Otavalo
Als ersts sind mir in Otavalo
glandet wo mir de Samstig Märit bsuächt hend. Der frühe Vogel fängt den Wurm,
also sind mir bereits scho am 6i uf dä Tiermärit. Schampar iidrücklich gsi! Scho
vo wiitem hät mä de Gstank gschmöckt und äs gequitsche vode Säuli isch au scho
lang zghöre gsi. Und ändli hend mir de Märkt gfunde. Zersch de Handel mit de
grosse Tier wie Stier, Chuäh, Rösser und hinnedra alles chlinere. Vo Meersäuli
über Gäns zude Schoof und natürli äbä au die quitschende Säue. Alles i jedere
Altersstufe. Tina hät mä fasch nüm wäg brocht vode junge Hündli, aber dChärzli
sind au ganz schnüggig gsi. Zum Schluss vodem super Start in Morge hemmer grad
no was gässä amne Stand. Shät Spanferkel geh mit irgendwelcher Biilag (mir hend
leider ka Ahnig was es gsi isch) und natürli hets au no Chicharon geh
(Schweinehaut). Mmmm isch das fein gsi am morge am 8ti. Mir sind den no wiiters
uf de richtig Märit, aber überall ischs gliiche aaztröffe gsi und drum simmer
ziemli zügig duregloffe.
Cuicocha Kraterlagune
|
Fiesta del Sol |
Da mir ab jetzt sportlich wend
werde, hemmer üs e liächti Wanderrute usgsuäch. En Rundweg um dKraterlagune
Cuicocha. Mir hend üsi Könner-Wanderstöck us em Versteck zoge, hend gnuäg
Wasser iipackt und los ischs gange. Natürli hät dä Marco mol wieder sin Huät
vergässä und dTina hät ihm ihren gopfered und sich mit em Schal als Fatima
vermummt. dSunne het tierisch uf üsi Chöpf druckt aber denk em Wind ischs e
perfekti Wärmi gsi. Es isch ä wunderschöni Wanderig gsi, aber für üs doch
ziemli aasträngend. Also mit Chind oder Opis würded mir da nid empfehle. Da mir
schneller gsi sind als erwarted, simmer noch em „Spatziergang“ grad no schnell
is Lederstädtli Cotacachi. Dört sötts die schönste Läderartikel geh. Mir hend
aber genau de Mäntig usgsuächt wo alli Lädä gschlosse gha händ. sGanze Städtli
und Umgäbig hät Fiesta del Sol gfiiired. Alli Indigene Völker bildet je e
eigeni Gruppe und den wird gsoffe und umätanzed bis zum umkippe. Mome umbädingt
mol gseh ha.
Cayambe
|
Cayambe |
Üsen erste Vulkan womor go
bsuächä sind, isch de Cayambe gsi. Bis uf 4800 MüM hemmer chönä ufäfahre. Sisch
ganz und gar nid di best Stross gsi. De Boudi hät rächt zkämpfe gha und hät
Most gsoffe wiä blöd. Aber sisch ä riesigs Abendtüür gsi duruf. Und womor dobä
acho sind hemmer traumhaft schöns Wätter gha. De Tina ischs leider nöd allzu
guät gange, so dass de Marco älei zum Glätscher gschlenderet isch. sTini hät
sich liäber ide Sunne ihrere Lismete gwidmet. Eigentli hemmer vor gha bide
Refugio Hütte obe zpfuse, aber will Tina immer meh Chopfweh übercho hät,
hemmers den doch bliibe loh und sind uf 4200 MüM abegfahre und hend dört bide
Chüäh pfused
womor ä super Ussicht gnosse hend. Nochere ziemli chalte Nacht be
ca. -4 Grad hemmer 2 Adlerartigi Fiicher atroffe wo üsi Fuule Eier gfrässä
hend. Ziemlichs Spektakel gsi.
Fuya Fuya
|
üsen Hobbyfischer |
Will mir jo ändli sportlich
worde sind, hemmer als nögsts grad no de Fuya Fuya in Agriff gno wo 4263MüM
hoch isch. Leider ischs ziemli näblig gsi und drum hemmer nid allzu viel gseh,
aber dWanderig isch sehr schön aber steil gsi. Mir hend den au no dört pfusäd
und wills ka Brennholz ide Nöchi gha het, hemmer zersch no müäsä ä halb Stund
de Berg ufächraxle und inkl. 2 verdüürete Bäum wieder abstiege. Isch nid ganz
eifach gsi, aber uu lustig.
