San Francisco und üsen Boudi

Letscht Wuchä hend mir üs 2 super Mechä mol 2 Täg erholig gönnt. Mir sind mit Sack und Pack uf San Francisco gfahre und hend üs diä schön Stadt mol under dLupe gno.

De Marco isch jo scho 2 mol in SF gsi und het i de Tina e super guäti Stadtführig geh.

Tina weiss jetzt au, dass diä Stadt uf 3 grosse und 40 chline hügel baue isch. Bekannt sind dCablecars und die Bluemestross (wo mir natürli au abegfätzäd sind wiä jede Tourist) und sPier39 mit de süässä und zümftig stinkende Seehünd. Au no intressant isch, dass es do sehr viel Homosexuelli Mänschä hät. Nid zvergässä isch jedoch di schönst Brugg vode Erde: dGolden Gate Bridge.

Eigentli hemmer no wele e gführti Tour ufd Insle Alcatraz machä, aber leider het üs es Geld denn doch zfest greut. Mir hend üs die wichtigste Infos vo dem Gfängis und de Bekannte Insasse aber no us em Internet gholt.

Da mir üs ka Motel hend welä leiste (mir sind jo Rappespalter) und doch nid hend welä mit de Penner zämä dWise teile, hemmer üs es Schlofplätzli e halb Stund usserhalb vo San Francisco gsuächt. Mir hends üs grad bequem gmacht und de Marco isch scho am Schöfli zelle gsi, do het de Security vo dem Parkplatz fräch a üses Fensterli klopfed. Tina hät den au fräch vo obä abe gflüstered. Hey hey mir sind do obe... J De lieb Secrity het üs den wiitergschickt zum nögste Walmart wo 24 Stunde offe het. Dört dörfed mir übernachte.... Also hemmer üses Dachzelt wieder abäkurblät und sind wiitersdüsed richtig 24h Walmart. sDach wieder ufäkurblät und ändli hemmer chönä üsi Äugli zuämachä. 2 Stund spöter, am 3i am Morge hets grausam luut tönt vorusse. Tina het den mol ä Aug usägworfe und bemerkt, dass mir direkt vor de Logistik parked hend. Sisch denn no bis am 7i so wiitersgange.... Ein Lastwage an andere isch anegfahre... Und us em schönsheitsschlof isch nünt worde. Nocheme Kafi simmer und eme Shopping-Tüürli i üsem liäblingslade (Walmart) hemmer üs den wieder uf de Weg gmacht richtig Städtli Sind no diiis und daaas go aluägä und gege Obäd wieder heimä uf Sonoma gfahre.

In Sonoma acho hemmer üs en schönä Obäd gmacht. Am nögste Tag ischs schowider los gange mit mechä und und und.... Mittlerwiile gseht üsäs Duplex Huus also scho sehr sehr luxuriös us.

Wil de Gary leider no immer ka Ziit gfunde het zum üsen Boudi üsserlich zverschönere hemmer (also de Marco) üs sälber as Werk gmacht. De Marco, au bekannt als Macgyver und sini Assistentin dHeidi (vom Tim Taylor) hend sich täglich sälber übertroffe.

Als ersts isch de lang ersehnti 190 Liter Tank gflieferet worde. Und schwups di bups isch de au am Auto agmacht gsi.... als guät.... so schnäll isch das au nid gange. Zersch isch em Macgyver äs Malööör passiert. E Schruuube isch em abbroche.... aber nochdem er sich göttsjämmerlich ufgregt het ( will imne Macgyver passiert das jo niiiid) isch de Gary den cho und het gholfe... dHeidi isch beschäftiget gsi mit ihrem neue Buäch wosi in San Francisco kauft het. Sie het sichs bequem gmacht i Ihrem Stuähl i de Sunne. Also ab und zuä hät si Ihräs Arsch au bewegt...(sältä)... Aber wos den drum gange isch de Tank am Boudi zbefestige isch sHeidi natürli mit Ach und Krach au däbii und gsi und hät Bluät gschitzt.... Also liächt isch de Tank dän scho nid gsi!

