Apoyo und Ometepec

Laguna de Apoyo

en Brüllaff am schlooofe

Vulcano Conception

Laguna de Apoyo

Die letschte 3 Täg hend mir i dere Lagune verbrocht. sWasser isch eifach perfekt warm. Sisch Perlblau und äs hät ka Salz drinne. Das heisst dHuut dröchnet nid uus und dHoor werded nid brüchig. Was gits bessers? E paar hundert Meter entfernt ghöred mir Brüllaffe wo üs de ganz Taag duur umejauchze informiered, dass irgendwo ide Nöchi sind. Jede Obed hömmer anderi Hünd um üs umä und mir wechsled üs ab wer de Hund dörf füätärä. Will mir vo andere Reisende ghört hend das es sozsägä ka Platz het zum frei campä hemmer en Campingplatz gsuächt. De Camping hät zwor happigi 6 Dollar wele pro Person und Nacht, aber wils do so schön isch, hemmer gfunde mir leisted üs das.

Am erste Tag hend mir en Früähligsputz i üsem Duplex Huus duregführt. Mir hend alläs gwäschä inklusive de Kleider. Au wänn üsi Villa nöd di gröst isch, hets doch einiges ztuä geh. Am zweite Tag hend mir ganz früäh welä ufstoh und uf Kraterwand vom Apoyo ufelaufe. Die Tina ihri Migränä hät üs aber de ganz Tag versaut. Dezuä hend mir beidi au gar nüm so mögä noch em extrem aastrengende Früähligsputz vo Gestert. Gege Obed hend mir aber trotzdem no en chline Spaziergang gmacht.

Am hüttige Morge isch alläs wiä gschmiert gloffe. Am halbi 6i sind mir ufgstande und sind mit voller Elan de Hang ufegloffe. Zoberst obe hend mir den zmörgelet und dLandschaft gnosse. Au wenns 2 Stund eifach nu berguflaufe gsi isch und super aastrengend, hets üs sehr gfalle öppis ztuä. (grad uslaufe het sicher au guät tuä und üs worschindli au besser gfalle) Segs wes well, mir hend jo sowiso müäsä trainiere für üsi Vulkanwanderig uf de Isla de Ometepec.

Am halbi 10i sind mir den schowider retour gsi vo üsem aastrengende Marsch, hend üsi 7ä Sachä zämäpackt und sind chli wiitershindere gfahre womor doch no ä Plätzli zum frei campä gfunde hend. Üs häts do so guät gfalle, dass mir gar nüm hend wele weg vo do. Aber will äs Visum für de Boudi scho i 2 Wuchä uslauft mömmer wiiters.

Isla de Ometepec

Nochdem mir nomols en churze Ufenthalt in Granada gmacht hend, simmer wiiters richtig Isla de Ometepec und hend üsen Boudi uf dInsle verschifft. Wo mir am Obed dört acho sind, hend mir sofort e Plätzli zum übernachte gsuächt. Au do hend mir ghört, dass es anschinend sehr schwirig söll sii e Plätzli zfinde, aber mir hend grad uf aahib öppis schöns gfunde. Sisch au nid lang gange, do sind scho 4 Chind um üs umä gstande und hend wieder wele wüssä was mir alläs debii hend und so wiiters. Irgendwenn hend den aber au diä Chind is Bett müäsäs und mir hend den au dörfä :)

