Seeägebiät und Carretera Austral

I de letschte paar Wuche, hend mir einiges an schöner Natur erläbt.

De Süde vo Chile isch eigentli wie dSchwiiz, eifach viel viel grösser! Shät wunderschöni Seeä und Flüss do, mir hends richtig gnosse die Landschaft zerkunde.... Nu irgendwie hend mir die Landschaft den au ziemli schnell mol gseh gha. Genau das hend mir jo eigentli au ide Schwiiz. Dezue isch au no cho, dass es vom Morge am 5i bis am Obed am 10 hell isch, und mir amig gar nid gwüsst hend was no astelle. Vorher sind mir jo immer scho zwüsched 7 und 8 is Bett.... Do chamä am 4i no ä 4 Stündigi Wanderig machä ohni Bedenke.

Afangs Carretera Austral im Pumalin Park hets den no agfange regne.

Und Rege sind mir üs eifach nid gwohnt. Mol än churze Guss, jo das scho, aber meh wiä ä paar Minute????

Natürli hend mir trotzdem ä chlini Wanderig gmacht, und wänns nur bizli tröpfläd isch das jo au nid schlimm. Sind jo ka Weicheier...

Kuchen isch au do gang und gäb.

Nochdem Tina uf stier gstellt het und ununderbroche s Oh du goldigs Sünneli gsunge het, isch de Sunne irgendwenn zblöd worde und het sich wieder blicke loh. Zum Glück! .....de Marco hät scho fasch än Ohrschade gha!!!

Au mir hend üs en Adventskalender gönnt.

was machä wäns rägnäd? En feine Schoggi Chuächä dänk

de Samichlaus isch au in Chile verbii cho, aber ohni Ruätä

Marmor Höhle

in Puerto Tranquillo hend mir ä Bootstour gmacht zude Marmor Höölä. Und äs hät sich würkli glohnt. Nid nur dHöölä, sondern au dFahrt uf em See isch wunderschön gsi

Erdbeeri go pflücke am Sandstrand

Bildunterschrift hinzufügen

de Marco hät sis beste geh bim fische.....ohni Erfolg

Ich wett ganz klar erwähne, dass üses Pech bim Fischä nid am Fischer sälber isch! Mir sind de Meinig, dass momentan dFisch grad ide Ferie sind. Chile hät jo bis im Februar Ferie, also isch klar, dass au dFisch zude Verwante gönd und ka Ziit hend zum be üs ad Angle zbissse.

Mir machäd würkli alles richtig!

Guanaco

Piedra del Indio

Ibis 

mir hend wieder müäsä goh, die Rindli sind richtig plooged worde vode Cowboys

Cowboys Spore

Mir chönd üs würkli nid beklage, dass es nid schön sött sii. äs isch atemberaubend schön! Und mir gnüssed das au :)

schwär am chrampfe.... oder so :)

jupiiii, bald isch Wiähnachte

au in Chile sind dOchse no am chrampfe

ä glunges Foti  

Theater in Frutillar

hoch begobti Lilly.... däzuä no äs Liädli trällerlä.... und plötzli isch sie ällei

Tina rännt über dBrugg, Höhenangst loht grüässä

Totrel hät ka Strosse sondern Steg

Carretera Austral wird vo allne Reisende als ä Highlight bezeichnet. "äs letschte grosse Abentüür" heissts uf vielne Bricht. Obwohl mir adä Natur würkli nünt uuszsetze hend, ischs für üs nümmä ä Abentüür gsi. Benzin häts fasch i jedem Dörfli geh und Nahrigsmittel sowiso. Lüüt häts überall gha und dEinsamkeit hät mä scho fasch müäsä suächä. Wos schön isch häts halt au Lüüt.

Mir hoffäd ihr hend alli super schöni Wiähnachte gha und wünsched eu än super guätä Start is neue Johr.
Vorsätz nämäd mir üs kani vor..... Iihalte dömmers sowiso nid.