Aber finally wem ade it! Wow
 

Noch dene 2 Täg Tank ufämachä, hemmer üs (also äbä de Marco) as Batterie System gmacht. Haiaiai... de Marco isch den en super Elektriker! De hät das rack zack gmacht. Und damol isch das also würkli am Schnürli gloffe... Guät... also ein Churzschluss het geh, aber das isch nid wiiters schlimm gsi... SNavi hät den eifach de Geist ufgeh will dSicherig kaputt gange isch, aber au das hemmer den irgenwiä wider anäbecho J

Ab hüt hemmer jetzt au en Technikruuum J

 

Irgendwenn het den Tina mol wider kriiise gschobä wil Sie überhaupt ka Bock me gha hät zum Heidi spiele.... Aber de Marco hät sich super liäb ums ärmste Tindli uf de Welt kümmeret J Und e Stund spöter isch den au alles scho wieder guät gsi.

********

zum Thema Kriiise: Natürli chunnt dTina de Koller über wenn Sie scho sit über 2 Wuchä am gliiche Ort isch wome am Tag mol 30 Grad het und e Stund spöter wieder mo dWinterjacke alegge. Däzuä häts jo mol gheisse das mirs innerhalb vo 2 Wuchä schaffed zum wiiters fahre. Punkt

********

Als nögsts isch d Stossstange (Bull Bar) glieferet worde und de Marco het sie sofort müäsä anämachä! Will diä Stange aber so abartig schwer isch, hetter die starch Heidi däfür brucht. Hüt isch dHeidi sehr viel in Isatz cho. Und nid nur als Assistentin wo super guät uusgseht, sondern als Schruuuberin. Jedi no so versteckti Schruuube het diä iäbroch und mit so richtig viel Speuz aaazoge.  dSeilwinde isch de grad au no so en Seich gsi zum befestige. Denn hend mol wieder es paar Schruube nid gstumme und so wiiters.... Puh isch das es Theater gsi.

 

Dtina het immer mol wider a Ihrere Chuchi umägschruubet. Und doch, ich mo sägä, es chunnt langsam.

Da de Gary no immer ka Ziit gha hät für üs, hetter gmeint mir söläd doch mol selber chli afange mit em Service. Gesagt getan. Mir hend den mol aagfange so tuä als chömäd mir druus und hend mol paar schruuube glöst. Serste wa do fürä cho isch im Luftfilter isch e Rattenest. E Ratte het i üsem Boudi ghuset. Häjo mir hend den mol de Vergaser wäggmacht und denn dSmogpipe. Den hemmer de Chrümmer no abgschruubet (und wani susch no so vergässä han). Wäred äm schaffe sind ettlichi Sachä kaputt gange....

De Macgyver isch dä Tränä nööch gsi.... Eis ums ander isch id Brüch gange und shät und hät eifach nid welä ufhöre...

 

S Null plus Ultra isch doch gsi wo im Marco e Muätärä uf sis Gebrüll gheit und underem Auto und grad sGlas broche isch... Armä Brüllchäfer.. :) Tina hät sich zämä gno und nid glachäd.... isch jo eigentli au truurig gsi, aber innerlich hät sie den halt doch no chli müäsä lachä J

Nochdem alläs usänand gsi isch unds de Gary kontrolliert het , hemmers irgendwiä wider zämägschruubet. Hoffentlich stimmt au alläs ...

