Verschiffig uf Kolumbie

ach wie schön ist Panamaa

nüm so ganz fahrtüchtig

Nochdem mir üs wieder erholt hend vom Abschlussobed mir de Girls, isch los gange mit de Verschiffig vorbereite. Wils e ziemlich chostspieligi Sach isch, hend mir än Verschiffigspartner gsuächt zum en Kontainer zteile. Mir hend au gar nid lang müäsäs suächä, scho hemmer öppert gha. Koste sind 900.00 und denn no ca. 200 für dHafegebühre in Kolumbie – Cartagena.

Imne Blog vo andere Reisende, hend mir gläsä, dass mä am Yachthafe vo Panama gratis chan campä und Duschi/WC benutze. Wie mir usägfunde hend, häts au gratis Internet. Also ischs de perfekt Ort gsi, zum die nögste Täg genau zplane. Lang lang hend mir versuächt än Platz uf eme Sägelboot über dSan Blas Insle zfinde, aber leider händ mir eifach nünt gfunde. Naja, so hend mir üs halt entschiede, di günstigst Vatiante zbuächä. Flug uf Puerto Obaldia (Panama) und den mit Boot und Bus richtig Cartagena. Chosted nid mol halb so viel wiä sSägelboot, aber däfür gsend mir diä schönä Karibische Insle au nid. Aber da mir jo scho klar blaus Wasser gseh hend, störts üs nid wiiiter. Oder äbä doch?

Shopping

Will mir i letschter Ziit sehr sparsam gläbt hend, hämmer beschlosse üs ä Spiegelreflex Kamera zchaufe. De Marco hät mit de Beate immer wieder güäbt wiä das alläs so funktioniert und isch würkli sehr intressiert gsi, drum hät dTina gfunde dass es ä guäti Investition isch.

Ebefalls hend mir no en super guätä Schlofsack kauft, dass Tina nid muäs frühre i de Chältere Regione. (DSchwiiz chunnt langsam in Summer und mir gönd langsam id Chälti)

Am Friitig morge, hend mir üs no muäsä vode Beate verabschiede. Fasch 6 Wuche sind mir jetzt zämä umätoured und hend bis ufs Schlofe und schii... eigentli fasch alläs zämä gmacht.

Wil mir no e Wuchä Ziit müänd tot schloh in Panama. Hemmer beschlosse nomol chli an Strand zfahre. Und will de Sprungplatz au nid wiit eweg devo isch, chan de Marco au no es paar Sprüng machä das er sini Lizänz nid verlührt.

Ziitvertriibe

Will Tina vode Claud Lisminodle, e Hööggli und e Aaleitig dezue übercho het, isch Tina jetzt au fliessig am üäbä. Ihres Ziil isch, Socke, Chappe und en Schaal für beidi zlisme/höögle.... naja luägäd mir mol was do no so usächunnt. Mir halted eu uf em laufende :)

dRegeziit hät üs jetzt definitiv iigholt. Zum Teil schüttets Wasser abä ohne Ende. (Obwohl mir hend erfahre, dass es das Johr no fasch nid grägnet hät) den hoffemer dass mir nid no die richtig Regeziit do kenne lerned.

Nochdem üsen Verschiffigstermin 3 mol verschobe worde isch, sind mir glatti 2 Wuchä uf dem Parkpltz umägammlet. Also langwiilig ischs üs eigentli niä wordä. Shät immer seint oder andere Highlight geh. Jede Obed sind au anderi Reisendi oder Usgwandereti Amis verbii cho üs go bsuächä. Nu halt eines Abends hend üs paar Iheimischi Spitzbuäbä äs bizli Gäld, und mini Cam gstohle us em Auto. Aber äs absolut schlimmste isch jo, dass mini grüän Glückstäschä au wäg cho isch! Hailandstärnäsiächnonemol das isch den gemein!!!

Häjo aber au das isch abghooged gsi, nochdem mir üs glatti 3 Stund uf em Polizeiposte glangwiiiled hend.

dFiona und de Boudi sind zeme i eim Container und gnüsseds zeme für 10 Täg

De Papierkram und sVerlade vom Boudi in Container isch total schnell und ohni Problem über dBühni gange. Mir hend i andere Blogs gläsä dass mä mega viel Nerve brucht und dass es niä vorwärts goht.... Also entweder hend diä nur schlächti Nerve, oder kei Ziit.... Me müä aber au sägä, dass üsi Container-Partner us Brasilie sind und sehr guät Spanisch reded. dAna hät jede Beamte chli agflirted und den het das super funktioniert. Bim Zoll hends nid mol würkli i üsi Autos iägluägäd. Umso meh aber in Usschnitt vode Ana :) hihi

sSegelboot LUKA

Nochdem mir de Boudi und dFiona im Container verstaut gha hend, simmer wieder uf Panama City düüüsed und hend de Obed no mit em Peter (en Dütsche wo i de Staate agstellt isch und momentan in Panama schafft) verbrocht. Er het üs es paar Obed die letschte Wuche bsuächt uf em Yachtclub.

