üsi letschte paar Täg wiit wäg vo dihei

Noch e paar erholsame Täg in Brasilie simmer wieder zrugg in Uruguay acho. dHitz isch enorm gsi und dSunne hät so richtig brännt uf de Huut. Ab Uruguay ischs den au richtig schwüäl worde.

Amne Stausee womor campäd hend ischs matschig gsi unds hät abartig viel Moskitos gha wo tierisch freud a üs gha hend. Mir sind denn is Zelt gflüchtet, aber irgendwie hend die au dä Wäg zu üs gfunde und de Marco isch die ganz Nacht demit beschäftiged gsi Muggä zjage und Tina vom schlofe abzhalte.

Total grädered sind mir am nögste Morge wiiters gfahre. Je nöcher mir ad Küste cho sind, desto meh Bäum sind im Wasser gstande. Zum Teil sind ganzi Hüser bis zum Dach under Wasser gsi und mir hend üs gfroged worum den sWasser so hoch isch... häts ächt grägnät???

Uf em Wäg zrugg zum Paraiso Suizo ischs Wasser scho gliich hoch gsi wiä dBrugge und mir hend angst gha öbs äs Schwiizer Paradies überhaupt no git?!? Noch xtuusig Teich, simmer den wieder „dihei“ acho. Uf em Camping sind no immer äs junge dütsche Päärli Eva und Lukas gstande wo üs verzellt hend, dass es ununderbroche grägnät hät sit mir uf Brasilie gfahre sind. Jetzt isch üs au klar worum das Land so under Wasser stoht. Da mir jo Kinder der Sonne sind, hend mir dSunne wieder zrugg an Platz brocht und alli sind glücklich gsi. Üsi letschte paar Täg am Strand sind aber trotz Sunne nüm so richtig super gsi. sWasser gseht bis jetzt no Gaggibruun us und schmöckt au denohr und am Strand häts überall Dorne und scharfi Muschle... Also nünt zum no bitzli sFüdle sünnele und Delfin spiele. Mit Eva und Lukas hends mir aber so super gha dass au so Ziit meh oder wäniger schnäll verbii gange isch.

Eigentli hend mir üse Boudi jo wele iistelle bis mir ihn „schwerens Härzäns“ verchaufe chönd.

Aber wiäs dä Zuäfall so wett, hend mir üsäs Schmuckstück en Tag vor de Abreis chönä verchaufä a 2 super cooli Schwiizer wo üs mega sympatisch sind. So en Verchaufsvertrag ufsetze isch aber gar nid so eifach gsi wiä mir üs das vorgstellt hend. Nid jede Notar oder Awalt setzt so schriibe uf. Mir hend aber Glück gha, denn scho de 2. Notar hät gmeint, dass es Verbote seg sAuto a Usländer zverchaufe...wa mir jo au wüssed.... aber noch längerem Überlege und 100 Dollar Ufpriis, ischs den plötzli nümmä verbotä gsi... jojo.... typisch Südamerika.

Die letscht Nacht hömmer mir uf de Luftmatraze ade Küste bi Montevideo verbrocht. Und am nögste Tag hemmer no mit em Beat und de Laila (diä 2 ultralässä Schwiizer) verbrocht. Nätterwiis hends üs den au no grad uf de Flughafe brocht. Shät eifach perfäkt passt. De Abschied vom Boudi isch üs extrem schwär gfalle. Sisch ä absolut genials Auto üsen Boudi! Üs wird aber au de Panchu fählä üsen imaginärä Hund. Mir hend beschlosse de Panchu nid mitheim zneh, da er sich scho so an Boudi gwöhnt hät. Und de Beat und dLeila hend gmeint, dass sie sowiso au en Hund möchted. So ischs üs ä bizli liächter gfalle ohni üsi 2 treue Fründe hei zflüüge.

Fasch 30 Stund hemmer brucht vo Montevideo – Panama – Puerto Rico – Frankfurt – Züri

Ziemli erschöft sind mir in Chlote acho und hend üsne Auge fasch nid traut wo ä riese Menscheschaar uf üs gwartet het!