Wiiters ischs gange uf Strosse wo imne ziemli schlimme Zuästand gsi sind. Kä Wunder, denn do hät jede e paar Rösser und niämert würkli ä Auto. Mir sind vo eim schöne Schlofplätzli zum nögste düüsed. Es hät us würkli sehr guät gfalle uf dere Insle. Ziit isch eifach viel zschnäll vergange. Natürli hend au mir wele uf de Vulcano Madera ufächräcksle. Gmäss Reiseführer und susch paar reisende muess das e ziemli taffi Wanderig sii. Aber mir hend jo glärnt, dass me weder imne Reiseführer no Reisende alläs glaube söll. Nun jaaaa, do hettemer doch besser mol glaubt was alli verzelled! Pünktlich am morge am 6i, sind mir mit üsne 2 Guides vo Merida uf de Vulkan gloffe. 1 Stund hend mir nu schomol bruucht bis zum Fuäss vom Vulkan zlaufe und die restliche 3 Stund hend mir no brucht zum imne affezah ad Spitze und den in Krater abäzlaufe. Ich chan eu versichere, dass es ganz bestimmt kann Zuckerschleck gsi isch. Üsen einte Guide isch mit sine Gummistifel ziemli zügig zuägloffe. Mir hend ihm au uf grader Strecki nid noohrmöge, so schnell ischor gsi. Gredet het de nid viel, aber dodrüber sind mir eigentli froh gsi. Mir wäräd sowiso nid im Zuästand gsi zum irgendöppis zrede. Ehrlichgseit hend mir üs so richtig müäsä zämäriesse zum nid chötzle. Üsi Usduur het noch 2 Stunde mol de aaschiin gmacht zum ufgeh, aber sisch den doch no gange. Dezuä müämä au no erwähne das üsi super guätä hightech-Wanderschuäh so Monate nümme aagha hend und au susch nümmä a Schuäh gwohnt gsi sind und natürli hend mir scho noch churzer Ziit ultra schmerzendi Blotere gha. Jupiii. Es hät sich aber alleweil glohnt. Genau wo mir nämmli in Krater abägloffe sind zude Lagune, het sich de Nebel verzoge und sisch blaue Himmer fürächo. Es hät sich also würkli uszahlt. Uf em Rückweg hät üs de Guide denn au no verzellt, dass üsen Weg de längsti, aasträngendsti und gföhrlichsti Weg isch vo allne 3. Aber üs wunderet das jo nid, isch natürli klar das mir genau dee usgsuächt hend.... Aber äbä, het mä sich ä chlei besser informiert, hetted mir das gwüsst.

Öb mir de Vulkan wiiterempfeled? Hmm mir beidi finded de Weg und au de Krater würkli super spannend und schön. Vorallem de schlammig Weg ganz obe het üs guät gfalle. Me muä sich eifach im klare sii, dass es 4-5 Stund eifach nur ufwärts goht und zwor ziemli steil. Und wämä dobe isch hets ka Seilbahn wo abäfahrt, sonder me muä das ganze au wieder abälaufe. Durablaufe isch fasch no aasträngender und schmärzender wiä duruflaufe.

Aber jo, mir würdeds empfelä :)

Ihr chönd eu vorstelle wiä mir am nögste Morge Muskelkater gha hend. Mir hend fasch nid chönä ufstoh. Aber au do hend mir durä müäsä! Will hüt gohts jo wieder wiiters richtig Festland! Noch 5 Täg Insle, hend mir üs wieder ufs Festland gwogt und sind richtig San Juan del Sur gfahre. 

San Juan del Sur

De Playa Madera isch daas Surfermekka in Niga und dört hend mir natürli hiii wele. Nur stelled eu jetzt mol vor wiä schrecklich schlimm surfe isch mit Muskelkater. Drum hend mir üs an de Strand näbäddra verfrachtet womor scho vo mehrere ghört hend dass de Camping Matilda super söll sii.

Und do sind mir jetzt. Es gfallt üs ganz guät doo und momentan machäd mir au gar nid so rächt de aaaschii das mir wiiters wend.

Am erste Tag hend mir dJanna und de Graham vo Portland kenne glenrt wo mit ihrem Hund em Bonsai vo Origan bis noch Uruguay underwegs sind und am nögste Tag hend mir den dBeate und de Marc us em Bündnerland kenne glernt wo au dPanamericana machäd.

Also eigentli hend mir diä 2 jo scho kennt, also das heisst, mir hend scho mit ihne ge-mailt weg de Verschiffig vo Panama noch Kolumbie, drum ischs grad dopplät läss gsi zum sie per Zuäfall ztröffe.

Scho bald gohts ab Richtig Costa Rica. Mir sind gspanne öbs würkli so tüür isch wiä vili sägäd, oder ob mir gar nid viel merked bis ufs Benzin.

Mir lönd üs überrasche. Aber uf wa mir no viel meh gspanne sind in Costa Rica, isch uf üsen nögste Bsuäch! DIris und dClaudi chömäd vom 13. Bis 27. April mit üs on Tour.

ich glaub da Bild brucht ka wiiteri Beschriiibig

Nicaragua isch super!

Granada

Nochdem mir uf em Weg noch Granada die letschte 4 Wuche nomol passiere loh hend, simmer spot am Obed acho. Äs ganz es härzigs Städtli am Lago de Nigaragua. De Boudi hend mir direkt vor de schöni Chile parkiert. Mir sind den no chli durs Städtli gschlenderet und ab i üsi Villa go pfuse. Die Nacht ghöred mir wiä öppis klappered am Boudi, aber wo Tina usägugged het, het Sie nu än Typ gseh verbiilaufe.... Nünt schlimms dänk, do wärdäd mir am morge am halbi 6i nomol gweckt dur e chläpprigs Grüsch. Wo Tina damol usäluägäd, wend doch grad 2 Teenis üsi Schufle chlaue! Au damol het sich Tina nid wiä normal tod gstellt sondern hät usgruäfä wiä ä wildi.