San Blas

Will sich üsi Verschiffigsdate es paar mol gwächslät hend, hemmer schlussendli doch no chöne es Sägelboot buächä für uf Kolumbie.

Am Morge am 5i hemmer müäsä parat stoh für üses 4x4 Taxi an Hafe in Cali. Mir sind natürli pünktlich gsi. Nu di andere Gäst eher nöd so! sTaxi isch den am 10 vor 6i abgfahre. sAuto het Platz gha für 7 (inkl. Fahrer) mir sind aber 9 gsi schlussendli. 3 Stund zämädruckt isch absolut nid de Hammer. Mir hend im Fahrer den au nid so viel zahlt wiä är eigentli hät wele.

 

Am Hafe ischs denn wiiters gange miteme chline Böötli zum Sägälboot. Mir sind herzlich empfange worde mit emne Gebäll vom Wazek. Üsen Captain dBeatre (churz „B“) hät sich au grad vo afang aa um üs kümmeret und dRegle erchlärt.  Mir hend all zämä dän au grad chönä üsi Better beziäh. Mir hend üs grad dHeckbetter gschnapped, will diä anschiinend am wänigstä schwanked bim segle.

Mir sind richtig gspannt gsi uf diä Reis wo anschiiinend so meeega schön muäs siii. 

Mir sind den mol loooos gsägläd richtig Süüde. Und hend bide erste Insle en Halt gmacht und sind go schnorchle.

Tina hät so chli ihri Problem gha mit de Taucherbrülle und em Schnorchel. Irgendwiä hät ihren Chopf so ä komischi Form, dass nünt würkli passt. Häjo Sie hets den glich mol probiert.

es Paradies?

Beidi sind is Wasser plumbst und zum Riff gschwumme. Alläs isch eigentli guät gsi, bis de Marco ine riiise Gelächter uusbroche isch wonor Tina agluägäd hät. Do hät Sie au aagfange lachä und alläs Wasser isch i ihri Brüllä iägfloffe will diä nid so passt hät. Nochdem dTina sWasser wieder besiiitigt gha hät isch nid lang gange bis ihri ganz Brüllä sich wieder mit Wasser gfüllt hät.  De Marco hät eifach nid chönä uf höre mit em uslache!

Noch 2 Liter Wasser schlucke het dTina den mol dSchnauze voll gha und isch wieder zrugg ufs Boot gschwumme. Isch jo guät und rächt gsi da schnorchle, aber sisch halt eifach nid so doll mit dem ganze Wasser.

au dStachelroche sind verträte gsi

Mir sind den wiiters gsägläd und es hät aagfange schiffe. Super Sach! Gmäss Captain mömmer üs jo nid wundere... Sisch jo Rägäziiiiit! Jo guät, stimmt, aber isch halt scho kakke wenns so blöds wätter isch. Mir sind den uf e Insle und hend dört i de Hängematte pfusäd. Au do hät mä chönä schnorchle, aber Tina hät nüm so gross Lust gha. De Marco isch aber mit sini 2 neue best friends gange go alles erkunde. Und siehe da, er het einigi Haie gseh, Stachelroche, schöni Fischli, under anderem de Füürfisch und susch no paar sachä... Leider sind dRiffs me oder weniger abgstorbe gsi.

2 Meter lange Hai

Mir hend den nomol wele uf de Insle übernachte, aber es hät so was vo aagfange Regne, Blitze und Dunnere, (und mir ka troches Zelt gha hend) dass die ganz Gruppe entschiede het zum ufs Boot retour zgoh.

Am nögste Tag ischs den immerno so schlächts Wätter gsi und will de Marco e Tintefisch-Vergiftig (oder so öppis i die Richtig) gha het, simmer uf em Boot bliebe.