Äs isch irrsinnig gsi so viel Lüüt zgseh wo äxtra wäg üs cho sind.

Mir möchted üs nomol härzlich bedanke bi allne wo an Flughafe cho sind. Und natürli au bi all dene wo üsi Reis über de Blog mitverfolgt händ. Für üs isch äs ä mega beiidruckendi Ziit gsi und mir werded bestimmt no lang devo verzellä.

So schnäll wärded mir aber nid wieder uf ä langi Reis go.... obwohl mir worschindli sofort gärn wieder üsi Rucksäck würded packä und verreise. Aber jetzt wird zersch mol wieder gschaffed und denn luägäd mir wiiters.

truurigä Abschiid

die neue Bsitzer dLaila und de Beat

Sommer - Sonne - Sonnenschein

Noch dem mir dBrugg überquert hend richtig Uruguay wüssed mir grad, worum so viel Europäer do ane uswanderet. Vom Land her gsehts chli us wiä be üs. Sisch sehr grüän, hät viel Süässwasser und eifach schön.

Nueva Helfetica

Mir hend grad ä Hizewelle verwütscht und äs Parometer hät Temprature um di 48 Grad im Schatte aazeigt. Tina isch brav gsi und hät ka bizli gjammeret, doch ändli hät dä Marco mol über dHitz gwettered... jupiii. Au wänn üs dFlüss nid würkli agmacht hend zum go bade, so hemmer üs trotzdem idi bruun Sossä iägwogt. dChind sind am spiele gsi und überall häts abartig viel Lüüt gha ade Stränd.

Mir hönd scho länger nüm so schöni Ständ gseh und äs Wasser isch eifach herrlich gsi.

dNächt am Strand sind weniger erholsam wänns so heiss isch dasme nakt und ohni Decki no zheiss hät und grad näbäd äm Auto ä Girl am lachä, schreie und chotze isch bis am morge am 6i.

Nocheme churze halt in Montevideo sind mir wiiters düüsed zu Schwiizer vo vor Johre do ä Stückli Land kauft hend – Paraiso Suizo.

Mir fühled üs vo Afang a wohl und chömäd au grad is Gspröch mit de andere Traveler. Da Fläckli uf Ärdä hät üs super guät gfalle. Vorallem aber dGastfründschaft und au di andere Gäst.

dLivia und de Jens hends üs bsunders atuä. E Päärli zämägsetzt us eme Psychiater undere Psychologin oder so was... ganz witzigi Zämästellig. Sie probierts mit Rede, er mit Medis hihihi

Erst grad gstranded in Montevideo und toured jetzt 1 Johr dur Südamerika. Au mit em dütsche Päärli Lukas und Eva hemmer üs uf aahib verstande. De Gspröchstoff isch üs niä usgange, mir hend immer super Storys uf Lager gha und hend somit de beide „Frischlings“ au chli angst gmacht... Aber au diä wärded Ihri Erfahrige machä hihihi

Sguätä bi so reise isch, dases kei richtig oder falsch git. Jede machts uf sini Art und Wiis und niämert chan urteile.

ändli klappeds au bim Marco mit fischä

Noch 2 intensive Lach-Täg, gönd mir wiiters richtig Brasilie. Mir wend vor üsere Abreis no in Brasilie – Florianoplis, bim Marco sine Kollege verbii.

Wiä au Uruguay hend mir Brasilie viel trochener vorgstellt, aber äs grasgrüä. Die Sumpfgegende suuuled Capivaras umänand. Riiisigi Meerschweindli oder so. Mir vertriibed üs dZiit mitere chline Safarietour am Strosserand.

das isch mol ä Capivara gsi

so gsends läbig uus

Wills grad mol wieder ziemli heiss isch und Tina scho gar nümm red, müä dä Marco die nögst Tankstell afahre dass Sie sich chan abchüälä. Do frogt mä sich wieder... isch äs schöner wäns ganz chalt oder ganz heiss isch???