Momentan simmer grad no am uf de Gary warte wo dSmogpipe no sött revidiere und bringe, wils do ka neui meh git. In Zwüschedziit simmer grad am Baumnüss sammle. De Chip und de Chap (üsi Eichörndli) luägäd üs aber amig mit ganz bösä Blicke aa wil mir Ihren Winterschloof-Voorrot stähläd... Aber mir hend äxtra no en Goobetämpel gmacht mit es paar Nüss. So mömmer nid so ä schlächts Gwüsse ha:)

 

******

De Marco isch momentan nid so än Glückspilz.... A eim Tag isch er vom Zelt obä abä gheit und denn hetter bim Tank dschruube abbroche (wiä scho gschribe), öppe 20 mol de Chopf aagschlage und bim zNacht het het er versehentlich zfest uf Gablä bisse und sisch em grad es Stückli Zah abbroche.... Hauuuuuu de aaaaarm Marcooooo

******

in Sonoma am mechä

Mir sind jetzt scho sit 5 Täg in Sonoma. Es gfallt üs sehr guät do. SFählt üs a nünt. Sisch genau so wiä mir üs das vorgstellt hend oder sogar no besser. Mir wohnäd bemne Automech im Hof und chönd dä Tag duur i sinere Garage schaffe. De Gerry (Mech) chunnt jede Obed go luägä wiä wiit mir scho cho sind und seit was mir für Fortschritt gmacht hend... Ehrlich gseit sind mir aber nonig würkli wiit cho. Di erste 2 Täg hemmer üs iiideckt mit Holz, Schruube etc. und hend mol Plän gmacht. Am 3tä Täg hemmer üsi Plän aber wieder über de Huufe gworfe und anderi Plän gmacht und momentan simmer eigentli rächt zfriede. Sgit täglich mol wieder Änderige, aber eigentli stoht Grundidee und so. Momentan hani sgfühl ischs sogar so richtig definitiv, aber das hani scho paar mol äs Gfühl gha J

 



De Tagesablauf be üs gsieht öppä wiä folgt us. De Güggel näbäd üs fangt so am 4i aa mit umächreie. Am 6i machäd mir serste mol dAuge uf und reged üs gottserbärmlich über da dumm Fiiiich uf und würded dem am liäbste de Grind abhäckä. Am 7i hemmer de Güggel so was vo uf de Latte das mir ufstönd und da Fäderfiiich so richtig zämä schiessed. Nützt aber nünt. Leider chan vo üs 2 niämert Güggelisch, susch hetted mir ihm uf sini Sproch gseit das er üs dermasse ufregt. Wäräddäm dTina es Zelt wieder iipackt, tuät de Marco sini Gäns fuätäre. Mir hend do uf üsem Camping 3 Gäns womor vo Tag zu Tag a besseri Beziägig ufbaued. Also besser gseit de Marco... dTina wird immer usägmobbt us dem Trüppli. Sie wird nu immer böös aagfaucht vo dene. Häjo segs wiäs well noch am zmörgele fahred mir die 50 Meter id Garage und fanged aa irgendöppis zmachä.... ich weiss amig au nid genau was mir machäd. Aber hauptsach isch, dass de Marco das weiss. Wiä ich aber usägfunde han, weiss er amig au nid genau was er macht. Janu... Er probierts mir immer schön brav zerchlärä wiä mir wiitersfahred, aber ich chan amigs eifach nid genau folge. Ich bin ehrlich gseit au nid grad di hellscht. Vorallem wäns um Autos goht. Aber han au gmerkt das ich mit de Wechzüüg nid drus chum. Schrubeschlüssel weiss grad no was isch... alles wiitere isch totals Neuland für mich.

Zum Zmittag gits den meistens e super Moolziiit ala Tina. Und nochane gohts den au grad wider wiiters mit schaffe. Zwüsched 6i und 9i höred mir den uf mit chrampfe.... und Tina choched oder grillt wieder öppis ala Tina.

*****

Do wett ich no erwähnä, dass Tina ä super Chöchin worde isch. Und no intressanter isch: Ihre macht das alles au Spass J

*****

Wils ab em 7i scho dunkel isch, wird’s am Obed nümm so spannend. Es Bierli, 2 oder 3 und denn gohts den eigentli ab in 2. Stock vo üserem Duplex Hüsli.