Am Nomittag sind mir den ufbroche richtig Cartagena. Es sind 27 harti, waggeligi Stunde gsi. Wemer glägä sind, häts überhaupt ka Problem geh, aber sobald mir hend müäsä ufstoh, wäräd mir am liäbstä go chotze gange! Wo mir in Kolumbie acho sind, hät üsen Captain verzellt, dass sMeer ziemli ruhig gsi isch und mir üs chönd glücklich schätze :) Juheee, mir hetted also nid wele debii sii wens Meer en Sturm gha het.

Mir sind jetzt in Cartagena und gnüssed es Backpacker läbä. Oder mir probiereds uf jedefall! Au wänn die Stadt super schön isch, wüssed mir bim beste Wille nid was mir do alläs no söläd go machä bis mir üsen gliäbtä Boudi wieder hend.

Sgit ettlichi Toure wo me chent machä, aber den müästäd mir üs jo wieder mit andere Backpacker Turiste abgeh und mir sind würkli überhaupt nüm so Kontaktfreudig wiä au scho. Mir sind froh wenn mir üsen Boudi wieder hend und dört ane chönd fahre wo MIR wend.

Mir freued üs jetzt so richtig uf Kolumbie, nochdem mir di letschte 3 Wuche in Panama City verbrocht hend.

de Odysee üsen Matros

 

4 Fraue und ein Held

De Marco und dBeate hend dWillkommensbooole gmacht, wärend dem Tina Namensschilder gschriebe het für de Flughafe. Miteme huärä Stress simmer im Parkhuus acho und sind sofort zum Akunftsgate grennt mit üsne Täfeli.... Mir hend den aber grad nomol 3/4 Stund chönä warte bis de hoch Bsuäch uftaucht isch. I üsne Büch sind di ganz Ziiit Ameisä umänand gsiächäd, so hemmer üs gfreut.  Die 2 chäääsbleiche Wiiblis sind total verpännt acho aber miteme riese Straaale uf em Gsicht. Als ersts hend mir grad mol dBoole verteilt und denn is looos gange mit em Gschnätter. Nochdem mir äs allerwichtigste diskutiert gha hend, is wiiters gange is Hotel. Nocheme churze Fährtli dur San José hend au mir no de Weg zum Hotel gfunde. Es ZimmerLI hät recht zWünsche übrig loh, aber mir hend üs all zämä uf ä Duschi gfreut und nid gross reklamiert J De Marco het be de Iris und de Claud dörfe pfuse und dBeate und Tini hend sichs bequem gmacht uf em Parkplatz im Zelt.

Will mir nu lächerlichi 2 Wuche Ziit  gha hend mit üsne 2 Girls, hend mir üs nümm gross in San José ufghalte und sind grad wiiters an Strand. Churz nomol bide Krokis verbii und den vamos a la playa J

Schnell sind Bikinis agschnalled gsi und scho simmer im Wasser umägschwaderet. Alli zeme hend riese Freud gha ade Welle und bis uf e Qualle wo ziemli freud ade Tina gha het, isch super lässig gsi.

dZimmeriiteilig vo üsem Luxus Camper isch schnell klar gsi. dIris und dClaud hend sZimmer mit Meersicht i üsem gliäbtä Maggiolina Zelt obe usgsuächt und de Marco und Tina hend im (k)erker gschlofe mit de Chräbsli. Aber däfür mit direkter sicht uf de Sternehimmel.

Was wott me meh? dBeate het wie gwohnt i ihrem luxeriöse Dachzelt pfüserlet. So hönd eigentli alli das übercho wos hend wele und niämert isch truurig gsi.

Üsen hoche Bsuäch isch nid lang bleich blibe, scho am erste Tag sind roti Partie sichtbar worde. Aber hey, wer wett scho bruun werde? Rot isch es neue bruun. Bruun isch öppis für Aafänger!

Aber nid nur bide Iris und de Claud het me dSunne gmerkt au de Marco und Tini hend en liächte Rotstich becho...

Mir hend Strand-hoppig gmacht. Sind vo Strand zu Strand gfahre und hend sLebe gnosse. Am 16. April het de Marco sin Geburri gfiired und het en huufe Gschänkli dörfe uuspackä. Zum Zmorge hets mol wieder Schoggibrötli geh und zum Zmittag sogar no en Geburrichuächä. Ä Engadiiner Nusstorte. Natürli hend au dChärzli nid gfählt. So en richtige Chindergeburtstag halt. Nochdem de Marco de Tina Ihres Gschänkli uspackt het, isch er fasch nümm aasprechbar gsi. Ab dem Ziitpunkt isch er nu no i sim Stüähli ghocked und het sBuäch agfange lese vom Valentino Rossi.