Im Süde vo Brasilie häts ganz viel Canyons. Mir entscheide düs für de Canyon Itambezinho. Eigentli hemmer vor gha go Autowandere, aber leider müämä do ganz älei mit de Füäss 1 Stund hii und 1 Stund retour wandere... Jo guät, dänn machäd mir das halt.... Da mir aber dWanderschuäh scho versorget hend, machäd mir de Weg mit de Crocs. Wanderschuäh wäräd do au glatt übertriebe gsi, dBrasilianerinne sind au ide Absatzschuäh hindere stolziert.

Noch därä nid würkli asträngändä Wanderig gönned mir üs ä Pause am Strand vo Santa Marta. Dä Marco hät grad mol wieder Problem mit de Linse gha, so hät halt nu Tina chönä di heisse Fudis vode Brasilianer aluägä.

Florianoplolis

Mit offene Arme sind mir ufgno worde bem Dany und de Patricia.

Diä 2 hät dä Marco in Malta vo 4 Johr kännä glärnt. Mir hend sofort chönä is Gästezimmer iziä mit eigenem Bad. Sozsägä wiä im Hotel. Am Obed hämmer so richtig grilled und über alläs mögliche gred. Am Afang häts no chli ghappered mit em englisch, aber noch ä paar Bierli hät au dPatricia ihri Hämmige verlohre..

für was Schnee wänn mä Sand hät?

Am 2te Tag häts gregnet, aber mir sind trotzdem zude Lagunä gfahre. Trotz Rägä sind viel Lüüt am Strand gsi. Wos wieder trochener worde isch, sind mir den go sandboarde gange. Isch uu lustig gsi, aber mir sind denn all zämä vo obe bis unne sandig gsi. 

aller Anfang ist schwer

gmüätliche Usgang mit Livemusig

Am Obed sind mir ane Konzert gange wos no so richtigi Brasilianischi Musik gspielt hend. Da üsi 2 „Mitbewohner“ dManagerin kännäd, hend mir grad zforderst än Tisch übercho. Au wänn dMusik guät gsi isch, hät dPatricia Tina nid zum tanze chönä überrede.... de 

Alkohol hät irgendwiä gfählt.

Am morge am 1 hemmer den no än SUBWAY gsuächt und überglücklich hend mir ä geils Tonsandwich miteme Guätzli ergattered.

Da mir am nögste Tag „üsi Mitbewohner“ erst am Nomittag verwached sind, hemmer nu en churze Strandbsuäch gmacht und Tina hät sich no ä ächts „Brasiliä-Bikini kauft.... öbsi sich getraut das au ide Schwiiz azlege???? Naja

De Marco (Tina eigentli au) hät sich jo scho sit Monate riesig uf dStränd oder besser gseit dBrasilianerinne am Strand gfreut. Mit Schrecke het er aber müäsä feststelle, dass die Kafibruune, Vollbuusige, Brasilianerinne mit guäter Figur niämäds meh zfinde sind. Völlig entgeisteret hätter dänn halt sis Tindli phalte....

E ganzi Wuchä hend mir di Brasilianisch Gastfründschaft gnosse, doch au do hend mir üs wieder müäsä verabschiede... Doch sisch kein Abschied für immer, Sie chömäd üs scho bald ide Schwiiz go bsuächä.

Jetzt machäd mir üs uf de Weg zrugg uf Uruguay, wo mir no die letschte Wuchä vo üsere Reis verbringä wärded.

   

Surfschuäl au für di chliiine

Strandläbä

Uf was freued mir üs am meiste dihei?

Tina:

Fründe und Familie

Mini Chatz de Gängster

DTV

Badmintonspiele mit de Sophie

snööbe

Opi-chuächä (au wännän dFabi macht)

Dampfnudle vom Gotti

Richtigi Milch

Erdbeer-Rabarbere Gonfi

Bündnerplatte

Marco:

Fründe und Familie

Grosses und langs Bett

Auto wo schneller wiä 80 fahrt

Iästelle mit Fründe

Was gits langwiiligers als dKüste vo Peru????

