ab in Süde

Zwüsched de Chalch Bäder und em Meer sind endlos vili Kurve gsi und de Sven und sTindli sind bi jedere Kurve ufenand glägä (mir hend leider ka Sicherheitsgürt hinne). Mit de Ziit het sich den au ide Tina ihres Mägli welä entläärä, hets den aber doch nid gschafft. En churze Stopp binere Mezcal Fabrik het allnä ihres Mägli chli beruhigt. Noch em degustiere hend mir üs für 2 Fläschä entschiede. En süässä fürd Fraue und en harte für dManne.

Üsen negste Stopp isch bemne super schöne Stausee gsi. Eigentli hemmer nu churz welä öppis knäbberle, aber es het üs so guät gfalle, dass mir üs grad für dNacht iigrichtet hend. dAnn isch au langsam wieder under de Läbige gsi und so hends mir alli richtig gnosse.  Bim Bade im See hemmer au no abartig komischi Fisch aatroffe. Am Obed hemmer e grosses Lagerfüür gmacht und üses eigene Brot bached (grillt)

Die Nacht sind immer mol wieder es paar Mexä uftaucht und hend au am Strand gfästäd. Sisch immer chli öppis loos gsi.

Chum isch dAnn wieder under dä läbige gsi, isch de Sven under di halbtote gange. Er hät chönä ässä wanor hät welä. Alläs hätor wieder usäloh dä arm! Nochdem mir alläs ufgruumt und iipackt hend, hemer üs uf dä Wäg richtig Meer und Grenze zu Guatemala gmacht. Mir hend üs für dSchmugglerroute entschiede, will diä am schnällste goht. Währäd mir über Touriste Route gange, hets üs 2 täg meh kostet. Aber wiä sichs usegstellt hät, isch die richtig Entscheidig gsi.

Wils doch no en rechte Weg gsi isch bis zur Grenze, hemmer üses Nachtlager binere Tankstell ufgschlage. Sisch nid ganz so romantisch gsi wiä am See, aber es isch gange.

Am sicherste ischs dört wos tag und nacht lüüt het. Und be dere Tankstell häts sogar no än Security umägha. Sicherer chamä sich do gar nid fühle. Am Obed hemmer no chli Spieli gspielt (jop sogar au dTina) und mir hend üs no mit iiheimische underhaltä. Isch ziemli lustig gsi. Diä Iiheimische hends uu lustig gfunde, dass mir ka Spanisch chönd, und no viel cooler hends gfunde, das mir ihne e SchwiizerSchoggi geh hend.

Am Nögste Morge simmer scho ziemli früäh ufbroche, will mir gwüsst hend, dass dGrenze ziemli happig wird werde. Ade Grenze acho hemmer au scho än Mex gfunde, wo üs het welä hälfä für e chlises Trinkgeld. Häjo mir hend ihm den üsi Papier geh und de isch vo Lade zu Lade gsecklät das mir so schnäll wiä möglich über sZoll chömäd. Är hät das würkli sehr guät gmacht.... hemmer sgfühl gha.

Leider leider hend mir erst zspoot gmerkt, dass üs de liebi Herr über sOhr gno het. Er het üs verzellt, dass me in Guatemala au muä 200 Dollar Deposit geh fürs Auto, wome denn wieder retour bechunnt... so wiä in Mexiko..... Nu leider hät das gar nid gstumme.

Üsen Fehler.... mir hetted üs zersch no sölä informiere bevor mir überd Grenze sind.

Aber oh mann.... mir hetted ihn alli chönä so richtig vermöble womor das usägfunde hend. Janu Scheisse!

In Guatemala sind mir den grad zersch mol zum Lago de Attitlan. Gemäss Reiseführer isch das e absoluts MUSS. Mir müänd also au klar sägä: wänn dä Näbäl nid gsi wär.... denn wärs ganz bestimmt absolut hammer gsi.... Nur äbä leider häts immer Näbäl gha und mir hend nid würkli viel vom See gseh. Mir hend üs den aber doch entschlosse no ganz um de See umäzfahre ide Hoffnig, dass de Näbäl imne Tag wäg isch. Leider isch das aber nid dä fall gsi. Mir hend den in San Marcos am Strosserand übernachted. Es Dörfli sälber isch ganz härzig. Es hät zwor sehr viel Hippis, aber trotzdem hets sin Charm bhalte (oder vilicht ischs us dem Grund überhaupt so e härzigs Dörfli worde)

Mir sind den vo Dörfe zu Dorf um de See umägfahre und i jedem Dorf hemmer wieder müäsä e paar Quezales zahle das mir hend dörfe durefahre. Ojee hend mir üs do ufgregt. Und irgendwenn hemmer ka Münze meh gha und uf dNote hends üs nid chönä usägeh. So hömmer vo Lade zu Lade müäsä fahre zum Gäld wächslä. Mir hends den aber doch irgendwenn gschafft und sind i einere Eile grad an SurfStrand vo Guatemala gfahre.