Das glaub ich jo nöd! Im sicherste Land vo ganz Mittelamerika wends üs es erste mol bechlaufe! Mir hend eigentli no chli welä wiiterpfusä, aber dChile fangt do am Samstig scho am morge am 6i aa, also hemmer fasch müäsä us de Federe gumpä.

(Wie chamä so früäh scho id Childe???? Wiso schlofed diä Lüüt um diä Ziit nid no???)

Wie mir den spöter festgstellt hend, hends üs au no die lingg Differenzialsperrig klaut.

So Sausieche! De Marco isch fest devo überzoge gsi, das mir eifach di nögst Nacht bemne andere e Diffsperri gönd go chlaufe. Immerhin isch do fasch jedes 2 Auto än Landcruiser.

Vulcano Mesaya

Zersch simmer aber in Nationalpark Vulcano de Masaya.

Mir hend üs eigentli vor allem für dNachtwanderig intressiert wome Fledermüs sött gseh und brodelnds Lava. Am Morge früäh sind mir aber zersch mol go wandere i dem Park. Isch ziemli karg aber schön. Wils Wuchenend gsi isch, hets relativ viel Touris gha.

Grad womor wieder zum Touristezentrum retour gfahre sind, hemmer e Schwiizer und e Dütsches-Päärli troffe wo beidi miteme Land Cruiser underwegs sind. Mir hend üs uf ahib super verstande und sind den au mit Ihne uf diä Nachttour gange. Noch de Tour (womor KEI blubbernds LAVA gseh hend) hemmer üs den au entschiede zum im Park inne zpfuse und nid go Diffsperrene stehle in Granada.

Markus, Tanja und Bauch

Felix und Fränzi

Mir sind am Obed denn alli zeme ghöckled und hend Storys verzellt vo üsere Reis. Jede het öppis zverzelle gha und sisch richtig gmüätlich gsi.

Ab Richtig Kafiplantage

Noch dem mir üsi Blog-Adresse ustuusched hend mit allne, hend mir üs verabschieded und sind wiiters richtig San Ramon düüsed. Im Reiseführer isch gstande, dass me dört chan zuäluägä wiä dKafibuure schaffed und dasmä au sälber chan mithälfä. Shät sehr vielversprechend tönt. Mir hend üs den grad dört gmolde für e Tour am nögste Tag. Will mir nonig so sattelfest sind im spanisch, hend mir das ganze uf Englisch bstellt. Mir sind den no chli dur San Ramon gwatschled und den no e chlei us em Dorf gfahre zum es Übernachtigplätzli zsuächä. Grad am Fluss hemmer inere Chuäweid en super Platz gfunde wo absolut ruhig gsi isch  i de Nacht.

Am Morge simmer den uf La Pita gfahre. De Führer het üs sehr herzlich empfange und imne super guätä englisch alläs erchlert was mir hend wele wüsse. Er het üs aber au grad vo afang a gseit, dass Sie leider grad inere Kafi-Miserä stecked. Fasch alli Plantze hend vor paar Monät ä Chrankäd ufgläsä und sind verendet. Sie hend jetzt neue pflanzt, aber bis diä gwünn abwerfed gohts 3 Johr.

Mir hend grad mol denkt, na toll, isch jo mol wieder klar dases kei Kafi hät wän mir wend go hälfä Kafi machä. Zzzzzz Diä Tour hät sich aber alleweil glohnt. Mir hend nebed Kafi au Heilplanze-Tips becho. Und mir hend au glernt, dass do alli en Hund hend weg de Schlange. Die Hünd sind mit eim Gebell uf diä Schlange los gange, üs het Sie also scho fasch leid tuä L Isch e ganz schöns Tier names Mika oder Nika... De Marco und ich sind üs do leider nid einig worde, wers richtig verstande het.

finde das Tier

Noch de Tours wo mir doch paar ganz wenigi Kafibohne gseh hend, simmer den no go Zmittag ässä bi de Familie vo dem Führer. Mir sind au do richtig härzlich ufgno worde und de Vater hät nomol de genau ablauf vom Kafi-Herstelle erchlärt. Tina isch aber leider abglänkt gsi vode 3 junge Hündlis wo eifach zuckersüäss gsi sind. Sie hend üs sogar ä Hündli wele schenke, aber was wend mir scho mit somne Chline Schnügger?? Mir hend jo scho än super Hund.

zuckersüäss!

