Scho in Kolumbie hemmers Gfühl
gha dasme da Land nid chan toppe, doch Ecuador hät üs zeigt, dass es locker
chan mithebe mit em Nochborland. Bevor mir uf Peru iägreist sind, hemmer Angst
gha, dass es üs zwänig zuäseit. Doch de Norde vo Peru hät sich üs vo de
Sunnesiite zeiget. De Norde vo Peru isch sehr empfelenswert. Jede Tag en neue
WOW Effekt. Mir hend de 771 Meter hochi Gocta Wasserfall bsuächt, dRuine
„Kuelap“ und Totehüser „Revash“. Natürli hät mä jedesmol de Hang uf müäsä
laufe, so dass mir nid us üsem Training cho sind. Meh chent meine mir sind
jetzt Spitzesportler, nur leider hemmer immerno jedes mol sGühl, mir chönd nid Schnuufe sobalds es bizli de
Hang uf goht.
Da mir nu 4 Täg spöter de Hans
und de Davide am Flughafe in Lima erwarted hend, hemmer müäsä es schöne Gebiät
do verloh und Richtig Süde fahre. Mir sind den über de nögst Hügel duruf
bloched und im nögste Tal ischs no viel schöner gsi. Mir hend nid mol meh äs
Woow usäbrocht. Mir sind würkli sproochloos gsi. Uf em Abäwäg hend mir imne
chline Buäb den no gholfe sini Schoof hei ztriiibe. Lustigs Abentüür gsi.
Zwüsched Trujillo und Lima hömmer leider nüm so viel zstuune gha. 2 Täg lang
sind mir numä em Sand entlang gfahre. Die erste paar Stund sind zwor au
intressant gsi, aber sisch den chli gar au zviel Sand gsi und zwänig grüän.
Dezuä händ mir au sehr guät gseh, dass do dArmuät sehr sehr gross isch.
dFamilie wohned do in Schilfmattene und vielmols hends nidmol ä Dach drüber.
Pünktlich, ein Tag zfrüäh,
sind mir den in Lima acho. Mir hend üs im Hitchhikers Backpackers iiquartiert
und sind grad go lädälä. Gspanne wie e Flitzboge sind mir den am nögste Tag an
Flughafe und hend de üsi Herre willkomme gheisse. Erstuunlicherwiis isch de
Herr Bettoni würkli us em Flugzüüg gstiege und het au de Aaschiin gmacht zum
länger bliibe.
Die erste 2 Täg hend mir no in
Lima verbrocht und sind den wiiters id Cordillera Blanca. Leider sind mir nid
allzu wiit cho..... Nochdem de Hans üsen Boudi en riese Hügel duruf zwunge het,
isch irgendwas nüm guät gsi. Üses Einundalles het plötzli de Hitzgi übercho und
hät sich gweigeret zum wiiters fahre. Mir hends den aber doch noch as Ziel
gschafft. Mir hend üs id Wanderstifel iäzwängt und sind go dLagune 69 go
besichtige. Üsi 2 Frischling hend sich super guät ad Höchi gwöhnt und sind grad
de Hang ufgrennt wamä vo üs nid so chan sägä.
Will mir ä taffs Programm vor
üs gha hend, ischs den au scho wieder wiiters gange retour uf Lima (go
Ersatzteili poschte) und denn ab uf Ica und Nasca. Irgendwenn am Obed am 9i wo
dä Davide am Stüürad gsi isch, gits notzment en Luute Chlapf und de Boudi rücht
we blöd. Füür Füür hämmer gschraue! Mir sind alli us em Auto usägrännt und hend
gmeint jetzt explodiert er grad. Zum Glück isch aber numä de Schluch vom
Chüäler explodiert und nünt hät brännt. Mir hetted nämmli au gar kann
Füürlöscher gha zum lösche.