Leider hend mir da Surfcamp wo mir gsuächt hend nid grad gfunde und mir hend zersch mol no müäsä üses Lager irgendwo im Nirgendwo ufschloh. Mir hend aber brav gfroged öbs okey segi zum do zcampe und das ältere päärli hät gseit das es überhaupt ka Problem segi. Mir hend den au di ganz Nacht öppe 5 Hünd um üs umä gha wo üs tapfer beschützt hend. Zum Dank hend mir den au alli gfüätered mit Toastbrot.

Am negste Morge hend mir den doch no es Fischerdörfli gfunde wo es Surfcamp isch. Es ganze Dörfli het richtig uusgstorbe usgseh, aber gege Obed sind vo überall her dLüüt cho zum de Iheimische Chind go zuäluägä wiä diä surfed. Und ich seg eu, es het eine gha wo eifach mega gsurft isch. DBretter sind scho 3 mol wieder zämä gflickt worde und trotzdem hends diä voll im Griff gha.

Am nögste Morge hends sich de Marco und de Sven den au mol es Brett gmiätäd und sich id Welle gstürzt. 3 Stund sind wiä wildi im Wasser umäpadled und hend jedi Welle probiert zsurfe. Sisch vilicht nid immer gange, aber sie hend das super gmacht. dAnn und dTina hends bevorzugs am Strand zblibe und Ihri Fründe chli aazfüüre.

Uf dem Campingplatz wo mir gsi sind, isch alläs sehr familiär her und zuä gange. Am obed het mä zämä znacht gesse und alli hend vo ihrne Reise verzellt. Mir hend au ganz viel Tips übercho vom Bsitzer vom Camp. Er isch Peruaner aber vor Johre uf Guatemala cho.

Will dWällä anschiindend doch nid so super gsi sind (die Ussag isch spöter den aber wieder zrugg gno worde) und au will mir jo au scho die Halbziit gsi sind mit üsne Gäst, hend mir üs uf dWiiterreis richtig El Salvador gmacht. Das Land der tausend Surfspots.

Uf em Weg bis idi nögst grösser Stadt hend mir no en Profi Fotograph mitgno wo vergässä hät zdusche vorem losfahre. Tina häts schier de Pfau gmacht wo de grüsel no sin Arm über sie duregleit hät. Pfui teufel hät de gstunke. Aber äs isch jo nur chli meh wiä ä Stündli gsi wo Tina hät müäsä liide J

Über dGrene vo Guatemala nach El Salvador hets den wieder so liäbi Hälfer ümägha, aber damol hend mir üs nid welä übers Ohr haue loh. Aber es isch nu halb so schlimm gsi. De liäb Härr hät numä 25 Dollar welä für sini 4 Stund woner investiert hät für üs. Das heisst eignetli nur dHelfti. Mir sind äbä no miteme düütsche Biker über Grenze (hömmer uf em Weg mol ufgläsä und Fründschaft gschlosse)

In El Salvador acho hets scho aagfange iidunkle. Also hemmer nüm würkli viel Ziit gha zum e Plätzli zfinde. Klar isch gsi, das mir e Hotel bruched. De Biker hät nämli weder Zelt no susch was debii gha. Mir hend üs den im wiit und breit einzige Hotel i dem Kaff underbrocht. Leider hät dä Boudi nid platz gha zum in Innehof zfahre vom Hotel, also het de Marco und Tina dusse ade Stross pfused. Direkt nebed em Beerdigungsinstitutt. Bide Tote isch sowiso am sicherste. Diä machäd eim nünt meh. Nochdem mir no churz öppis go ässä sind ischs am 10i plötzli totestilli gsi uf de Stross. Nid mol me Streuendi Hünd häts umägha. Isch doch e bizli e komischs Gfühlt gsi. Aber defür ischs ab em 12i wieder abartig luut worde uf de Strosse. Eigentli heisst jo das in Mittelamerika au di iiheimische nid zNacht umäfahred. Aber all paar Minute sind riese Lastwägä am Boudi verbiidonnered so das es scho fasch unmöglich gsi isch zum schlofe. Aber au diä Nacht isch mol verbii gange. Nochdem am 5i dVögel aagfange hend zum umäzwitschere händ mir beidi kei Aug me chönä zuä tuä. Mir sind üs vorcho wiä im Urwald.