Ufbruch id Unabhängigkeit

Sorry das Ihr so lang uf de nögst Blog hend müäsä warte... mir hend leider kei Internet gha....

Noch üsem super Chauf, hemmer üs uf dä Wäg richtig Santa Cruz gmacht. De Komfort isch ab sofort nümme so gsi wiä vorher, aber das isch üs egal gsi... ab und zuä hets komisch tönt us em Motor und je noch däm häts dä Motor au eifach mol wieder abgstellt... Wilmor au nonig so genau gwüsst hend wiä viel üsen Kolleg suft uf de Meter hemmer churz mol angst gha, das mir ane Tankstell müänd laufä.....Sisch doch scho öppe 10i am Obed gsi wos immer komischer tönt hät.... und dTina het sich schomol druf ii gstellt zum ihri running shoes azlege und paar Kilometer zrenne.... Mir hend den aber üsem Auto de Name Boudy (wie Bode Miller) geh und hend en immer wieder agfüüüred mit go go boudy!!! Und er hets gschafft bis zu de nögste Tankstell. De Boudy isch de besti! Mir sind schampar stolz gsi uf üses stinkende Gfährt. Erliächtered simmer den wiiter gfahre um üs es Schlofplätzli zsuächä. Irgendwo ide Pampas hemmer den au ä schöns Plätzli gfunde mit Usblick ufs Meer. Üsi erst Nacht im Boudy isch zwor nid so bequem gsi wiä im gmiätäte Dodge, aber für de Afang hets gstumme J

 

Mir sind den no chli wiiters gfahre richtig Santa Cruz, hend aber no en halt be dä Seeleue gmacht und denn no in Monterey. Nid zvergässä isch d Rennstrecki LAGUNA SECA

De Marco isch stolz gsi wiä ä Znünibrot das er jetzt au mol do gsi isch J Hetted sin Smile sölä gseh J

 

 

Irgendwenn am Obed simmer den doch no in Santa Cruz acho und sind no chli ide Stadt umänand gschliche. Mir sind aber beide ziemli müäd gsi und hend den bald mol ä Schlofplätzli gsuächt ufeme schöne Parkplatz bim Iichaufzenter. Zmitzt ide Nacht chlopfed eine wiä wild a üses Fänster. En härz aller liäbstä Security wo üs ufs Nachtparkverbot hiiigwisä hät. Schnurstracks isch de Marco ufgstande und het üs uf en andere Parkplatz verfrachted. Uf em wäg dört anä isch no än viel liäbere härzallerliäbstä Polizist cho und het üs welä hälfä bim Schlofplätzli suächä.

******

No schnäll zur Info: Tina hät sich schön brav im Schlofsack verchrochä das dä Polizist nid merkt das Sie nid aagurted isch, de Marco het aber immer ide WIR-Form gred mit em Bulle... Als entweder het de Polizist eifach nid wele gseh das Tina no hinne inne liit, oder denn hettor gmeint de Marco hät ä imaginäri Fründin..... J

******

am nögste Morge hemmer üs mit eme Dachzeltvertretter troffe... Eigentli hemmer jo e Zelt  wele, aber das hetter üs den ziemli schnell ustriebe. Mir hend üs den churzerhand für die tüürer Variante entschiede. Au e Zelt, aber eis zum Uffahre. Ganz e herzigs.

Also hemmer üs uf de Weg gmacht richtig Sonoma, wo das Dachzelt-Lager isch. Uf em Wäg hemmer aber no än Stop igleit bemnä Toyota Spezialist. Also so ä Puff wiä dä die Garage und rundume gha het, gits nid viel. Nochdem mir alles besproche hend was mir mache wend mit Priis und so, hettor üs imformiert, dass er imne Monät Ziit het zum das alläs machä....Enttüscht über diä lang Warteziit simmer denn wiiiters gfahre in NORDE.