Je wiiters mir in Süde gfahre sind, desto meh hend mir gmerkt das dRegeziit üs iiholt. Immer mol wieder hets churz gregnet, aber überhaupt nid schlimm.

Richtig Corcovado het dIris den mol no dHöörli vode Tina gschnitte. Sisch bitter nötig gsi. dSpitze sind total kabutt gsi und Tina hät scho gar nüm wele dHoor strähle. Aber noch dem abstrakte Hoorschniiide vode Iris het mä klein Tinchen den ändli wieder chönä aaluägä. Super gmacht Iris

Corcovado:

In Puerto Jimenez sind mir uf en Campingplatz gange wo de Marco scho kennt het. Er isch grad wieder is Gspröch cho mit em Adonis (Bsitzer). Mir sind wiit und breit di einzige gsi um dem Platz. Aber es het defür ganz viel intressanti Tier gha! dKrokodil sind nu grad 30 Meter nebed üs im Pool gschwaderet (nid iighaged) und de riesig Leguan hät üs au jede Tag bsuächt, DAras (Papagei) sind au vertätä gsi. Aber was ganz viel gha het, sind MOSKITOS. Die hend üs ufgfrässä das mir all zämä jede Obed is Muggezelt gflüchtet sind!

De Grund worum mir überhaupt i die Region greist sind, isch de Corcovado Nationalpark gsi. Mir hend üs scho vor 2 Wuche agmolde zum e 2 Tages Tour zmachä i dem Park. De Marco het diä Tour schomol gmacht vor öppä 7 Johr mit de Rike und het gschwärmt wiä schön das es isch. Mir sind all zämä gspanne gsi wiä Flitzböge, hönd aber doch e chlei Respekt gha vor dere Wanderig. Immerhind lebend i dem Park viel Arte vo giftige Tier.

Janu es git jetzt kei zrugg meh, am morge am halbi 5i isch Tagwach!!!

dBeate isch die ganz Nacht wach gsi und fliessig zwüsched WC und Zelt hin und her pendlet. So het sie sich den au gfühlt am morge und het beschlosse üs älei id Wildnis ufbreche zloh.

Punkt 6i isch de Bus richtig Corcovado abgfahre. Es isch e holprigi Aglegeheit gsi und alläs andere als bequem. Trotzdem hemmers lustig gha. Noch guätä 2 Stund sind mir den acho und sind grad loosgwatschlet. Zersch mol 1 Stund dur de Sand und den 7 Stund dur de Tschungel. Mir hend chlini Bäch überquert. Die einte hend dSchuäh abzoge, anderi hends mit Schuäh probiert. Die erst Vatiante isch soviel ich weiss di besser gsi, gäll Iris hihi. Mir hend leider nid soviel Tier gseh wiemer erhofft hend, aber immerhin hemmer en schön giftige Frosch gseh, es paar sehr schöni Spinne und es paar Schlange. Dezue no e Bisamratte, oder was au immer gsi isch... be dem Tier sind dMeinige extrem usenand gange. Leider hend mir weder en Jaguar no e Wildschwein gseh.

Noch guätä 5 Stund wandere, het Tina de Grosi-Gang dinne gha und dIris de Runzel Gang. Tina het ihri Hüft gspürt und dIris het Runzelfuäss gha vode Bachüberquerig wo chli schiäf gange isch.

Meh cha sich vorstelle wiäs wiiters gange isch. dTini hät fasch plärät will sie so schmärzä gha hät und drum isch ihri Luune au nüm grad TOP gsi. De Marco het das den au zgspüre übercho. Meh muä aber gar nid so Mitleid mit ihm ha, denn er hät jo gseit dases numä 5-6 Stund sind bis zur Rangerstation wo mir ä Zimmer buächt hend. In Wirklichkeit sinds den aber guäti 7-8 Stund gsi. Er hät sälber aber au gstuuunet das es so aasträngend gsi isch. Do hät är wohl alles chli andersch in Erinnerig gha. De Höhepunkt isch den aber erst ganz am Schluss cho. Gmäss Info hend mir gwüsst, dass mir am Schluss vom Tag no müänd än Brusttüfe Fluss mit Krokodil überquere (Brusttüf bem Marco isch bede Tina fasch Kopf unter Wasser). Noch langem gezicke hend mir den üses Bekini agschnalled de Rucksack uf de Chopf gleit und sind in Fluss iä gloffe. Nu paar Meter vom Ufer entfern gseht de Marco 200 Meter wiiter ännä 3 Fraue wo durd  Sandbänk as andere Uder übere laufed. Mir hend nid lang überleit, sind umkehrt und die paar Meter em Ufer entlang gloffe und somit den au über dSandbank. Mir sind gottefroh gsi, hemmer nid dur de Fluss dure müäsä :) Puh!
 