Nochdem mir üs au vo dem chlini Dörfli verabschieded hend, sind mir noch El Zonte gfahre und hend dört wieder üsi Zelt ufgschlage. Für 3 Dollar chunnt me do ä super Plätzli über, au wänns vilicht nid grad es suberste Plätzli isch.

Üs häts uf jedefall gfalle.

dWelle, diä liäbä Wällä...... de Strand sött eigentli super sii zum surfe, aber de Marco und de Sven hend au die Welle nid perfekt gfunde. Wer weiss a wäm das glägä isch.... no comment J

Langsam hend üsi Jungs ka Lust meh gha zu surfe. Also isch mol wieder en Relax Tag aagstande. Für 20 Dollar hets Toure gha zumne Wasserfall. Mir hends aber selber wele finde mit em Auto und hend so numä 2 Dollar iitritt zahlt. De Boudi hend mir bide Polizei üsem Fründ und Hälfer abgstellt und sind den mit e paar Chind loostrottled richtig Wasserfäll. Will sTindli Höheanst het, ischs ihre scho  vo aafang aa nid guät gange. Bide Wasserfäll het Sie sich nidemol getraut zum abäluägä. So äs Weichei! dJungs und Ann sind in Wasserfall iä gstrunge und hend voll dä Spass debii gha und sTindli isch eifach nu am Bode ghöckläd und het dStunde zellt bis sie wieder hät dörfä wäg vo dere Schlucht. Ajajajajaj. dAnn hät au no än gratis Iilauf übercho bim abägumpä und de Sven ä super Siite-Plätscher-Massage.... Alli sind zfriede gsi

Hüt sind dMannä am Buäbälä. Sie hend sich Dirt-Bikes gmieted und erkundet chli El Salvador. dGirl sind bizli dihei und dörfed sich erhole vo de Männer. Also me muä scho sägä das es nid immer eifach isch mit so Männliche Zickene. Fraue Zicke sind jo scho schlimm, aber männer wo zicked sind den also dHöchi. Will mir aber üsi Manne abgöttisch liäbäd gönd mir au dur diä Phase mitene J

 wiiiiteri Details folged..........

Abentüür zVierte

Am Sunntig am viertel ab 2 sind mir pünktlich uf d Minute e halb Stund zfrüäh am Flughoof gsi zum üsen Zuäwachs zempfange. D Namenstäfeli sind ide schönste Schrift gschriebe gsi und dBowle isch parat im Chuälschrank gsi.

Pünktlich und doch e halb Stund zfrüäh? Mir hend extra wele chli früähner in Huatulco zsii zum üs no zerchundige wo welä Flug achunnt und so.  Wo mir den das alläs gmacht hend sind diä 2 Schlofmütze scho sammt Gepäck vo üs gstande. E ganzi halb Stund zfrüäh. Die ganz Herzlich Willkomme Party um suscht?!? Nei nei, mir hend das ganze churz zrugg drüllt und die beide hend nomol retuur müäsä laufe und mir hend nomol ziit gha zum sie inklusive Drink und Namenstäfeli willkomme zheisse J

Chum acho in Puerto simmer grad no gschnäll an Stand abä gspaziert und hend en Schwumm gno und de Sunneundergang gnosse miteme chüälä Bierli.

Am Mäntigmorge hemmers ganz gmüätlich gno. Die Chäsbleiche Schwiizer hemmer jo nid grad vo afang chönä id Sunne jage. Am Nomittag isch den aber scho die erst Surflektion uf em Plan gstande. Und es isch absolut super gloffe. DWelle sind zwor nid riesig gsi, aber mir hend alli super Wällä gstande. Au dAn wo erst ei mol uf em Brett gstande isch het dWelle wiä än Profi gritte.

Am Obig simmer alli total kaputt gsi, aber trotzdem hemmer üsen Erfolg no müäsä fiire.