Ganz klar, dOschtküste vo Argentinie

No 2500km bis uf Buenos Aires und mir hend jetzt scho ka Lust meh. Üsen Gspröchstoff goht langsam zänd, di ganz Musig lamped üs langsam zude Ohre us und äs isch eifach langwiilig. Ab und zuä chrüüzed mir mol wieder Reisendi, aber niämert macht än erfreute Iidruck. Die einzige wo super fründlich und guät druf sind, das sind dArgentiniär. Diä händ nämmli momentan Ferie und me märkts. Riese Wohnmobil und Wohnwägä reised vom Norde in Süde.

Mir froged üs wa diä denn dört unne wend? Dört ischs jo chalt, nass und windig??!? Aber genau das suächäd diä Lüüt wo vode heisse Region Buenos Aires abä chömäd.

Noch 600 Kilometer hämmer ändli mol wieder öppis gfund interessant isch. De versteinereti Wald. S Dummerchen Tina hät sich vorgstellt wiä das än Wald isch wo versteinered isch... wiäs dä Namä jo scho seit... nun ja..... de Marco hät das besser gwüsst (wiä so vieles)

De Wald bestoht nur no us e paar vereinzelte Baumstämm wo am Bode leged und wiä gseit us Stei sind. Vor vielne vielne Johre het dVulkanäschä de Wald iigäschered und mit Rege Wind und Mineralie ischs denn zu Stei worde.

800 km spöter hend mir den ändli de wichtigst Punkt uf de Ostküste erreicht. De Lüchtturm Punta Ninfas. Weme Glück hät gseht mä dört Orkas. 

Und da mir ab und zuä Kinder des Glücks sind, hemmer Orkas und ganz viel Seeleuä und Seeelefante gseh. Mir sind ganz us em Hüsli gsi wo mir diä abartig schönä Tier gseh hend. Hend gar nid würkli demit grechnet dass mir diä riiise Viicher zgsicht bechömäd. De Marco hät gmeint, „entweder sind das Seeleue im Wasser oder denn Haie“ „Weder noch mein Lieber, dass sind Orkas“! häts Tindli ganz eufoorisch gseit.

Am nögste Tag hend mir dWasserfläschä iipackt und sind uf Orka-Suächi gangä. Und siehe da, do sind au scho wieder dähär zschwümmä cho mit de 2 Baby Orkas. 3 Meter vom Strand entfernt sinds ganz ruhig dKüste ufä und wieder abägschwumme. Isch irrsinnig gsi.

Und wiiter gohts.... Mir sind noch 2 Täg relaxä denn wieder in Boudi ghocked und wiiter düüsed de Wärmi entgege. Mir sind sogar mol no is Meer go bade gange, und sisch würkli agnehm warm gsi. Hetted mir nid denkt.

Mir hend uf em weg in Norde jedi Attraktion uf em Weg wele aluägä dass es bizli Abwächslig drii bringt. Drum simmer den au zude Sierra de la Ventana gfahre. Eigentli hemmer gar ka Lust gha uf Wandere, aber häjo... Bewegig tuät jo guät... Wie de Zuefalls so hät wele, isch genau i dem Johr de ganz Park gschlosse wils dWäg sarniered. Puh hemmer nomol Glück gha. Hihi. Hend üs den en Camping bimne See die nöchi gsuäch und ändli mol wieder Kleider gwäschä. Mir hönd üs wiä chlini Chind gfreut zum go bade go, nu womer diä Brüäh gse hend, ischs üs gar nüm so noch plantsche zmuät gsi.

Uf em Weg noch ufä, hends mir denn nomol probiert mit plantsche im Meer. Es tönt jetzt vilicht äs bizli als wäräd mir Susis, aber damol sind mir nid is Wasser, wils üs zfest gwindet het und dStänd überloffe gsi sind. Aber Meer hend mir jo den au no gnuäg in Brasilie.