Ach wie schön ist Panamaaa

Wo mir wieder uf em Campingplatz gsi sind, hemmer üs den grad uf de Weg gmacht richtig Panama. dIris hät sich scho gfreut wiä i chlises Chind. dGrenze isch wiä gschmiert abgloffe. Shät kei Komplikatione geh und will mir so viel gsi sind, hemmer au immer chli öppis zum pläuderle gha.

Hochland

Üsen erst Stop isch in Boquete gsi. Es härzigs Dorf im Hochland vo Panama. Es het scho rechti Ähnlichkeit gha mit de Schwiiz. Het üs echt drum gfalle? Üses Luxusmobil hend mir chli absiits vom Dorf abgstellt. Grad näbäd ämä härzige Hüüsli. Mir hend de Maa mit sine 3 Hünd grad zersch gfroged öbs für Ihn in Ornig isch wemer do pfused. Natürli het de usgwanderet Amerikaner überhaupt ka Problem demit gha und scho hend mir e super Plätzli gfunde ohni Moskitos.

Sisch grad chli en Chälteschock gsi. Innert chürzestert Ziit hend alli langi Hose, Socke und en Pulli agha. Do hät niämert meh reklamiert das es zheiss isch.

Eigentli hemmer jo no wele go wandere go i dere Region. Aber weme Tina agluägäd hät, wo immerno umägloffe isch als hets sie en Schiissdreck ide Hose, isch klar gsi das diä kani 200 Meter am Stuck mag laufe. Also hemmer üs für die heisse Quelle entschiede.

De Weg zude Quelle isch nume miteme 4x4 zerreiche gsi und das hend mir jo. Die letschte paar Meter sind denn doch no würkli aaspruchsvoll worde, und de eint oder ander het nid wele im Auto hocke weme do duruf fahrt ( was au sehr verständlich isch )

Wo mir den gmeint hend die Quelle gfunde zgha, simmer chli enttüscht gsi. So warm sind die nämmli gar nid gsi. De Marco hät sich schomol mit de Ente aagfründet, wo üs den plötzli dInhaberin informierthät, dass de Tümpel do nur für Tier isch. Die heisse Quelle sind 100 Meter wiiter hinne. Mir hend üs kabutt glached und sind i di richtig Quelle. Mir hends aber überhaupt nid lang usghalte. Es isch so abartig heiss gsi, dass üs so richtig schwindlig worde isch.

Nochere guätä halb Stund sind mir schowieder uf em Weg zum Boudi und Panchu gsi.

Will mir alli zämä Lust gha hend uf Panama City, hend mir üs uf de Weg gmacht. Mir sind fasch en ganze Tag gfahre bis mir öppä 2 Stund vor de Hauptstadt ,e Schlofplätzli amne abglägne chline Fischerdorf, e schöns verschlofes Plätzli gfunde hend. Mir hend nomol de Strand gnosse und baded wie die grosse. sWasser isch richtig schön warm gsi und sBier schön chalt. Also eifach perkeft wiäs sii muäs! Am Obed hemmer no probiert es paar lässi Bilder zmachä und sind den völlig erschöpft go schlofe gange.

Panama City

dIris und dClaud sind so spendabel gsi und hend e Hotelzimmer buächt wo mir au hend chönä pfusä. Und mir sind so was vo häppy gsi zum wieder mol so richtig dusche! Es isch natürli nid numä so än Backpacker gsi wos buächäd hend sondern es Hilton Garden Inn! So ä Duschi isch halt scho öppis schöns, und e WC isch halt au LUXUS! Aber de absolut Hammer sind jo dSpiegel gsi wo fasch immer bsetzt gsi sind vo üs Frauä. Ändli mol wieder en grössere Spiegel weder de Rückspiegel vom Auto :)

Inere Stadt dörf mä sich jo au mol wieder schön machä und das hend mir au! Am erste Obed sind mir ine Pizzeria go Znacht esse und hends üs guät go lo miteme super Rotwiii. sAnni und de Erhard hend üs de spendiert inklusive em Usgang. Nomol Danke viel viel mol für die Spend.. Will mir so sparsam gsi sind, hets sogar grad no für en Zmorge glanged :)

