Puerto Escondido 2

Mir sind jetzt doch scho sit meh als 2 Wuchä do i dem Städtli und es gfallt üs immerno super guät. Üsi Spanischkänntnis wachsed vo Tag zu Tag. Obwol die letscht Wuche hend mir nid würkli viel die Schuäl glärnt. Die erste Wuche hend mir 3 Stund Grammatik gha am Morge und am Nomittag no chli surfe. Die zweit wuche sind mir den am Morge go surfe und am Nomiitag id Schuäl. Am Nomittag hend mir nu Conversation gha.... und will mir nid so plauderfräudigii Persone sind (also uf spanisch) und üs die Theme nid würkli intressiert hend, hemmer super wänig glärnt. Also diheime hemmer scho immer no chli gsträbered. Aber es isch halt au chli blöd weme zersch goht go surfe und denn id Schuäl mo... de Marco hani also mol verwütscht woner sini Äugli zuägmacht hät wered em Unterricht.

Die Wuche hemmer jetzt wieder am Morge Schuel.

Zu üsne Spanisch-Kenntnis: Tina hät usägfunde das sie viel besser spanisch lernt, wenn Sie älei dur dStrosse vo Puerto lauft. Do häts würkli paar Attraktivi Mexe wo chli hend wele gspröchle mit dere Dame.

De Marco het chli es Intresse am Spanisch verlohre aber er biisst sich immerno dure. Er git sich würkli ganz fest müäh und lernt Wörtli um Wörtli. Eis nochem andere.

Üsi Schuäl. Also äs hät jetzt nümmä 80% dütschi sondern nur no 70 % däfür isch de Schwiizerateil gstiege. Überall wird nur deutsch gesprochen. Ein übel!

Zum Surfe:

Mir hend müäsä feststelle, das es doch viel eifacher isch wenn me en Surflehrer het wo eim no en chline Schupf id Welle git. Und vor allem wo eim zeiget wenn me genau muäs aafange paddle und ufstoh. Sit mir e Brett gmiätäd hend hemmer nu no halb so viel Erfolg und dMotivation loht nor.

De Boudi hät dFüürwehr kännä glärnt.

Am Samstig Morge hät dä Boudi us irgendeme Grund es paar Liter Beniz bislet. Und zwor nid unne ue sondern usem Tankstutze. Er isch es bizli schräg gstande und isch nid mol me halb voll gsi und trotzdem isch das dört use gloffe. Mir hend also würkli überhaupt ka Ahnig wiä das het chönä passiere. Häjo dFüürwehr isch den cho und hät gluägäd das niämertem öppis passiert.

Puerto Escondido

Marco the Sport Fisher!

Mir dörfer eu mitteile, dass jetzt au de Marco under dSport Fisher gange isch. Ebefalls wüssed mir jetzt au dass Tina nid so ganz Boottauglich isch. Diä hät sich die ganze 4 Stund uf em Meer müäsä konzentriere zum nid chötzle. Sie het dementsprechend au nid viel gseh. Ihren Chopf het Sie di meist Ziit under Deck gha. Vilicht ischs au dra glägä, dass Sie nid allzuviel gschlofe het e Nacht vorher. Da mir es Zelt damol genau vorore Goa Party ufgschlage hend.

Am letschte Samstig hend mir i üses neue diheim dörfe iiziäh. Ä anderhalb Zimmer wohnig. Shät zwor kann Chüälschrank und kann Herd, aber däfür 3 Doppelbetter und en Balkon. Und das ganze für knappi 300.00 im Monät. dUssicht isch dä absoluti Hammer! Do chamä also würkli niiidisch wärdä...(falls äs lüüt git wos nonig sind J)

Anschiinend ischs do au sehr ruhig. Aber leider hend mir vo dere Ruäh nonig viel mitübercho. Für üs ischs definitiv alläs anders als ruhig i de Nacht, aber vilicht sind mir do eifach chli verwöhnt worde die letschte Wuchene. Ebefalls hend mir au grad e katolischi Chilä näbäd üs. Uii das sind den gläubigi Lüütlis do (oder si tönt ämäl so) Am Wuchenend sind 2 – 3 Hochziite und es git minimum 1 Mäss pro Tag. Am Samstig und Sunntig sinds öppä 3 Mässä. Abartig. Mir bruchäd eigentli kann Radio oder so. Mir hend immer schöne Gsang näbäddra J

Escuela Experiencia

Am Mäntig hend mir üsen erste Schuältag gha. Mir sind gspanne gsi wiä än Flitzboge und hend no paar mol e Angstbisi müäsä go machä. Isch doch schowieder es Ziitli här sit mir sletscht mol dSchuälbank druckt hend. Aber ich würd mol sägä mir machäd das super!

De Marco isch super fliessig und lernt immer bis am obed spoot. Er lernt au diä Sachä wo en nid intressiered. Tina hät scho chli Vorsprung im Spanische will sie i de Staate scho chli gsträberät hät.