Vom heisse Argentinie zum agnehme Chile

Nr 17, und es werded no meh folge

Üsen erst Halt noch Salta isch de Nationalpark el Rey gsi. De Ranger hät üs herzlich empfange und de Park genau erklärt. Nocheme churze Rägäguss sind mir am nögste Tag den butzmunter uf e 6 stündigi Wanderig gange. Noch guätä 20 Bäch womor überquert hend, hemmer üses Ziel erreicht. Än mikrige, unspektakulärä Wasserfall. dWanderig isch dennoch sehr schön gsi, obwohl mir am Obed jede um di 40 Holzböck gha hend. Am Obed sind mir iiglade worde vo äs paar Reisende vo Israel. Mir wüssed jetzt au, dass dJude au in Israel nid sehr beliäbt sind und no vieläs meh. Isch würkli intressant gsi vo dem Land chli meh zghöre wiä nu immer us de Ziitige.

wämä kei Kleider meh hät, wird Tina erfinderisch

Will mir scho bald uf Chile hend wele, sind mir ziemli zügig wieder zrugg uf Mendoza gfahre und den uf San Rafael. Da de Pass nonig offe gha het über dGrenze, hend mir no wiiters in Süde müäsä fahre.

bi dere Flussüberquerig hemmer fasch dCrocs verlohre

Bide Terme vo Sosneado hend mir üs eigentli ä heisses Bad wele gönne. Nu leider sind mir nid informiert worde, dass die Therme chalt sind. Janu, mir sind denn halt go wandere, anstatt go bädelä....

hiking Tina

Woody Woodbecker

Will üses Ziel am andere Ufer vom Fluss gsi isch, hend mir zersch müähsam äs paar Flüssli müäsä überquere.... Liächter gseit wiä gmacht! Di erste 2 chline Bächli hemmer no überstande ohni schreie, aber noch nu eim Schritt im grosse Fluss, hemmer beidi sofort wieder umkehrt. Es isch bitter chalt gsi und mir hend gschraue vor Schmärze! Naja, mir sind denn halt eifach zersch 2 Stund im Flusslauf nohr gloffe bevor mir nomol probiert hend über de Fluss zcho. Mir hend alle Muät zämä gno und hend üs dur dStrömig kämpft und fasch di neue Crocs verlohre. Mir hönd au damol guäti 20 chlineri und grösseri Bäch müäsä überquere bis mir am Ziel acho sind. Noch guätä 6 Stund sind 2 abkämpfti, halb verfrohreni Wanderer wieder retour cho und notzment sind die Therme plötzli doch äs biz warm gsi (im Vergliich zum Schmelzwasser) Nocheme feine Raclett hend mir den super guät chönä pfuse. Am Morge früäh hät niämert vo üs wele ufstoh. I de Nacht häts gschneit und sisch gruuusig chalt gsi. So hend mir üs entschlosse so schnell wiä möglich wider vo dem Bergli abäzfahre.

Chile hät üs den mit offene Arme empfange. dSunne hät gstrahled und dZöllner sind super fründlich gsi. I de Tina ihri Augä händ ändli wiedermol da funklä wiä scho lang nümmä. Noch wänige Minute het si scho gwüsst. DAS ISCH IHRES LAND.

am reläxä

Leider häts Glück mit de Sunne nid so lang aaghebäd. Scho ide erste Nacht häts agfange schneie und de Marco hät wieder uf Argentinie wele go schwitze.  Eigentli hend mir än 2 Tages Trek wele machä, aber bi dem Sch... Wätter gömmer liäber id Therme. Zelt wieder iipackt und wiiter ischs gange. Das bis jetzt leider no niämert gschafft het üsen Schiebewüscher zrepariere, hend mir wieder müäsä üsen handgschaltene Schiebewüsche installiere. Und wo mir den bide heisse Quelle acho sind, sind mir vor verschlossene Türe gstande. sLand isch ufkauft worde und dTherme sind nüm öffentlich. Janu, vo dem lönd mir üsi Luune nid verderbe.

kein Plan!

Holzfäller Marco

Mir hend de Boudi parkiert, hend de Sunne/Rege Store usgfahre und hend aagfange ä Füürli zmachä us em nassä Holz. Ä bizli Benzin hät üs gholfe bi üsem Plan. Am nögstä Tag sind mir den vo de Sunne gweckt worde. Strahlend blaue Himmer und kei einzigs Wölkli isch umä gsi, aber däfür ä wunderschöni Kulisse mit verschneite Berge. A dem Plätzli sind mir den au grad 3 Täg blibe. Am nögste Tag hets üs den aber trotzdem no zu heisse Quelle triebe. Damol hend mir meh Glück gha und än super lässä und entspannte Tag gnosse.

diä Tierli hend üs super gern, sie laufed üs gern hinnedrii

hoffnigslose Romantiker

Wiiters ischs au scho gange in Nationalpark Huerquehue. Mir hend e 4 Tages Wanderig gmacht mit em Zelt. sÄssä wo mir iipackt hend, hät gnau glanged. Obwohl Tina am erstä Tag sGfühlt gha hät sie wird uf Diät gsetzt. Im Marco sind Spruch isch mol wieder gsi: „Du muäsch nu ganz viel mol cheue, denn häsch bald ka hunger meh.“

Mit grossem Erfreue hend mir am nägste Tag gar ka grosse Muskelkater gha.

