. Schüch hät sie gseit „ än Bäär“ und de Marco isch wiä än wilde verwached und hät inore Luuutstärchi gruäfä „Wooo wär?“ är isch den aber au grad so schnäll wieder iigschlofe. De Bär isch worschindli so vorschrocke, dasor abzottlet isch. Bevor de Marco wieder iipfused isch, hättor dä Tina aber no en Uftrag geh „pass und lose guät, wän dä Bär wider chunnt mosch mi wecke! Gesagt Getan. dTina hät dAuge nümm zuä tuä und sobald Sie wieder e gebrummel vomne Bär ghört hät, hät Sie de Marco gweckt. Aber das hät de Marco nid wükli krazted. DTina het den eifach jedes mol de Riisverschluss wiä blöd ufä und abägfahre bis es Grüsch wieder weg gsi isch.

Wiä ihr eu chönd vorstelle, isch die arm Tina zu nid viel Schlof cho.

Am morge am 7i isch den au scho wider Tagwach gsi und mir hend üs uf de Weg gmacht zude Nevera Wasserfäll. Zersch hämmer jo welä uf de Half Dome ufe watschle, aber de Richard hät üs gseit das Kable für de letscht Ufstiig scho wäg sind und jetzt Winterpause isch. Janu hemmer dänkt. Denn verchürzed mir halt üsen Trek. Mir sind den doch sehr glücklich gsi, hemmer üs nid für die gross Tour entschiede. Nid das mir das ned chönnä hetted. Ich glaube mir wered imne spitze Tempo dört ufä kräckslät. Aber äbä es Wätter hät eifach nid so schön mitgspielt, drum simmer glücklich gsi.

Noch 5 Stund hemmer den ändlich wieder sichere Bode under de Füäss gha und sind richtig stolz uf üs gsi, dasmor mol wieder spotlich gsi sind.

*****

Amerikaner:

De Marco hät jo scho immer gseit das dAmerikaner voll liäbi siächä sind und extrem fründlich. Doch dTina hät das für es Grücht ghalte. Im Hotel wo Sie gschaffed het sind dAmis immer di arrogantischte gsi vo allne. Aber, wiä sich usägstellt hät hät dä Marco au mol Rächt gha! Äs isch doch ernsthaft so, dass diä Amis so was vo ä liäbs Volk sind. Chum zum glaubä, aber diä hälfäd immer und überall. Diä würded eim sogar no sFudi abbutze wen mä dHänd broche het. Ärnsthaft, diä sind voll liäb. dSchwiiz chent do no viel lärnä. Vorallem i Gastronomie und Detailhandel.

*****