De einzig Nochteil i dere Schuäl isch, dass es 80% dütschi hät. Nid das mir öppis gegä Dütschi hend oder so, aber rede wemmer jo scho nid grad mit dene. Hihi

Salsa

DSchuäl büted jede Mittwuch gratis Salsa Stunde a. Natürli hend mir das üs nid welä entgo loh. Also mir hend üs scho chli müäsä überwinde zum go, aber was gratis isch sött mä jo probiere oder gäll. Und au do hönd mir de Entschluss drus zoge: Tanze isch absolut nünt für üs. Mir hends jo eigentli vorher scho gwüsst, aber jetzt wüsseds mir definitiv. Aber do wetti no ä chlini Info abgeh: De Tanzlehrer hät ä seht guäts Parfum J

Surfä

Da mir de Ort jo äxtra usgsuächt hend wäg äm surfe hend mir au müäsä Surflektione neh, dämit mir chli öppis lerned bevor mir älei dWällä jaged. Wiä nid andersch zerwarte isch de Marco vo afang a guät gsurft. Er isch grad di erst Welle scho gstande. Und dezuä ane ischs ka chlini Wällä gsi! Tina hät am aafang no äs bizli müäh gha zum überhaupt ufstoh. Sie häts bevorzuuugt uf de Chnüü zsurfe. Isch doch au läss oder? Gege Schluss ischs den aber immer besser gange. Tina hät dihei dän richtig gas geh und im Trochne güäbt so dass Sie au chan mit em Marco mithebe und es hät sich uuszahlt. 2 Täg spöter bide nögste Surflektion isch sie gsurft wiä äs Herrgöttli.

Im Marco sini Bilanz noch 4 Stund surfe isch e broches Surfbrett. Ich würd do däzuä mol sägä: Super Marco, mir sind stolz uf dich. Nei är hät do also nünt würkli däfür chönä. 

Silvester

 Am 30. Dezember sind mir in Acapulco acho. Mir hend grad zersch mol no paar Sachä wele go poschte in Walmart und wer trüfft me do? üsi lustige Ossi-Fründe womor uf de Fährä noch Mazethland kännä glärnt hend. Die Welt isch doch chli. Sie hend üs den verzellt, dass Sie amne Strand überfalle worde sind. Sganz Auto mit Pop-Up hends änä klaut. U äs Gäld hends nä am Strand loh. De eint Mex isch sich anschiiinend sogar no go bedanke befors samt Auto abzottled sind. Do söll mä doch nomol sägä diä Mexä händ ka Aastand J Zum Glück sind diä Mexxä aber im Strand stecke blibe und hend den müäsä ohni Auto flüchte. Trotzdem hends aber alläs wa Geld brocht het mitgnoh (Kamera, Harddisk, LapTop...) und natürli sind au alli Fotene weg gsi... 3 Monet Afrika.. ui das würd mi kakke L Janu Shit Happens. Sie hend üs den grote zum guät ufzpasse...

Mir hend üs den au ziemlich Gedanke gmacht. Und mir sind froh, dass mir eigentli nid gross Wertsache debii hend. Natel und Lappi sind zum Glück scho ziemli alt... seinzige isch eigentli s  Ipad. Suscgh hemmer jo eigentli nünt kostbars ussert es Auto selber.

Mir sind jetzt sicher vorsichtiger bem Campe. Aber doch sind mir halt au de Meinig, dass mä entweder Glück het oder den halt nöd. S Chan immer öppis passiere.

Aber eigentli chömäd mir guät durä mit üsem Trick: Eifach behinderet stelle wenn ein öppert wett überfalle J Gäll Mami Trüeb J Tina beherrscht das super guät! Marco natürli au!

Mir hend üs am 31ste Dez den chli under sVolk gmischt. Zersch Chips und Bier kauft und üs ä Plätzli am Strand gsicheret. Sisch üs vor cho wiä ei riese Familie. Tina hät dän au ä Zuckerwatte übercho vom Marco. Tina het zwor liäber Magebrot gha, aber das hets leider nid geh am Strand. Ich seg do däzuä : Totali Marktlücke! Janu Chips Zuckerwatte und Bier isch au guät. Am 12i hets ä mega schöns Füürwerch ge a verschiedene Ort.

Noch em 12i hend den dMexxä ganz viel so selber bastleti Heissluftballönli stiege loh. Het schampar schön und romantisch usgseh. dLüt hend gjublet und klatsched.

Churz nochanä sind mir den aber au scho iigschlofe am Strand. Mir sind ächt riese Pänntütene worde. Mir sinds üs nümm gwöhnt zum länger als bis am 12i ufzsii...

Das änderet sich den aber sicher wänn de Svenöli unds Anneli uf Bsuäch chömäd im Februar.

Nochdem mir uspfused hend und ä super guäts Zmogeesse iädruckt hend, simmer wiiters richtig Süde gfahre. De nögste Stopp hend mir bimne Schwiizer Tortuga-Helfer iigleit. De Marco isch letscht Johr scho do gsi mit sim Kolleg. Isch würkli ä ganz schöns Plätzli! Aber sWasser isch au do ziemli Wöschgang – Mössig. Mir hend en super guätä Fisch gässä im Resti und hend den au no än ganz liäbä Iheimische troffe vo Mexico City. De hät so freud gha a üsem Boudi, dass er üs no äs paar gheim Tipps geh hät womor umbädingt no anä müänd. Und am Schluss hättor üs no sini Mexico StrosseCharte gschänkt. E würklich guäti Charte mit (fasch) allne Strössli druf.  U mega liäb!

Mir sind aber nu än Tag be dem Schwiizer blibe, wil nögst Mentig jo üsi Spanisch Schuäl aafangt und mir gar nonig wüssed wo mir wohne werded, gschwige den was füre Schuäl mir wend bsuächä....

also lätz fätz und wiiters gohts