In Pucon hend mir den ä grosse sWiederseh mit Chrigi und Kölbi gfiired und grad no 2 wiiteri Päärli us Dütschland kenne glernt. Am Obed hemmer ä grosses Asado gmacht und Gschichte uustuusched.

Mir hend au Holz vor de Hütte

danke Erhard und Christa für de Zaubertrank

Hä jo scho klar!

härzlich willkomme

im Hafe vo Valparaiso

hmmm

Tina hät mol wieder än Fründ gfunde

Wie immer pünktlich uf dMinute hend mir dChrista und de Erhard empfange am Flughafe in Santiago. Als erst simmer grad Santiago go under dLupe neh. Nocheme churze verfahre mit de Metro, hemmer es Zentrum denn doch no gfunde. sVerlange noch Wy isch so gross gsi, dass mir scho am nögste Tag üsi Wy-Tour rund um Santiago umä gstartet hend. Mir sind über ganz schöni Rebberge gfahre und hend e Töpferdörfli bsuächt und natürli no es paar Wyytoure. Die erste paar Täg isch de Simon no mit üs mitcho mit sim Toyota, so hät Tina chönä mit ihm mitfahre und alli hend gnuäg Platz gha. Da de Simon au kei Wy trinkt, het Tina än neue beste Fründ gfunde. Gmeinsam hends vor em Wyyguät gwartet uf die andere 3 wo am degustiere gsi sind. In Valparaiso hend mir den e intressanti Bootstour gmacht im Hafe. Nocheme feine Hot Dog hemmer üs vom Simon verabschieded und sind wiiter richig Grenze zu Chile gfahre.

Im Hotel los Andes, in Los Andes hemmer üsen Bsäch denn icheckt und sind go grille gange. Womir zrugg bim Hotel no än Dessert gno hend, isch einä i üses Auto iibroche und hät Kamera, korrigierte Sonnebrülle und no vieles meh gstohle. Under anderem hättor au sHundefuätter gstohle. Noch dem Schock simmer grad ad Reception und hend de Polizei aglüte. Wo die cho sind, hends üs gar nid glaubt dass mir bechlaut worde sind. Sie hend gmeint mir hegeds verlohre. Und sowiso mached diä jetzt kei Büro uf nur will ä paar dummi Turis nid uf ihres zügs chönd ufpasse. Zum Glück hend mir de super süäss Receptionist uf üsere Siite gha wo üs gholfe het mit de Polizei zverhandle. Ganzi 2 Stunde und vielne Närvä spöter, isch Polizei den wieder abtrabed ohni dass mir en Bricht für dVersicherig gha hend.

Uf em Sicherheitsvideo hend mir den gseh dass so en chlini Chilen üs beraubt hend. De Video hät dPolizei aber gar nid würkli intressiert. De atemberaubend schön Receptionist hät üs den erklärt, dass halt au in Chile dPolizei und dDiäbä zämäschaffed.

Argentinie

dGrenze vo Chile noch Argentinie isch super guät gange. Mir hend zwor nid gwüsst dass me uf Argentinie au ka Frücht, Gmüäs, Honig etc. dörf iäführe, aber mir hend eifach no en Brunch gmacht während dem mir gwartet hend bis mir ad Reihe cho sind. Zöllner sind durchs Band dure super liäb, hilfsbereit und witzig gsi. Tina hät ä bizli gflirtet und de Marco hät bizli gwitzlet. De eint Zöllner hät gmeint de Marco chan unmöglich än Schwiizer sii, er seg doch sicher de Apu vo Pakistan (Simpsons Figur). Me muä au sägä dass de Marco sich scho sit längerem nüm rasiert het.

Natürli het au dWyystadt Mendoza uf üsere Reiserute nid dörfe fähle.