Am Morgen darauf simmer immerno kaputt gsi und hend dezuä ane no Muskelkater gha wiä grossi. Wil dAnn und Tina so freud a ihrem Erfolg gha hend, sind grad nomol go Surfe am Morge am Nüni. dJungs sind uf eigeni Fust go surfe (probiere).

Au wänns surfe voll de Spass isch muämä immer wieder erwähne, dass es en knallharte Sport isch wome au mit Verlust muä rächnä. De MacGyver het chli problem mit de Finne gha und sich de halb Fuäss ufgschlitzt und dChnü vom Sven het usgseh als wer er en Kilometer uf de Chnü gloffe und dTina hät bide letschte Welle de Chopf in Sand gsteckt wie en Strauss. dAn und de Sven hend beidi fasch nüm chönä schnuufe wil Ihne dRippis weh gmacht hend.... Also äbä.... Schmerz um Schmerz aber immer mit Elan mit dabei!

Am Obed simmer mit em Pascal (en super coole Siäch vo Buochs, wo mit üs is Spanisch isch) go znacht esse und hends üs guät go loh. Aber wiäs halt so isch sind üs am 10i scho fasch dAuge zuägheit. So hend mir ohni gross Party zmachä müäsä hei go pfusä.

De Mittwuch morge ischs den au scho sowiit gsi das mir Puerto Escondido „uf Wiederluägä“ sägäd und üs uf dWiiterreis machäd. Es isch begost nid eifach gsi zum üs vom Paradies zverabschiede. Und es isch üs uf die eint Siite würkli schwer gfalle zum go, aber mir sind Reisevögel und müänd halt eifach wiiterziäh.

Vollpackt sind mir richtig Süde gfahre und sind ine wiiters Paradies cho. Mazunte isch zwor bekannt für Nudiste, aber wämä sich nid uf diä Hängetittis und churze Servelat – Schnäbis vo de Ü 60 achtet ischs än durchus schöne Strand J Da mir jo nu ein Monet Ziit hend mit üsne 2 Frischlings hend mir scho am negste Tag wiiters müäsä richtig Oaxaca.

Ei Kurve um di ander ischs Berguf und wieder Bergab gange und da Oaxaca isch eifach nid nöcher cho. Wil mir nid hend welä die Nacht fahre, hend mir üs ä super Plätzli chli abseits vode Stross gsuächt. Gesucht Gefunden! Mir hend alläs uspackt und iigrichtet, do chunnt plötzli en Mex mit sinere Familie verbii und probiert üs zerchlärä das do ä Gföhrlichs Gebiät isch und mir do nid chönd schlofe. Häjo, mir hend den brav alles wieder zemepackt und sind wiiters gfahre. dSunne isch sich scho langsam am vorabschiede gsi, womor ä Tankstell gfunde zum üses Schlofplätzli ufzstelle.

Mir hend den bemne Bierli am Obed de Sven und dAn no chli ufklärt über sLäbä in Mexiko. Dene 2 hetme so ziemli sehr angst iigjagt bevors zu üs cho sind.

Sisch natürli scho so das mä sehr ufpassä muäs in Mexiko, aber ich glaubä mir hend das langsam im Griff. S chan natürli immer öppis passiere und das wüssed mir au, aber hoffe tüänd mir das jo nid. Für die nögste 4 Wuchä tüänd mir uf jedefall no viel meh ufpasse wie suscht, wil für üs dSicherheit vode dAn und em Sven a erster Stell isch.

Nochdem mir dNacht ade Pemex überlebt hend, sind mir den wiiters gfahre uf Oaxaca womir grad zersch im Marco sini Brüllä go flicke sind. Noch 4 Monät gseht dä Marco wider öppis mit sinere Brülle und er isch wieder wahnsinnig glücklich J Noch dem super Erlebnis simmer uf Monte Alban god Usgrabigsstätt vode Mayas go aluägä. Shät üs allne ziemli guät gfalle trotz de Hitz wo üs fasch uuströchnet het. Am Obed simmer zersch uf de Märkt go öppis ässä und den gos Städtli go aluägä. Nebed Guanajuato mit Abstand die schönst Stadt in Mexico womer bis jetzt gseh hend.

Üses Schlofplätzli hend mir den vor em Walmart iigrichted und hend grad no e Mitternachts-Shopping gmacht.