Quito
Beate sei Dank, hend mir e
super tolls Hostal in Quito gfunde für nur 7 Dollar ide Nacht für üs beidi
zämä. Günstiger wär nüm gange. Obwohl dBeate am chränkälä gsi isch, hät Sie mir
üs än Stadtrundgang gmacht. Mir müänd aber sägä, dass die Stadt üs total entüüscht
hät. Shät zwor paar schöni Gebäude und Plätz, aber überhaupt kan Woow Effekt.
Drum sind mir au no 2 Täg schowieder wiiters richtig Mindo gfahre. Dasmol hend
mir dBeate wieder mitgnoh. In Mindo hend mir ä super tolls Schlofplätzli direkt
am Fluss gfunde und hend am nögste Tag au no ä Wanderig gmacht. Leider hät üs
Mindo au nid allzu sehr zuägseit wie erhofft.
|
3 wartendi Wanderer |
Cotopaxi
|
Cotopaxi |
Da mir nid us dä Üäbig hend
wele cho, simmer den au grad richtig Cotopaxi gfahre. Zersch hemmer üs aber
dWanderig uf de Ruminahui 4722 MüM wele atuä. Anschiiinend e Wanderig wo meh
als aastrengend söll siii. Da mir 3 Stund vergebens noch em Weg gsuächt hend,
chönd mir das nid beurteile. Üsi Wanderig isch aber au sehr schön gsi. Mir hend
e Üle, e Monster Meersau und ä Alpakaändlichs Reh gseh. Am Obed hend mir den
dBeate im nochglägänä Secret Garden Hostal abgliefered und hend dört no zNacht
gässä bevor mir wieder ab id Wildnis sind. Am nägste Morge simmer uf 5008 Meter
uä gloffe bim Cotopaxi. E sagehafts Erlebnis gsi, aber die Gletscherschmilzi
isch scho ziemli tragisch zum aluägä. Uf de Mittag sind mir den zrugg zude
Beate. Und will mir gfunde hend dass mir e Erholig verdiänt hend, simmer grad
no in Wirlpool vom Hostal gsprunge und hend chli gschmarotzered. Chli isch
guät, mir sind ganzi 4 Stund i dere heisse Pfanne ghocked und sind fasch
iigange... aber schön ischs gsi! Mir hend den am Obed grad nomol dört zNacht
gässä und sind denn wiiters.
Erstes kommt es anders und
zweitens als man denkt.
|
Erdrutsch wo 4 Menschelebe gforderet het |
Für üsi nögst Wanderig hend
mir dQuilotoa Lagune usgsuächt, aber wo mir dört acho sind, hemmers üs andersch
entschiede. dBeate isch no immer ziemli agschlage gsi und de Marco häts mol wieder
chli mit em Mage gha. Naja und da die Tina nid älei hät wele 6 Stund rundumä
laufe, hemmer eifach chli dLandschaft gnosse und sind denn wiiters richtig
Küste gfahre. Wills de Tina immer mol wieder chli schlächt worde isch bem
fahre, hät Sie churzerhand e Stüürad übernoh. Im Marco ischs den aber plötzli
nümm so wohl gsi und dBeate häts au nümm so zum lachä gfunde. Naja, denn hät
halt de Marco wieder sLänkrad id Hand gno und alli sind wieder glücklich
gsi....Noch guät 2 Stund durabfahre sind mir den gstoppt worde dur en riese
Erdrutsch. Meh hät üs jo scho informiert dass in Esperanza dStrosse gsperrt
hend, aber mir hend das Dorf nirgens uf üsere Charte gfunde, also hemmer gmeint
mir fahred au nid dört dure. Tja!
Naja mir hend denn müäsä üsen Plan ändere uns sind alläs wieder retour
gfahre und denn zum Chimborazo.
