Leider hend mir en chline
Ziitdruck gha weg üsem Bsuäch wo scho
i weniger alseme Monät achunt. Paraguay het üs super gfalle. Es isch gar
nid so trocke und unfruchtbar gsi wiä mir denkt hend. Die erste paar Täg sind
mir bim Ente Werner gsi. Ganz än liäbä usgwanderete dütschte wo Toure abüted
mit Land Rover und Ente. Er hät üs jede Tag mit lustige Gschichte überhüft und
het ei Zigi ade andere graucht. Vo ihm us ischs den wiiters gange zum Walti und
Monika und ihrne 2 Chind. E ganz ä intressanti Familie. Die 2 Dschungelchind
hend ziemli freud gha a üs und hend üs vom morge bis am Obed belagered.
Mir müänd also au sägä, dass
die Chind eifach super sind. Wo mir e Platte gha hend, hemmer sozsägä gar nünt
müäsä machä. Die 2 hend das alläs sälber gmeistered und das mit 7i und 9i.
Eifach spitze die 2.
Am negste Tag hend mir üs den
au wieder mit Chrigi und Kölbi troffe ufeme super Camping wo vomne düütsche
Schwiizer Fan gführt wird. De het scho sit langem e Fischzucht und en chline
Zoo. Alläs Tipp topp gsi dört. Da mir aber äbä leider hend müäsä stresse, sind
mir noch einere Nacht scho wieder richtig weste gfahre, zude Mennonite. Das
sind usgwandereti Dütschi wo sehr gläubisch sind. Mir sind überall im reinste
Hochdütsch begrüässt worde. Da mir ghört hend, dass in Filadelfia de besti
Automech isch, hend mir dem Dütsche üsen Boudi avertraut. Und er isch de erst
gsi, wo scho noch 5 Minute gwüsst het, was üsem Goldschatz fählt. I dene 2 Täg
wo de Boudi operiert worde isch, hend mir ganz Filadelfia unsicher gmacht. Mir
sind id Erdnüsslifabrik, id Sattelfabrik und is Museum. Da de Mechaniker im
Marco zverstoh geh hät, dass er unerwünscht isch, hät sich dä Härr Stamm denn
wohl oder übel au müäsä üsem Kulturprogramm aaschlüüsse. dChrigi und Kölbi sind
denn schomol chli voruus gfahre, da mir no chli uf de Boudi hend müäsä warte.
Aber mir hend schowieder abgmacht, dass mir üs ine paar Täg in Bolivie wieder
gsend.
DGrenze zu Bolivie isch nid so
gläntzlig abgloffe wie mir erhofft hend. Nochdem Tina de Grenzbeamte het müäsä
us sim Bettli schreie, isch sini Luune nüm di Best gsi (10 Minute ad Türe
chlopfe het nünt gnützt, do isch Tina halt id Wohnig zumen wecke)
De Beamte het üs wele ä Buäss
geh, will mir ka Autoversicherig hend.
Noch 2 Stund hemmern denn wele
mit Bier bestächä, aber irgändwänn hätter au ohni irgendwas locker loh und mir
hend chönä uf Bolivie iä reisä.
Paraguay hät üs sehr guät
gfalle, leider hend mir viel zwänig vode iiheimische mitübercho, da mir nu
immer be Uswanderer uf Bsuäch gsi sind.
Bolivie
Üsen Boudi isch zwor noch
sinere Operation viel besser gloffe, hät aber au dopplet so luut tönt wie
vorher. Mir hend den halt eifach dMusik lüüter gschruubet und dFenster zuä
gmacht.
Da mir bis jetzt no kei
Strossesperrene gha hend in Bolivie, hend mir sehnsüchtig druf gwartet, dass üs
genau jetzt womer under Ziitdruck stönd, dStross sperred. Natürli ischs den au
so gsi. Ganzi 7 Stund hend diä liäbä Bolivianer dStross gsperrt bis ändli eine
vom Staat cho isch und de Vertrag brocht hät für da wos gforderet hend. Sisch
eigentli no ganz intressant gsi, de Lüüt zuäzluägä und chli plaudere. Üsserst
intressant isch au gsi, dass nid öppert reklamiert het vo allne wo hend müäsä
warte. Noch guätä 3 Täg sind mir den wieder uf Chrigi und Kölbi gstosse in
Sucre. E super schöni Stadt, aber so viel häts au nid geh zum aluägä. Mir sind
denn wiiters richtig Potosi gfahre, wo dChrigi und de Marco dMine gange sind go
aluägä. De Kölbi und Tina hend über di guätä alte Ziite in Aroso pläuderlet, da
Sie beidi Platzangst hend. Bevor
mir aber uf Potosi cho sind, hend mir zersch no müäsä 2 Strosseblockade
umfahre. Und das isch gar nid so eifach gsi... Aber das hend mir trotz em
versägä vom Kuppligszylinder au no gschafft.
Laguune Rute
Die lang ersehnti Lagune Rute
isch endli vor üs gstande. Die erst Nacht hend mir in Uyuni ufeme alte Locki
Friedhof gschlofe. Mir hend ä super Ambiente gnosse. Und denn ischs endli los
gange. Ab uf de Salar de Uyuni. Tina hät sich am Morge no chlei schigg
gmacht.... und das nid für nünt wie zersch erwartet.....denn uf em Salar isch än
Event gsi vom Dakar Rännä wo nögst Johr dur Bolivie fahrt. Die Fotografe hend
üs entdeckt und denn ischs scho los gange mit Fotoshooting und Interview.
dChrigi hät gschwätzt und mir hend posed. Wiiter ischs gange mit Fotoshootings
uf em Salar. Hät super guäti Fotos geh. Au die Nacht hends mir mol wieder super
guät troffe bimne Fondue überem Füür uf de Insle bem Salar. Abgseh vom
iiiiissschalte Wind hemmers guät gha.
Die Tage sind vergange wie im
Flug. Mir hend super Landschafte gseh. DBerge/Vulkän händ usgseh, als wäräds
gmolet mit ganz viel verschiedene Farbe. Eifach irsinnig. Jede Tag hend mir
super guäti Schlofplätz gfunde und dChrigi hät üs immer super fein bechocht.
Am letschte Obed hemmer sogar
no chönä id Thermalquällä go üs erhole. Shät alläs super guät passt und das uf
über 4000 MüM. Aber einisch isch au diä Rute verbii und mir hend Bolivie wieder
müäsä tschau sägä.
Chile – äs sicherste Land in
Südamerika
In San Pedro de Atacama hend
mir üs dem mol wieder müäsä verabschiede vo ChrigiKölbi. 4 Täg spöter isch der
Tag der Tage wo de Erhard und dChrista achömäd in Santiago. Also sind mir die
1900 KM dur de norde vo Chile gfräsäd und hend die Landschaft a üs verbii ziä
loh. Aber so schlimm wie alli verzelled isch äs gar nid gsi. Im Gegeteil, üs
häts eigentli sehr guät gfalle. Nid öppis zum länger bliibe, aber schön isch
dennoch gsi.