Am Samstig Morge het den dAn de Pfau gmacht und het greieret und pflüderet wa gange isch. Diä arm hät irgendöppis schlächts gässä am Friitig uf äm Märkt und am Samstigmorge hät Sis WC vom Wallmart so ziemli sehr guät und lang inspiziert J

Mir hend üs den alli mega fest müäh geh zum dAn vo A bis Z zverwöhne. Mir hend all zämä richtig Mitleid gha mit Ihre. De ganz Tag isch Sie wiä äs hüüfeli Elend umäglägä.

Am Nomittag sind mir den am Hierve del Agua acho und hend üs grad i die Chalch Bäder gmacht. Wils üs so guät gfalle het, hemmer dört au grad übernachtet. DAn isch am 8ti scho dSchöfli am zelle gsi. Leider ischs au am Obed nonig besser gsi!

Am Morge Früäh isch de Svenöli und de Maaako go de Sunneufgang go fötele und sie hends eifach super breicht! Nochdem dAn Ihres Gschäft erlediget het und mir sie wieder is Patientebett iibettet hend, simmer wiiters gfahre richtig Meer.

Puerto Escondido 3

Puerto isch dä Hit

Jetzt sind mir scho en Monet in Puerto und es gfallt üs immerno super guät do. Es Plätzli wome sich durchus chent vorstelle äs paar Jöhrli zblibe.

Aber mir hend jo no vieles vor i dem Johr. Argentinie isch no wiiit eweg!

Tina hät Ihren Spanisch unterricht jetzt au beendet und mir chönd die wichtigste Wörter zum üs verständige. Ehrlich gseit chönd mir sehr sehr viel Wörter, nu falläd diä üs eifach nid im richtige Moment iii. Janu, sisch jo no kann Könner vom Himmer gheit.

Idere Ziit wo Tini die Schuäl gsi isch, het de Marco super Arbet gleisted am Boudi. Wil mir chli Platzmangel gha hend, isch de Mc Gyver wieder in Iiisatz cho. Er hät än Heckbumper für de Boudi gschweisst. Und äs isch (wiä nid andersch zerwarte gsi) super usecho.

Surfe: Hmm jo do gits nid allzuviel zverzelle. Mir hend usägfunde, dass mir totali niätänä sind! Tini hät scho bi 2 Meter Welle dHose voll und de Marco hät angst vor de vielne Surfer. Also me muä do däzuä au sägä, dass au die „bessere“ Fahrer nid würkli viel Wällä surfed. Wämäs chan ischs äs Träumli zum die Welle zsurfe, aber bis mäs chan..... gohts sehr sehr lang. Mir hoffed jetzt, dass üsen Surfinstruktor Svenöli üs no paar Tips chan geh.

Mir hend super guäti Lüüt kännä glärnt do. Und äs isch uu lässig gsi zum Reisegschichte vo andere zghöre. Shät üs au guät to zum chli under Mänschä zsii....

Iiiwohner:

Mir chönd üs würkli nid beklage über das Volk do. Au wämä viel schlächts ghört vo „Diäbstääl“ so hend mir bis jetzt no nüt so öppis zum brichte. DFamilie vo dem Hotel wo mir wohned sind all zämä ganz ufgstellti und hälfäd üs wos nur chönd. Üsen Nochbor (Name hend mir leider vergässä) isch eifach hammer (und gseht also au ratte scharf uus .... für diä wos intressiert) obwohl er vo sine Fraue verzellt, hend mir ehner es Gfühl das mir meh Manne us sim Zimmer gsend usegoh.... aber äbä, das goht üs jo nünt aa (aber intressant isch äs äbä scho)

Bewertig vode Schuäl:

Mir sind eigentli im grosse und ganze recht zfriede mit de Schuäl. Shet chönä effizienter sii. Bide Bewertig wa üs am beste gfalle het, het de Marco anegschriebe: TUULI. dTuuli isch dAssistentin gsi wo us Finnland stammt und be dere isch jetzt also vo A-Z alles die richtige Mengi am richtige Ort. Drum het die Schuäl au 9 vo 10 Pünkt übercho vo üs....

Aber 3 Pünkt sind eigentli nur weg dere Tuuli. 

***Do muä sich Tina doch froge: Het sie no de richtig Fründ? ***

So mir machäd üs jetzt uf de Weg zum üsen Nochwuchs go abhole. Damol wird er nid vom Storch brocht, sondern vom Flüger. Anschiiinend wils übergwicht hend....

Ab hüt nomittag sind mir den zvierte :)

im Marco sin selber Heckbumper

jetzt hoffed mir mol das da hebäd

Tortuga

Sunneufgang vo üsem Balkon