Landschaft erkunde

Mir sind den no chli wiiters gfahre richtig Jinotega sisch immer grüäner worde. Mir sind dört chli im Städtli umäspatziert und hend üs informiert über e Wandertour uf de Berg ufä. Mir hend den alli Infos gfunde und hend üs mol wieder uf de Weg gmacht zum ä super Plätzli zfinde zum übernachte. Leider isch und isch eifach nünt schlaus cho und mir sind immer wiiters wäg gfahre vo Jinotega, bis mir den entschlosse hend uf Esteli zfahre womor schomol gsi sind und denn richtig Karibik.

Imput: Es isch halt eifach scho nid so eifach zum e Schlofplätzli zfinde. Vorallem im Hochland. Do isch nämmli alläs mit Haag abgsperrt und shät fasch ka Wägli wo is Nirgendwo hindere führed. Aber eigentli finded mir immer öppis. Im Notfall pfusäd mir halt au eifach näb dä Stross.

au de Boudi muä ab und zuä gwäschä wärdä. Hygiene stoht be üs zoberst obe :)

Au Pedicure ghört be üs zum Programm. Ab und zuä dörf halt au es Tüechli geg de Durft nid fähle

war mal ne Kuh

Dschungel und Karibik

Uf em Weg uf Bluefield hend mir nomol irgendwo im Nirgendwo äs Plätzli gfunde womor es Füürli gmacht hend und Marshmellows (oder wiä mä das au immer schriibt) grillt hend. Es isch de absoluti Börner gsi. Die Tina ihren neue Liäblings-Dessert. Hmmmmm

No churz zerwähnä isch, das da üsen erste Dessert gsi isch, sit dAnn und de Sven üs verloh hend.

feeeein, do strahlt aber eini :)

In El Rama acho, hemmer üs grad uf de Weg gmacht zum de Weg noch Bluefield zfinde. Mir hönd 5 Mensche gfroged und wiä immer 5 verschideni Antworte übercho. Sisch doch eifach müähsam, diä Lüüt sägäd eifach öppis wäns kä Ahnig hend.... (also eigentli wiä dä Marco J)

Noch 3 Stund umälaufä und froge hend mir üs den müäsä iigestoh das mir nu mit em Boot mit oder ohni Boudi uf Bluefields chömäd. Bluefield isch eigentli gar nid üses Ziel gsi, sondern Little Corn Island. Dört hetted mir de Boudi sowiso nid chönä mitneh, drum hemmer üs entschlosse de Boudi in El Rama zloh womor sAuto hend chönä imne Resti (mit Gitter rundume) abstelle (gratis). Mir hend üs den au grad für 10 stützli es Hotelzimmer gleistet, Mir wüssed jetzt au worum das äs nu so wenig kostet het. Wasser gits numä uf verlange, was mir aber erst usegfunde hend nochdem mir abgstinkled hend uf de Toilette. Und es Bett hät knarrt und quitscht, do het mä also nid mol ä Sex chönä denke. Naja, aber äs isch trotzdem ganz nätt gsi. Am Obed wo mir vor üsem Zimmerli ghocked sind i de bequeme Sessel, hend mir den per Zuäfall de Alex kännä glärnt. Er isch Schriftsteller be Lonely Planet (üsem Reiseführer) Mir sind eigentli vorne und hinne nid zfriede mit dem Reiseführer, aber de Alex isch en super Typ. Er wohnt in Pearl Lagune und het grad no öppert gsuächt wo es Auto het und am nögste Tag dört ane fahrt.

Mir hend nid lang müäsä überlege, zum ihm zsägä das mir gärn mit ihm dört anä fahred.

Bluefield isch anschienend sowiso nünt speziells und vo Pearl Lagune chömmer au mit em Boot uf diä Islands.

Am nögste Morge hemmer de Boudi schowieder us em Gfängis befreit und ab ischs gange. Chum us dem hässliche El Rama dusse, hät mä sich scho gfühlt wiä im Dschungel. Tina hät sich grad verliäbt i de Weg. De Marco häts vor allem gnosse mit äm Boudi zoffroadä. De Alex hät üs sehr viel über dKultur und dLüt verzellt us dere Region. Er lebt scho sit 10 Johr in Nigaragua und weiss drum au sehr viel. Irgendwenn hets den mol aagfange regne und mir sind so richtig uf em Wägli hin und her grutscht. Nochdem das äs üs den mol quergstellt hät, ischs Ziit gsi zum de Allrad iägheie. De Marco und de Alex hend super gfunde, aber diä arm Tina wo hinne ghocked isch, hät fasch is Hösli gmacht. Zu Recht! Mir sind imne affezah mit öppä 20 km/h gfahre do ischs so richtig rutschig worde bergab und vor üs gsemmer wiä ä ganz schmali Brugg chunnt und links und rechts 2 Meter tüüf abägoht.  Mir sind immer schräger worde und es Brüggli isch immer schmäler worde. Tina isch scho am schreie gsi wo de Boudi nomol alli Chraft zeme gno het und sBrüggli no hoorknapp verwütscht het. Wiä sich usegstellt hät, isch au vode vordere 2 Herre sHerz id Hose gheit.