In Balarce sind mir is Motore-Museum vom Juan Manuel Fangio. Nei, diä Idee isch bestimmt nid vode Tina cho... aber sogar sie häts super guät gfunde und das söll was heisse!

Buenos Aires

Noch fasch 2 Wuchä dur di trostlos Wüästi fahre, hend mir überglücklich Buenos Aires erreicht ohni üs nu ei mol zverfahre.

(Scho klar mit de Tina als Navi)

die nägste 4 Nächt werded mir endli mol wieder Läbä wiä könige hemmer denk, und genau das hend mir au gmacht.

Es Bett isch guät 2 mol so gross gsi wiä äs Dachzelt, mir hend ä WC gha wome sWC Papier dörf id Schüssle gheie und sgeilste ä Duschi.

Mir hend i dene 5 Täg so viel duschäd wiä susch i 2 Monät.

Jede Morge am 7i ischs los gange mit em Fitness (guät vilicht ischs amig ((also eigentli immer)) chli spöter worde), dusche und denn ändli go zmörgele. Wow, hend mirs gnosse weme de Toast eifach in Toaster chan iä lege und scho ischs toasted. Mir müänd das jo no sälber grille uf em Herd.

sHotel isch super stylisch gsi und no wichtiger: de Subway und Starbucks sind grad um dä Eggä gsi. Und sit Wuchänä hend mir üs scho wiä chlini Chind uf diä 2 Lädä gfreut.

Also zude Stadt:

Als ersts hend mir üsi Dollar/CHF/EURO uf em Schwarzmakt müäsä go tuusche. De Bluedollar isch momentan be fasch 11.  Uf em ganz legale Markt ischer be ca. 6.70. De Franke wett üs niämert wächsle. Niämert zeigt würkli intresse... Per Zuäfall chömmern den aber doch au no wächslä... Womor wieder zu Geld cho sind, hend mir so ä Hop on Hop off Tour gmacht mit em Turibus. Isch sehr beidruckend gsi. Üs hät das sehr guät gfalle. Schnäll isch üs klar gsi, wän mir müästäd in Argentinie wohne, denn wärs sicher do. Guät äs hät au äs paar Egge wos nid so sicher isch... mir hend das erfahre, womor mol wieder sGfühl gha hend mir müänd no än Spatziergang go machä, will mir so lang ghocked sind. DTuriPolizei hät üs jedoch ufghalte, wo mir is würkli schlimme Revier hend wele laufe. (Guät de Marco händs eigentli durälaufe loh, nu sTindli hends zrugg ghalte)

Sie hend denn erklärt, wenn Turiste i diä Zone iä gönd, werdeds abgstoche und usgno. Aha aha, so isch das. Polizei üsen Fründ und Hälfer hät üs denn verzellt wiä mir das Gebiet chönd umlaufe.

Miteme chline Umwäg sind mir den lebendig am Ziel acho.

In Stadtteil La Boca hend mir üs den mit Lederware iideckt. Natürli hend mir zwänig Gäld debii und und hend am nägste Tag grad nomol müäsä dört ane go... Tina und ihri Täschä...

Am letschte Tag hend mir üs Ziit gno zum go shoppe. Aber wiä mir usägfunde hend, sind mir überhaupt nid so shoppingbegeisteret. Am halbi 1 sind mir scho die Bierpause gsi ide Hoffnig dases nochane richer goht zum pöschtele... Mir sind leider falsch glägä, noch dem Liter Bier hend mir üs gar nüm wele bewege.

Am Friitig Morge sind mir ganz entspannt wieder us Buenos Aires usegfahre (ohni verfahre verstoht sich) und sind über dGrenze noch Uruguay gfahre

Aamerkig: Au wen üs Argentinie (vor allem Patagonie) nid so zuägseit hät, so heisst das no lang nid dases nid schön isch. Da mir scho sit bald 16 Monät underwägs sind, hömmer müäsä feststelle, dass üs eifach nümm so viel beidruckt wiä am Aafang. Swir alleg Ziit zum bald retour i üsi Haamät zgo und chli uuspanne und verarbeitä.