Bolivie – alles wird besser

ein chliine Teil vo La Paz

Noch dem Schock vo Peru, hend mir us wie Chliini Chind gfreut uf Bolivie zcho. Mir hend üsen Boudi grad als ersts bim Ernesto Hug (em schwiizer Mechaniker) abgstellt und sind is Hotel Oberland äs Zimmer go beziäh. Mir hend 3 Täg en super schwiizer Service gha. sZimmer isch schön gsi und sBadzimmer no viel schöner. Mir hend i dene 3 Täg nu sältä äs Zimmer verloh. Aber au die Täg sind mol verbii gange und mir sind wieder zu üsem Boudi retour. Die nögste paar Täg hömmer i de Garage pfused bim Ernesto. Tina isch am Morge id Spanischschuäl gange und de Marco het de Boudi pflägt.

So ä suberi Garage wie in La Paz hend mir also no niä gseh. sWerchzüg und de Bode isch also blitz blank gsi.

Noch 4 Täg i dere Wechstatt hät üsen Boudi wieder gschnurrlet wiä ä Wildchätzli. Und so hend mir üs uf Todesstross vo Bolivie getraut. Aber so schlimm isch die Stross gar nid gsi. Äs isch zwor ab und zuä scho ziemli bergab gange und dStrosse sind au mängsmol chli schmal gsi, aber ohni Gegeverchehr isch das überhaupt ka Problem.

Da mir Richtig Cochabamba (über Umwege) hend wele, sind mir den abboge in Tschungel. Ab jetzt sind dStrosse nur no halb so guät gsi wie uf de Todesstross. Und vor allem hend mir wegem Schlamm nur no im Schritttempo chönä fahre. Zum Teil häts us Chüble grägnät und sisch äs riese Abentüür gsi. Wo mir uf dCharte gluägäd hend wo mir öppä sind noch 8 Stund fahre, hät üs fasch de Schlag troffe. Mir hend nid mol 1/5 gschafft vom Wäg bis a üses nögste Ziil. Dezue hät de Boudi extrem Durst gha die letschte Kilometer. Durchschnittlich 28 Liter hättor verbruucht bidene Strosse.

Noch langem überlege, hend mir den ä Schlaufe gfahre und sind wieder retour richtig La Paz. Wils en Tag vorher super schöne Schnee anegleit hät uf em Pass obe, hets abartig viel Lüüt dört gha und mir sind ganzi 6 Stund im Stau gstande. Und wil jede Sunntig allgemeins besüffnis isch in La Paz, simmer dört grad au nomol gstande. Oh jee das isch än lange aber intressante Tag gsi.

Uf Boliviens besten Strassen sind mir den Richtig Cochabamba gfahre. Boliviens beste Strassen sind öppä so guät wie be üs die schlimmste. Ojee minee. Und au a dem Tag sind mir Dank em Stau nid wiit cho. Und au en Tag später hemmer nomol chli Stau gha. Herrgott nonemol!!! So schlimm Stau hend mir no niä ärläbt sit mir uf Entdeckigstour sind. Ab Cochabamba bis uf Santa Cruz sinds dän zum Glück nur no sehr wenig Autos gsi. Richtig herrlich.

dLandschaft isch sagehaft schön gsi. Und mir hend jedetag ä super schöns Plätzli gfunde zum schlofe. Santa Cruz söll angeblich schlimmer siii wie La Paz vode Kriminalität und so. Chan möglich sii, aber do ischs jo scho grad mol einiges schöner. Erstens sind mir endlich mol wieder im Summer aacho und me chan ohni Schlofsack schlofe! Und zweitens hend die genau so ä schöns Stadtli. Also üs hät so guät gfalle, dass mir grad 2 Nächt bliebe sind bevor mir wiiters richtig Grenze gfahre sind. Zwüsched Santa Cruz und Brasilie ischs Land vode Jesuite. Genaueri Infos über das Volk chönder jo im Internet sälber läsä...