Am nögste Tag sind mir grad mol loostrottet und hend dCity wele go aagüggsle. Mir hend den aber schnell gmerkt dass es inere grössere Gruppe nid so eifach isch zum alli Bedürfnis abzdecke und drum hend mir üs trennt. De Marco und ich hends zwor schad gfunde die letschte paar Täg nid no ganz chönä zgnüsse mit em Bsuäch, aber mir hend natürli au verstande das sie anderi Sachä hend wele gseh wiä mir. Mir sind den go ä riesse Shopping Tour go machä. Ändli mol wieder Gäld usgeh und nid immer nu luägä das mä so wenig wiä möglich verbruucht. Leider isch äs nu halb so lässig wämä das mit em Fründ macht. So under Frauä isch shoppe halt scho no anders. Aber de Marco het sich tapfer gschlage und het so guät wiä möglich probiert wiänä Frau zshoppe. Am Obed hemmer üs den wieder troffe und sind zämä go znacht ässä gange und no is Casino uf Frauejagt. Do häts also alli Chörbli und Füdli Grössene gha vo A bis Z.

Am nögste Tag sind dGirls nomol ufd Gass und mir hend am Morge Kleider gwäschä und de Boudi wieder iigruumt, bevor mir au wieder id Stadt gange sind. Am 3 hemmer abgmacht gha zum bim Fischmarkt go ässä goh. dClaud und DIris sind pünktlich uf dMinute dört gsi, nu leider hets de reste nid gschafft. dBeate de Marco und dTina hend bim Shoppe en dütsche Opi im beste alter ufgabled ( de het dClaudi scho 2 mol verher troffe in Panama) do hemmer denkt mir nemed ihn uf en Spatziergang mit. Leider sind mir wäg däm 40 Minute zspot cho. DClaud hät sich dän super um ihren abgschleppte Opi kümmered und ihm de Fischmärk zeiged. Will er usgseh het als hetter nögstens en Kollapps het sie ihm au mo ä Wasser kauft.

Wo de Opi den ufs Taxi gange isch sind mir no wiiters go dAltstadt vo Panama go aagugge. Richtig iidruckend gsi. Dhelfti vode Hüüser sind Ruine und me cha sich nur no vorstelle wiä schön die mol gsi sind. Im Gegesatz hets super schön renovierti Gebäude gha. Nocheme churze Spatziergang sind mir no öppis go trinke ine noble Bar (ganz unfründlichi Lüüt gsi) und denn richtig hei gloffe. Mir hends üs den aber nid chönä verkneife zum nomol churz i üsem Stamm-Casino verbii zluägä. Mir hend den au alli grad no chli Roulett gspielt und sisch ziemli lustig gsi. Wils üs so guät gfalle het be dene Edelnuttene und de Gaffer hend mir beschlosse zum nomol eis ztrinke und nomol und... naja nomol :) Es isch super Musik gloffe zum abgoh, und dass hend mir den au so gmacht. Dank em Alkohol hend mir üs also für gar nünt meh gschämt und sind so was vo abgange. dLüüt rundumä händ nu gstuuunet. Am 2 hend mir üs den aber langsam uf de Heimweg müäsä machä, immerhin packed sich dRücksäck nid vonälei und am 7i fahrt sTaxi schowider uf de Flughafe....

Am 6i het den au scho wieder de Wecker glütte und all sind meh oder weniger hellwach gsi. Diris hät no de Tina ihri Finger und Zeche Nägeli root laggiert bevor sie gange isch. Churz ä Umarmig....und den ischs wieder ruhig gsi... 3 Stund spöter sind mir miteme chline Kater verwached und es isch gsi, als wered dGirls gar niä do gsi... Isch alläs nu äm Traum gsi??? Tina luägt ihri rote Nägeli aaa und seit: Dankä Iris und Claudi. Sisch ä Hammer Ziit gsi mit eu :) Danke für alläs!

ganz viel Schoggi :)

Hundesticks für de Panchuuu :) hmm fein

das Bild spricht für sich

zwor bewölkt, aber en Sunnebrand hets gliich geh

bis uf San José hends üsi Osterentli überlebt, aber nu ein Tag spöter sinds verloffe gsi :(

Bescheeerung

Chuächä und Schoggibrötli

Tina uf de Slackline

was luägsch so blöd

DSicht us em Flüger

üsen Nochbor, er isch aber nie uf Bsuäch cho - zum Glück

•