******

Also so vo wägä viel Arbät.... üs isch niä öppert ufgfalle wo gschaffed het. Entweder hends grad alli Pause gha, oder denn sinds nid die schnellste... nid nur i dere Garage. Im allgemeine. Au Poliziste.... Sie hend minimum 1h Znünipause do, so wiäs üs dunkt.

*******

Nochore super schönä Nacht zwüsched Meer und Wald simmer wittergfahre zu üsem Dachzelt. Womor acho sind, hemmer sogar no bemerkt, das dä Dachzelt-Fritze en Toyota Spezialist isch und sind chli nöcher is Gspröch cho. De Gary isch än sehr aagneeme und liäbänswärte Mänsch... Är hät üs au grad abote be ihm im Gärtnli zhuuuse. Ganz liäb... Mir sind den aber zersch no 2 Täg uf Santa Rosa go shoppe gange... Stindli hät än Kochherd und e Gaslampe übercho und den Marco däfür en Film zum dSchiibe tööne.... Aber no wichtiger... Mir hend jetzt ä Solar-Camp-Duschi.... Noch 6 Täg hät sich Tina & dä Marco ändli mol wieder chönä wäschä. Nid das mir gstunkä hönd oder so.. Nei nei, sisch eifach nu erfrischend gsi.

 

So de jetzig Stand isch, dass mir worschindli di nögste 2 Wuche in Sonoma verbringä wärdäd uns chli üsäs Hüsli iirichted. Vilicht gohts au no chli länger, aber mir hend jo Ziit.

Auto registriire und sustigi Problem

Frisch und fröhlich sind mir mit de Papier uf dFahrzüügkontrolle und hends Auto welä iilööse... aber äbä leider „ nu welä“. Will sAuto die letschte 90 Täg kann Abgastest gmacht het, hemmer de no müäsä nohrhole. Janu hemmer gmeint und sind idi nögst Garage de Abgostest go machä.... Wil mir jo sowiso e guäti Stund hend müäsä ufs Resultat warte, simmer öppis go habbere. Wo mit retour cho sind hemmer di bös Überraschig becho: Toyota did not pass the smog test... Huiuiuiiii noch langem überlege hemmer den gseit das mir üüses Autöli be dere Garage flicke lönd was alles bruucht zum de Abgastest zbestoh... Glatti 700 Dollar hät üs dä Gspass kostet... Aber ein Tag spöter hemmer den äs positive Resultat becho das üses Baby dur de Abgastest durecho isch. Jetzt hemmer en neue Katalisator und äs durchlöcherete Uspuffrohr hends au no grad ersetzt.

Am nögste Morge simmer grad als erst ufd Fahrzüügkontrolle go dPapier abhole und en Grill go chaufe das mir nümm idiä Fastfood Lädä müänd J

Versicherig

Vorbildlich hemmer no ä Versicherig welä abschlüsse. Aber das isch nid so eifach wiämä dänkt. Nu scho bis mir ä Versicherig gfunde hend wo Usländer ufnimmt ohni Kalifornische Fahrerschii.... ojeeee.... ä Versicherig hemmer den aber gfunde noch langem Suächä... es nögste Problem isch den aber gsi, das mir jo nid agmolde sind in Kalifornie.... kei Postadresse hend.... DTina het i de Zwüschedziit scho graui Hoor übercho, wo im Marco notzment dIdee cho isch dAdresse vo üsem neue beste Fründ Rick(womor vor paar Täääg bem Fiirobedbier kenne glernt hend) azgeh. Das het den au super guät klapped und mir hend dVersicherig chönä abschlüsse... Sind aber den nomol öppä anderhalb Stund vergange bis mir dPapier übercho hönd, wil die liäb Lady Problem gha het mit ihrem Compi...

Am Mittwuch am viertel vor eins, sind mir den mit 2 Autos richtig Los Angeles abägfahre und hend de Minivan wieder abgeh und sganz Auto umgruumt.
 

Ab sofort läbäd mir jetzt i üsäm neue Baby und sind gspannt was für Abentüür mir alles mit ihm erläbä wärdäd.