Chli usserhalb hend mir ä super schöns Holzhüttli gfunde zum nächtige. De Marco, dChrista und de Erhard hend vo dört us ä Wyytürli gmacht und Tina häts gnosse zum wiedermol ä chli Ziit für sich zha.

Wiiters ischs gange richtig Norde. Wie immer hend mirs bevorzugt, dHolperstross zneh. Sisch halt scho viel schöner wämä nid dSchnällstross nimmt und mir hend jo au Ziit. Hend immer wieder mol aghalte für Wydegustatione oder au für Fotoshootings.

Im Nationalpark El Leoncito, simmer den au no go dSternwarte go aluägä. Noch 2 Stund hemmer die Tour aber früähziitig wieder abbroche wils eifach zchalt worde isch.

De Nationalpark Talampaya het üs allne sehr guät gfalle. Mir hend ä 3 stündigi Tour miteme Expeditionsmobil buächäd und hend än super schöni Schlucht inspiziert.

Churz vor Santa Marta isch üs leider dBremsleitig kaputt gange und somit hät de Marco nur no mit Handbräms chönä brämsä oder mit abäschalte. Isch aber nid witers ä Problem gsi, da mir üs das jo gwöhnt sind dass dBrems ab und zuä mol verloht J

Cafayate het üs allne super guät gfalle. Ä härzigs subers Dörfli mit ganz viel Beizä im Zentrum. Au do het ä Wydegustation natürli nid dörfe fähle J. DChrista hät scho ä halbs Rüschli gha noch dene paar Wyytropfe.

In Molinos sind mir s fantastische Wyguät vom Hess go aluägä. Obwohl de Wyy üs nid so sehr gschmöckt het, isch die Tour die Besti gsi.

In Cachi hend mir uf eme chline Wyguät chönä pfusä. dChrista und de Erhard hend ä absolut genials Hüttli gha. Wohl mit Abstand die schönsti Underkunft i dene Ferie.

In Salta hend mir zersch de Erhard und dChrista im Hotel iicheckt und mir sind den uf de Campingplatz gange chli usserhalb vode Stadt. So hend die andere 2 intensiv chönä dStadt go erkunde und mir hend üs chönä um üsen Boudi kümmere.

Leider isch scho am zweite Tag mol wieder iibroche worde be üs, werend dem mir am Znachtesse gsi sind. Viel hends üs jo nümm chönä stähle. Aber sNavi, sneu Sackmesser sind wohl die schlimmste Sache gsi. De Dieb hät aber au no ä bruchti Underhose vom Tindli mitgoh loh, im Marco sini kaputtä Trekkinghose, die abglatschte Crocs, än Inneschlofsack, 2 Badtüeli, en Tisch und Stümpli. Wiiters schlimm isch natürli au gsi, dass mir ä neui Schiibe brucht hend. Natürli gits das Format in Argentinie nid und somit hemmer jetzt plexiglas.

Am Samstig sind mir den uf de Tren de las Nubes. De Marco und Tina hend äs Durchschnittsalter ziemli abäzoge. Isch ä nätti Fahrt gsi mit äm Zuug. Ganz ä schöni Landschaft. Mir hend die Landschaft jetzt aber scho ziemli viel gseh, und drum isch äs nid so sehr spektakulär gsi. Ebefalls hät Tina wieder ihres Problemli gha mit de Höchi. Ab 2500 MüM isch sie nur no am dehiifegitiere gsi und am schluss hät sie au no kötzlet was äs Züüg ghebäd hät. Aber sgit schlimmers.

Am Sunntig hemmer uf em Camping grilliert und de sunnig Tag gnosse werend dem de Marco de Boudi am zerlege gsi isch.

Am Mäntig sind Tina und de Marco de ganz Tag am Ersatzteili suächä gsi, nid ganz so eifach wiämä denkt, aber au das hät funktioniert mit viel viel Närvä und Usduur.

Am Obed isch den Zyyt cho vom Abschied sägä vo üsem Bsuäch.

Bimene feine Znacht hemmer die letschte 3ähalb Wuchä nomol revue passiere loh.

Danke viel mol Erhard und Christa für die viele Gschänkli wo ihr üs mitbrocht hend. Aromat wird üs ganz bestimmt nid usgoh im nögste halbe Johr (ussert öppert chlauts üs)

 

sMeitli hät de Hund im Griff

ohni Wort

äs Wyyli passt immer und überall

de Erhard häts im Griff

im Tren de las Nubes

de ganz edel Hess Wy