Wärend dem de Marco ide Garage
mit em Toyotamech umäbastled het, isch de Rest Ica go unsicher machä. Uf em
Juan (Hans) sinere To do Liste
isch gstande Crosse ide Wüästi. Leider hets das in Ica nöd gha und somit hemmer
nomol e Stückli müäsä retour fahre. Zmitzt i de Wüästi hend mir den üses
Schlofplätzli ufgstellt. Je chälter das es worde isch, desto meh Alkohol isch
gflosse. Leider isch genau a dem Obed au no üsen Kocher kaputt gange und dÄlplermakarone
hend 2 Stund brucht bis al dente gsi sind. dJungs het das aber gar nid gross
gstört. Sie sind beschäftiged gsi mit shöttle. Tina isch den irgendwenn mol is
Bettli gange will sie fasch verfrohre isch. Aber dJungs hend no bis am Morge am
2 wiiter trunke. Wo Tina am Morge us em Auto stiegt. Trifft Sie fasch de
Schlag. E riese Puff vor em Auto. Details zu dem Obed wird worschindli niämert
meh genau wüsse, aber es isch lustig gsi. Weniger lustig isch sicherlich gsi,
dass im Davide sini Kamera (wonor i de Jaggetäschä gha het) jetzt chli chised.
Und no weniger lustig isch gsi, dass de Juan sini Cam irgendwo im Sand
verbuddled wieder gfunde hät. Über de Zuästand monich do dezuä jo nünt meh
sägä.
dJungs hend den ä Quadtour
buächäd, aber es isch ziemli langwiilig gsi. Uf em weg noch Nasca sind mir no
uf de Turm klättered und hend die Nasca-Linie agluägäd. Leider isch au das nid
so doll gsi. Me het chönä än Churzflug buächä wo sicher intressanter gsi wär,
aber das hend mir nid wele.
De Weg vo Nasca uf Cusco isch
wieder ziemli hügelig gsi und de Boudi hät rächt zchrampfä gha. Up and down, up
and down! Aber au mir hends irgendwenn mol no bis uf Cusco gschafft. Nochdem
mir einigi Hostels abklappered hend, hemmer den doch no ä Zimmerli für üsi 2
Jungs gfunde. Mit em Boudi simmer uf de Camping gange chli oberhalb vo Cusco.
Cusco isch ä sensationell
schöni Stadt. Mir hend uf dere Reis jo scho sehr viel schöni Städt gseh, aber
Cusco isch eini vode schönste. Da momentan grad High Season isch, hets unmenge
vo Turiste idere Stadt.
Vo Mittwuch bis Friitig sind
de Juan und de Davide uf de Machu Pichu gange. I dere Ziit hend mir de Boudi
pflägt, Kleider gwäschä, Brot bachä und und und. Täg sind vergange wie im Flug.
Am Samstig isch den no
Downhille uf em Plan gsi. Da de Marco immerno beschäftigt gsi isch mit em Boudi
usenand neh und wieder zämäsetzä
hät halt Tina müäsä mit.
Alli 3 hend de Tag super guät
überstande. Die einte hend meh Muskelkater gha und die andere weniger. Tina hät
sogar wele stärbä am nögste Morge..... Aber hauptsach isch, Spass häts allne
gmacht.
Am Sunntig isch den de Tag vom
Abschied neh gsi. Nochore ziemli churze Nacht (gäll Juan) hend aber alli total
fit und munter usgseh. Am 12i sind üsi 2 Herre vom Taxi abgholt worde und
richtig Flughafe gfahre.
Jetzt dörf Tina wieder soviel
Frücht chaufe wiä sie wett.
Was alläs Kaputt/Verlohre
gange isch in Peru:
sGlas vom I Phone
Stuhl Nr. 2
2 Öse am Dachzelt
Schraube vom Stuhl Nr 3
Delle im Tisch
Kocher
Trinkflasche
Brille von Tina
2 Stoffhose vode Tina
Jasskarten
Shotglas von Las Vegas!
Und susch no paar sachä....
Au wenn üsi Pechstränä mit äm Bsuäch agfange hät, wett ich no sägä dass alläs puuri Zuäfäll gsi sind, mir glaubäd nid dass die 2 Herre tschuld sind a üsem Päch.
Au wänn Peru nid zu üsem
favorite Land ghört, hämmer ä super Ziit gha do.
Danke Davide und Juan für euen
Bsuäch