Die restlich fahrt isch den no sehr agnehm verloffe und es sind ka Zwüschedfäll meh passiert. Wo mir acho sind het üs de Alex grad iiglade zum mit Ihm id Bäckerei en Happe go ässä. Mir hend je 2 Pathe gno und no zeme en Chuächä. Oh mann isch das fein gsi!

Wo mir dört im Stübli inne ghocked sind bemerkt Tina das dRieme wo dLeitere befestigt isch, locker sind, und meint das mir nid dörfed vergesse diä no chli besser azzieh. Do langed sich de Marco an Chopf und meint: Mann Tina mir hend dLeitere verlohre, do mome nünt meh aazieh!!!!!!!! Huch jetzt hät blödchen Tina au gseh. Leiter weg! Ja nu jetzt mömmer halt chli Bergstiege bis mir im Zelt obe sind. Nochdem mir de Schock überwunde hend, simmer es Dörfli go aluägä. Do ischs ganz anders als uf de Ozean Siite. Di reded do so ä komischs englisch (kreolisch) und zum Teil verstönd diä nid mol spanisch. Ihr chönd eu vorstelle, mir hend immer probiert spanisch rede wiä mir die letschte paar Mönät glernt hend und diä hend üs eifach nid verstande. Vode Lüt her ischs üs chli vorcho wiä in Jamaika. Nid das mir wüssed wiä dört isch, aber mir stelleds üs so vor.  Gringos sind do au fasch keini aaztröffe gsi. Normalerwiis isch das e total verschlofes Plaschter wo Hüäner, Hünd, Rösser, Saue... Eifach alles frei umälauft. Hüt isch aber es Eröffnigsspielt vom Basefall. Die ganz Karbikküste vo Nigarague kämpft all 2 Johr imne andere Dorf um de Titel und das Johr ischs es in Pearl Lagune. Ihr chönd eu vorstelle das do nünt mit Ruäh gsi isch. Mir hend natürli au nid wele das Spiel verpasse und hend üs grad a Kasse gstellt. Ganzi 1.50 hät dä Iitritt kostet. Mir sind den mol iägloffe und do isch öppis ganz schlimms passiert. dTina isch aagfahre worde!!! E ganz e blödi Rollstuählfahreri isch ihre eifach über de chlinsti Zeche durägfahre! Was gits schlimmers wiä än kabutte chline Zeche!!?!!?!! Anyway Wiäs halt so isch hät niämert würkli dä Ablauf kännt vo dem Obed und mir sind eifach mol vors Stadion ine Resti ghocked und hend üs dur dCharte gfresse. Daaas Food do sind fritierti Banane. Banane mit Salat mit Chicken oder mit Shrimps... Alles chamä do haa. Nu wämä fritierti Banane nid so toll find (wiä Tina) denn gits nüm so viel Uswahl. Vom 4i bis am 8i hemmer denn dEröffnigsshow aagluägäd (dOlympiade isch en Dreck degege) und nochane het den es Spiel aagfange. dSpieler sälber hend sogar no dLinie zoge. Mir hend also alläs chönä mitverfolge. Obwohl mir nid würkli viel vo Baseball verstönd, hends mir ziemli amüsant gfunde. Währäd äm Spiel hend mir den au no dä Rasta kännäglärnt. Än Moskito, das sind dUriiwohner vo do. De Marco hät de Tina den au no ä super schöns Chetteli kauft vom Rasta. Üsen neue beste Fründ hät sich super guät um üs kümmeret und gluägäd das üs a nünt fählt. Irgendwenn ischor den aber ziemli lang verschwunde und mit so richtig glasige Auge wieder fürecho. Er hät üs den wele anän andere Ort bringe, ke Ahnig wohiii, mir hend en nid so guät verstande. Äs Meitli wo näbäd üs ghocked isch, hät de Marco aber paar mol id Rippe gstupft zum sägä, NEEEEI, GÖND NID MIT! Wo mir ihm den gseit hend das mir nid wend und er bös abzottlet isch, het sMeitli üs gseit das är än Dieb isch.... Do sind mir doch froh das äs so liäbi Meitli git. Es paar Minute spöter verspürt Tina wie ihren Arm, wo Sie um de Marco ghänkt hät, notzment schön füächt wird. Wo Sie hindere luägäd gseht Sie en Buäb (so öppä 3i) wo probiert hät ine Coläfläschli iäzbisle aber sLoch chli verfählt hät. Ihr chönd eu vorstelle wiä Tina freud gha hät! SMami vo dem chline Buäb hät mich den härzigerwiis sofort abbutz und sich uu gschämt. Mir sind denn bald drum abä us äm Stadion glüchted bevor no wiiters het chönä passiere. Will mir gwüsst hend das diä Nacht ziemlich luut wird werde, hemmer üs und de Boudi as End vode Stross verfrachted und hend üses Duplex Huus ufekurblet. Mir hend aber zersch no Fründschaft gschlosse mit em Nochbor und de Marco hät äm ä Zigarillo gschenkt. De liäb Härr hät üs aber no druf ufmerksam gmacht, dass diä Lüüt do i de Nacht gönd go Benzin chlaue wens ä Auto finded wos nid kännäd. Und mir müänd vorsichtig sii, aber wenn mir jo im Auto schlofed, chönd mir üses Benzin bewache.