Chimborazo
Dä höchsti Vulkan vo Ecuador
mit 6310 MüM händ natürli au mir müäsä bestigä ha. Mir sind au do bis uf 5000 MüM
ufäkroche. Au wenns numä 900 Meter bis zur 2. Refugio Hütte gsi sind und nu
grad 150 Höhemeter, so hemmer doch ziemli zkämpfä gha! De Wind hät üs gröber
zuägsetzt und paar mol simmer fasch devo gfloge.
|
Vikunas vor em Chimbnorazo |
I dere Region hämmer den au
serst mol Vicunas gseh. Dass sind chlini Lamas und zuckersüäss. Mir hend üses
Schlofplätzli natürli direkt irgendwo be dere Tierli ufgschlage womor am Obed
au no ä Füürli gmacht hend. Sisch bitter chalt worde ide Nacht und alli hend
gfrohre. dBeate hät scho gar nid us äm Boudi wele usächo. dTina hät den no än
läckere Milchriis mit Öpfelstückli köcherlet uf em Füür und zum Schluss isch üs
no de Stuähl vom Marco is Füür gheit und shät ä riesigi Flamme geh. Beate hät
somit bemerkt, dass es jetzt nur no 2 Stühl hät und Sie nümm länger willkomme
isch i üsem Kreis :)
(Mir hend mittlerwiile aber
wieder än neue Beate, bisch also wieder willkomme)
Noch dere ziemli chalte Nacht
be ca -8 Grad simmer den no ä Bsuächli go machä im Dorf Salinas und hend ä
köstlichs Fondue gässä. Das Dorf hät dank Schwiizer Hilf s Chäsä und äs
Schoggimachä glärnt und isch somit sehr beliäbt be reisende. Mir hend üs den
grad no mit anderhalb Kilo Chäs und chli Schoggi iideckt.
Da mir jo jetzt kann Stuähl
meh gha hend für dBeate, hemmer die in Cuenca wohl oder übel müäsä an
Strosserand stelle. Mir sind üs aber ziemlich sicher, dass mir Sie wieder
werded aatröffe, da Sie die gliichg Rute vor het wie mir.
Noch dem mir ziemli gnuäg gha
hend vode Chälti, hemmer üs uf de Wäg richtig Strand gmacht. dVögel hend üs
zwor zwitschered, dass es dört schlächts Wätter sött siii, aber dWalsaison hät
jetzt agfange und so ä Tour hend mir üs nid wele entgoh loh. Mir hend dutzendi
vo Buckelwal gse und äs isch atemberaubend gsi. Mir würded so öppis aber nümm
machä. Mir sind 3 Stund lang dene Tier hinnenohr düüsed und mit üs no 3 anderi
vollgstopfi Boot. Sisch würkli nüm schön gsi! So öppis cha eifach nid gsund sii
für die Wal. Wichtig däzuä isch au no, Tina hät jetzt würkli richtig erkannt
dass Sie sehr schnell Seechrank wird. Die Arm hät meh wiä chriidewiis usgseh!
Mir sind den de Küste lang
abwärts gfahre und churz vor de Peruanische Grenze hemmer gmerkt, dass mir doch
no en Abstächer wend machä is härzige Dörfli Vilcabamba, womor scho soo viel
schöns ghört hend. Und dUmgebig dört isch würkli schön.... wär nur nid de blöd
Wind. Sisch zwor nid chalt gsi, aber de Wind isch ziemli eklig gsi. Zwor isch
üsi Wösch in Nullkomanix troche gsi, aber das isch de einzig Vorteil gsi.
Noch nur eim Tag hend mir üs
den würkli Richtig Grenze gmacht. De Wäg bis noch Zumba isch e reinsti
Schlammschlacht gsi mit es paar Hindernis. Aber au mir hends no gschafft.
Zämäfassig:
Ecuador hät us super guät
gfalle. Mir hend meistens guäts Wätter gha und hend die wichtige 3 Vulkän ohni
Nebel super gseh. dLüüt do sind nid so kontaktfreudig wiä in Kolumbie, aber
sind au sehr fründlich.
Üs hät vor allem dRegion bem
Fuya Fuya sehr guät gfalle und de Cayambe isch für üs de mit abstand
beiidruckendst Vulkan gsi.
|
ändli hät de Marco mol öppert dörfe us em Dreck riiissse |
|
es Ritual "Schrumpfchöpf" |
|
De Marco mit em Marco (Lama) |
|
De Marco hät äs Schööfli gretted wo de Hang abgrutscht isch |
|
Erfinderisch muä me siii |
|
Cayambe by night |
|
ä neui Chappe für 3 Dollar |
|
mir sind bereit für de Schneeeeeee |