Das Land do isch zwor sehr troche, aber so was vo schön und Tierriich.  Die erst Nacht hend mir binore Lagune verbrocht womor zum Glück nid go bade sind. Denn am nögste Tag hend mir erfahre, dass Piranhias dört wohned :(  I dere Nacht sind mir abartig vode Moskitos ufgfrässä worde. Ojee hät das bissä!!! Bekakti Fiicher.

Naja, so ischs halt. Lieber Chalt und kei Mugge oder Warm und verstoche werde???

A üsem nögste Schlofplätzli hend mir dKlara kännä glärnt.

Chum hend mir de Boudi abgstellt, scho isch än härzige magere schwarze Hund uf üs zuäzrännä cho. Sie isch vo aafang aa ziemli zuätraulich gsi und total verspielt. Sie het üsi Herze im Sturm erobered. De Marco hät Ihre den mol Wasser und chli zässä geh. Leider hemmer algemein nüm viel zässä gha, also hät sie Wasser mit Schoko Konrflakes übercho. Tina hät Ihre den aber no paar Brootmöke mit Haferflocke geh. Wo die Klara den am nögste Morge immerno nebed üsem Boudi ghocked isch, hemmer üs agfange Gedanke machä öb de Hund den niämertem ghört??!? Das nid grad i de Nächi ä Dorf oder so gha het und Sie aber doch sehr zuätraulich gsi isch, sind mir devo usgange das Sie usgsetzt worde isch. Natürli hend mir mit em Gedanke gspielt zum dKlara mitzneh, aber so churz vor de Grenze??? Ohni legali Papier??? Chunnt das guät??? Mir hend üs den entschiede, dKlara mitzneh und Sie uf de nögste Hacienda abzgeh.

So hend mir das den au gmacht. Es paar Kilometer spöter häts e einsami Hacienda gha womor Sie usäglo hend.  Wie mir den usägfunde hend, isch dKlara sini Hündin wo wäggloffe isch. Und so hemmer üs vo üsem chline Hund verabschieded und sind gange. Au wenn mir dKlara sowiso nid hetted chönä mitneh, so hemmer ebe doch beidi e bizli ghofft dass üsi Klara niämert wett und mir sie müänd bhalte.

Truurig sind mir wiiters noch Aguas Caliente. En chline Camping mit eme heiss Wasser Fluss. Mir hends fasch nid chönä glaubä, aber i dem Fluss hät mä sich fasch dFüäss verbrännt. Sisch abartig geilo gsi. Und für im Marco sind Rugge wo scho sit längerem Problem macht, isch das de absolute Oberknüller gsi. Ganzi 2 Täg hämmers üs dört guät go loh. Sozsägä Wellnessferie hemmer üs gönnt. Hihi.

Über dGränzä bis noch Brasiliä häts au überhaupt ka Problem geh. Alläs am Schnürli gloffe. Alli Lüüt super fründlich gsi.

Polizei Boliviens

Wie viel schlimmi Gschichte hemmer scho ghört vode Polizei. Korrup wos numä goht. Au das chan guät möglich sii, aber mir hend nid ein dummä Polizist kenne glernt. Jede hät üs fründlich grüässt und üs dHänd gschüttled. Nid eine hät no chli Gäld wele. 

Tankstelle Boliviens

in La Paz und Santa Cruz hends üs zum Teil kei Benzin dörfe verchaufe will mir Usländer sind. Sie hend üs aber au gseit, dass de Kanister dörfed uffülle. Hejo das hend mir den au so gmacht :)

Die Tankstelle wo a Usländer Benzin verchaufed, häusched meistens de 2 bis 3 fache Priis wie de vode Iiheimische. Wemes Benzin in Kanister füllt, gits aber de gliich Priis wiä die Iheimische. Und uf em Land usse hend mir au ohni wiiteres zum normale Priis tanked (ohni Kanister)

so ab gohts in Pantanal

in Bolivie isch immerno viel hand made

De Marco am wäschä wiä än Wilde

Chrigi und Tini am shoppe

de Marco hät a allem freud wo en Lärm macht

Tucan

im Valle de la Luna mit 2 Schwiizerinne womor kenne glernt hend