Ihr chönd eu vorstelle wiä Tina guät gschlofe het. Sie hät gschlofe wiä uf Nodle. Be jedem Grüsch isch sie fasch gstande im Bett. All paar Minute sind Lüüt verbii trottet und hend natürli üses Duplex Huus müäsä aluägä. Das kännt mä doo im Nirgendwo wo fasch niämert ä Auto hät no sältener wiä susch irgendwo. Aber au diä Nacht isch mol verbii gange und de Morge isch verwached.

Kajaktour

Am nögste Tag hemmer nomol ä Baseball spiel aagluägäd. Am Nomittag simmer den nomol id Bäckerei und denn hemmer au scho mit äm Alex abgmacht zum go kajake. Er hät 8 Kajaks und üs iiglade zum mit ihm go dLagune zerkunde. De Marco hät umbädingt ä eiges Kajak wele und Tina hät drum au ä eiges müäsä neh und nid äs zweier.  Ab und Los ischs gange. Tina wo erst ei mol imne zweier Kajak mit de Iris in Vietnam ihri Erfahrige gsammlet het isch so ziemli ufgschmisse gsi. Zersch mol simmer 5 Kilometer geg de Wind gfahre. Aber diä Landschaft isch so was vo affe turbo geil gsi, sodass es gar nid wiiters schlimm gsi isch zpaddle wiä wild. Äs isch so schön ruihg gsi und überall häts sagehaft schöni Inseli gha. Womor am Karbischi Meer acho sind, hämmer no än Schwumm gno und üs churz usgruäht. Au wämäs fasch nid chan nohrvollziäh, aber Tina isch doch scho rächt kaputt gsi. Ihren Rugge hät diä Strapaze scho chli mitgno. Bim Retour paddle het klein Tina den mol churz e Kriese gha mit em Stüüre, aber nochdem de Marco Ihre dFuässstützi richtig iigstellt het und erchlert het das me es Gliichgwicht so besser chan kontrolliere, het das doch scho viel besser usgseh. Alli 3 sind paddlet wiä grossi zum de Sunneundergang zbewundere. Leider het de Ruggewind womor hedded sölä ha de Geist ufgeh und somit hend mir ohni irgendwelchi Hilf müäsä geg dStrömig akämpfä. Hailand Stärnä Siäch isch das aasträngend gsi. Grad no rächtziitig hend mirs gschafft zum de romantisch Sunneundergang sgseh! Nochere guätä Minute isch de Undergang aber scho wieder Gschicht gsi und noch dere churze Verschnufspause ischs wieder wiiters gange. De Mage hät langsam aber sicher ä Hüngerli verspührt und äs Ziel isch no lang nid in Sicht gsi.

Mir hend kämpft wiä wildi. Tina hät dän aber doch mol ä churzes Päusli brucht. Äs hät eifach alläs weh gmacht vo Buch ufwärts.

Gedanke vode Tina: Ufgeh und vode 2 andere abschleppe loh? Nei sicher nid ich bin doch ä Trüeb!!!! Also demfall wiiter biiiisse..... Oh Mann Alex, halt doch mol dSchnorre, ich mag nid antworte gsehsch dänn das nid. Und erlichgseit wär intressierts? Und worum magsch du eigentli no rede? Bisch nid müäd???..... Puh ich gseh das dä Marco au nüm mag, das beruhigt mich ä chli.

800 Meter vor em Ziel hemmer alli zeme nomol e chlini Stärchig zu üs gno. Zum Glück sind mir vorher jo no bim Beck gsi go süässi Brötli go chaufe J Hmm fein! So und jetzt ab is Ziiiil. Chum hät Tini ihres Brötli fertiggesse gha isch Sie ab wiänäs Zäpfli. Nid mol meh de Alex hät Ihre nohrmöge. Gmäss Marco häts vo hinne so usgseh wiä im Trickfilm vo Asterix und Obelix wo nur no dRuäder im Wasser gsi sind J

So also das isch jetzt mol dSicht vo de Tina. Falls Ihr dSicht vom Marco oder vom Alex wend wüsse, müänd Ihr diä sälber frooge.

Mir sind den no churz öppis go ässä nochdem mit heil wieder a Land gsi sind.  Mir beidi hend scho di ganz Kajaktour immer wieder üsen Shripsteller denkt. Und endlich isch es sowiit. De Marco het en Chnobli-Shrimps-Teller bestellt und Tina fritierti Shrimps. Leider hät klein Tinchen mol wieder Päch gha und fritierti Banane mit bizli Shrimps becho! Do i dem Dorf sind fried Shrimps mit fritierte Banane. Naja, sgit schlimmers!

I dere Nacht hemmer üses Zelt chli usserhalb vom Dorf ufgschlage das mir ungstört hend chönä pfusä.

Corn Islands oder nöd?

Mir hend üs entschiede zum nid uf Little Corn Island zgoh, will mir dene Lüt do eifach zwänig traut hend das üsem Boudi nünt atüänd. Selbst dFischer nämäd de Motor immer mit is Huus will er susch klaut wird. Dezuä hät niämert ä Huus gha womor de Boudi hetted chönä iistelle wo sicher gsi wär.

Mir hend den no chli dUmgäbig gnosse und sind wieder wiiters richtig Landesinnere.

Uf em Weg richtig El Rama hemmer no ä Iheimischi mitgno wo so richtig abartig freud gha hät a üs. Sie hät i de Tina sogar ihren Ring gschänkt wil de so guät zu de Chettle passt wo de Marco ihre kauft hät. So liäb! Sie hät üs den au no noch üsne Nämä gfroged das Sie üs uf Facebook chan hinzuä fuägä J lustig

in ganz Mittelamerika de total Hit!

üsi Honigverchäuferin, grad bevor Sie id Schuäl isch

Mir möchted üs nomol höflich entschuldige dass es solang gange isch bis üsi 2 letschte Blogs erschiene sind. Leider hend mir ab und zuä chli Internetproblem. 

Wiiter in Süde mit de Ann und em Sven

üsi super guät Duschi

dJungs am bubele

Sven und Tina am Chinderhüätä

 dJungs hend en super schöne Tag gha bis grösse, worschindli äs beste Erlebnis vo beidne bis jetzt. Wenn au de Marco mol wieder gstürzt isch und beidi Ärm offe gha het.... Beidi wiesed aber jeglichi Schuld vonene ab. De Zuästand vom Töff seg es Problem gsi.

de arm Marco mit sim BEBEE

(Bim Surfe sinds Bretter oder dWelle wo nid guät sind.... sisch immer öppert andersch tschuld J)

Janu, mir sind den wiiters donneret Richtig Grenze zu Honduras, womor nomol äm Stopp bimne ganz chline Strand iigleit hend. Die Chind wo dört gwohnt hend, sind sichtlich begeistered gsi vo üs. Sie hend di ganz Ziit wele mit üs Volleyball spiele und uf de Slakline umätanze. Sogar am Obed sinds mo zu üs is Moskitonetz iä cho und hend bem Spieli spiele zuägluägäd. Wo mir scho müäd gsi sind, hend die Chind immer nonig wele go pfuse und so hends mir den halt müäsä usäwörfe.

Am nögste morge sind mir den grad wiiters düüsed zude Grenze uf Honduras. Mir hönd wiä immer Problem gha zum all diä Grenz-Hälfer abzwimmle wo üs für e chli Trinkgeld wend helfe ade Grenze. Da mir mittlerwiile aber güäbti Grenzgänger sind, hend mir das älei gmeistered. Guät, me müäh sägä das Tina jedesmol e paar graui Hoor meh hät, will sie sich so dermasse ufgregt über diä Zöllner.

In Honduras hend mir eigentli nu churz wele durefräsä, aber will mir am Zoll 35 Stutz hend müäsä zahle zum sAuto i das Land zbringe, hend mir entschlosse paar Täg do zbliebe. Uf üsere To Do Liste isch no dZigarreherstellig offe gsi, also hend mir üs uf Danli durekämpft. Underwegs hend mir imne chline Bergdörfli übernachtet. Anschiindend muä das gemäss Lonly Planet e MUSS sii in Honduras. Aber das Dörfli hät weder Resti no Hotel und dMine sind also au nümme dass wos mol gsi sind. DUussicht isch aber ächt hammermössig gsi. Und natürli au dBewohner vo dem Käffli. Chum sind mir us em Auto usgstiege, scho sind ettlichi Chind um üs gstande. Die hend üs also bis am halbi 11 am Obed nümm älei loh! Es sind immer meh cho und mir hend üs mit Händ und Füäss probiert zverständige. Am spote Obed sind den au no 2 Müättere cho. Mir hend diä Lüüt also fasch nüm los brocht.

Am Morge sind mir den mit de Chinde zude Mine gloffe und jedes Chind hät öppert vo üs wele hebe. Also hend mir topfer we mir sind, jede eis bis 2 Chindli as Händli gno und sind zuägwatschled. Aber wiä scho erwähnt, diä Tour isch nid so sehenswärt gsi.

Mir sind denn au ziemli zügig wiiterzoge. dChile het am 2 am Nomittag agfange und mir hend uf kann Fall welä mit de Chind dört ine höckle.

Da Sunntig gsi isch, het leider au üsi Zigarrefabrik zue gha und mir hend das verschobe uf Nigaragua.

Noch em Grenzübertritt is neue Land, sind mir richtig Somoto gfahre zum dört e gführty Canyoning Tour zmachä. Netterwiis hend mir grad be dem Guide dörfe ide nöchi pfuse und hend somit nünt extra müäsä zahle. Am Morge ischs den grad los gange zu dere Tour. Es isch hammer megä lässig gsi. dJungs sind sogar vo ca. 20 Meter is Wasser jumpt. Het super usgseh! Die ganz Gegend isch atemberaubend gsi.

Noch dem Erlebnis hend mir no Zmittag gesse be dem Schangli und sind wiiters richtig Esteli gfahre. Endlich hend mir chönä go ä Stumpefabrik go aagugge. Isch sehr intressant gsi wieme das alles macht. Und natürli hend mir au no chli Vorrot kauft. dFraue hend Cigarillos kauft und dManne öppis rechts J

Wo mir den öppis zum pfuse gsuächt hend, simmer imne chline Dörfli go frooge öbs echt möglich sei be Ihne uf em Parkplatz zübernachte. Mir hend denn üses Schlofplätzli ufgstellt inklusive Tisch und so. Grad womor mit üsem Znacht fertig gsi sind, chunnt einig o froooge öb mir wend mit ihne Znacht esse mir sind herzlich iiglade. Mir sind alli randvolle gsi und drum hend mir dankend abglähnt. Am Morge hends üs den Kafi brocht das mir wach werded. Ganz e liebi Familie isch das gsi!

Mir müänd würkli mol no erwähne wiä super diä Lüüt do sind. Klar gits schwarzi Schoof, aber dMehrheit vo de Iiheimische vo de letschte paar Länder sind eifach mega gsi.

DZiit wird langsam knapp. Nur no 4 Täg bis üsi liäbstä Striithähn wieder heimflüged und mir üsen normale Reisetrott ohni Süässigkeite und Gourmemenüs fortsetzed.

Mir sind zersch uf Leon und nochane no an Strand vo Las Penitas. Wie mir halt so sind, simmer mit üsem Boudi a allne Autos und direkt an Strand gfahre. Meeresblik vom feinste! De Marco und de Sven hend sich grad as Fische gmacht und dLadys hends Duplexhuus ufgstellt und iigrichtet. Wils üs allne so super gfalle het a dem Strand und de Sven und dAnn jo no hend welä chli relaxe bevors wieder go schaffe müänd, simmer grad 3 Täg bliebe.

dJungs am fische

Leider hend dJungs i dene 3 Täg nid ein Fisch gfahre. Anschiinend isch dSchnuur nid gnuäg dick gsi. Womor den extra nomol uf Leon gfahre sind zum bessere Fade zchaufe, isch den halt eifach de Köder nig guät gnuäg gsi.... Segs wiäs well, mir hend denn halt müäsä än  4 Fisch chaufe. Die 3 Täg sind verfloge wiä im Flug und scho isch Friitig gsi.

Mir hend üsi Duplexwohnig wieder iiklapped und hend us uf de Weg richtig Flughoof gmacht. Zersch simmer no churz die Hauptstadt Managua go shoppe und denn hemmer üsi 2 Fründe im Best Western Hotel iicheckt womor grad no gschnäll ä Duschi gno hend J

Miteme lachende und ämä brüäländä Aug hend mir Abschied gno und sind wiiters gfahre is nögste Abendtüür wieder zweite älei.