4 Fraue und ein Held

De Marco und dBeate hend dWillkommensbooole gmacht, wärend dem Tina Namensschilder gschriebe het für de Flughafe. Miteme huärä Stress simmer im Parkhuus acho und sind sofort zum Akunftsgate grennt mit üsne Täfeli.... Mir hend den aber grad nomol 3/4 Stund chönä warte bis de hoch Bsuäch uftaucht isch. I üsne Büch sind di ganz Ziiit Ameisä umänand gsiächäd, so hemmer üs gfreut.  Die 2 chäääsbleiche Wiiblis sind total verpännt acho aber miteme riese Straaale uf em Gsicht. Als ersts hend mir grad mol dBoole verteilt und denn is looos gange mit em Gschnätter. Nochdem mir äs allerwichtigste diskutiert gha hend, is wiiters gange is Hotel. Nocheme churze Fährtli dur San José hend au mir no de Weg zum Hotel gfunde. Es ZimmerLI hät recht zWünsche übrig loh, aber mir hend üs all zämä uf ä Duschi gfreut und nid gross reklamiert J De Marco het be de Iris und de Claud dörfe pfuse und dBeate und Tini hend sichs bequem gmacht uf em Parkplatz im Zelt.

Will mir nu lächerlichi 2 Wuche Ziit  gha hend mit üsne 2 Girls, hend mir üs nümm gross in San José ufghalte und sind grad wiiters an Strand. Churz nomol bide Krokis verbii und den vamos a la playa J

Schnell sind Bikinis agschnalled gsi und scho simmer im Wasser umägschwaderet. Alli zeme hend riese Freud gha ade Welle und bis uf e Qualle wo ziemli freud ade Tina gha het, isch super lässig gsi.

dZimmeriiteilig vo üsem Luxus Camper isch schnell klar gsi. dIris und dClaud hend sZimmer mit Meersicht i üsem gliäbtä Maggiolina Zelt obe usgsuächt und de Marco und Tina hend im (k)erker gschlofe mit de Chräbsli. Aber däfür mit direkter sicht uf de Sternehimmel.

Was wott me meh? dBeate het wie gwohnt i ihrem luxeriöse Dachzelt pfüserlet. So hönd eigentli alli das übercho wos hend wele und niämert isch truurig gsi.

Üsen hoche Bsuäch isch nid lang bleich blibe, scho am erste Tag sind roti Partie sichtbar worde. Aber hey, wer wett scho bruun werde? Rot isch es neue bruun. Bruun isch öppis für Aafänger!

Aber nid nur bide Iris und de Claud het me dSunne gmerkt au de Marco und Tini hend en liächte Rotstich becho...

Mir hend Strand-hoppig gmacht. Sind vo Strand zu Strand gfahre und hend sLebe gnosse. Am 16. April het de Marco sin Geburri gfiired und het en huufe Gschänkli dörfe uuspackä. Zum Zmorge hets mol wieder Schoggibrötli geh und zum Zmittag sogar no en Geburrichuächä. Ä Engadiiner Nusstorte. Natürli hend au dChärzli nid gfählt. So en richtige Chindergeburtstag halt. Nochdem de Marco de Tina Ihres Gschänkli uspackt het, isch er fasch nümm aasprechbar gsi. Ab dem Ziitpunkt isch er nu no i sim Stüähli ghocked und het sBuäch agfange lese vom Valentino Rossi.

Je wiiters mir in Süde gfahre sind, desto meh hend mir gmerkt das dRegeziit üs iiholt. Immer mol wieder hets churz gregnet, aber überhaupt nid schlimm.

Richtig Corcovado het dIris den mol no dHöörli vode Tina gschnitte. Sisch bitter nötig gsi. dSpitze sind total kabutt gsi und Tina hät scho gar nüm wele dHoor strähle. Aber noch dem abstrakte Hoorschniiide vode Iris het mä klein Tinchen den ändli wieder chönä aaluägä. Super gmacht Iris

Corcovado:

In Puerto Jimenez sind mir uf en Campingplatz gange wo de Marco scho kennt het. Er isch grad wieder is Gspröch cho mit em Adonis (Bsitzer). Mir sind wiit und breit di einzige gsi um dem Platz. Aber es het defür ganz viel intressanti Tier gha! dKrokodil sind nu grad 30 Meter nebed üs im Pool gschwaderet (nid iighaged) und de riesig Leguan hät üs au jede Tag bsuächt, DAras (Papagei) sind au vertätä gsi. Aber was ganz viel gha het, sind MOSKITOS. Die hend üs ufgfrässä das mir all zämä jede Obed is Muggezelt gflüchtet sind!

De Grund worum mir überhaupt i die Region greist sind, isch de Corcovado Nationalpark gsi. Mir hend üs scho vor 2 Wuche agmolde zum e 2 Tages Tour zmachä i dem Park. De Marco het diä Tour schomol gmacht vor öppä 7 Johr mit de Rike und het gschwärmt wiä schön das es isch. Mir sind all zämä gspanne gsi wiä Flitzböge, hönd aber doch e chlei Respekt gha vor dere Wanderig. Immerhind lebend i dem Park viel Arte vo giftige Tier.

Janu es git jetzt kei zrugg meh, am morge am halbi 5i isch Tagwach!!!

dBeate isch die ganz Nacht wach gsi und fliessig zwüsched WC und Zelt hin und her pendlet. So het sie sich den au gfühlt am morge und het beschlosse üs älei id Wildnis ufbreche zloh.

Punkt 6i isch de Bus richtig Corcovado abgfahre. Es isch e holprigi Aglegeheit gsi und alläs andere als bequem. Trotzdem hemmers lustig gha. Noch guätä 2 Stund sind mir den acho und sind grad loosgwatschlet. Zersch mol 1 Stund dur de Sand und den 7 Stund dur de Tschungel. Mir hend chlini Bäch überquert. Die einte hend dSchuäh abzoge, anderi hends mit Schuäh probiert. Die erst Vatiante isch soviel ich weiss di besser gsi, gäll Iris hihi. Mir hend leider nid soviel Tier gseh wiemer erhofft hend, aber immerhin hemmer en schön giftige Frosch gseh, es paar sehr schöni Spinne und es paar Schlange. Dezue no e Bisamratte, oder was au immer gsi isch... be dem Tier sind dMeinige extrem usenand gange. Leider hend mir weder en Jaguar no e Wildschwein gseh.

Noch guätä 5 Stund wandere, het Tina de Grosi-Gang dinne gha und dIris de Runzel Gang. Tina het ihri Hüft gspürt und dIris het Runzelfuäss gha vode Bachüberquerig wo chli schiäf gange isch.

Meh cha sich vorstelle wiäs wiiters gange isch. dTini hät fasch plärät will sie so schmärzä gha hät und drum isch ihri Luune au nüm grad TOP gsi. De Marco het das den au zgspüre übercho. Meh muä aber gar nid so Mitleid mit ihm ha, denn er hät jo gseit dases numä 5-6 Stund sind bis zur Rangerstation wo mir ä Zimmer buächt hend. In Wirklichkeit sinds den aber guäti 7-8 Stund gsi. Er hät sälber aber au gstuuunet das es so aasträngend gsi isch. Do hät är wohl alles chli andersch in Erinnerig gha. De Höhepunkt isch den aber erst ganz am Schluss cho. Gmäss Info hend mir gwüsst, dass mir am Schluss vom Tag no müänd än Brusttüfe Fluss mit Krokodil überquere (Brusttüf bem Marco isch bede Tina fasch Kopf unter Wasser). Noch langem gezicke hend mir den üses Bekini agschnalled de Rucksack uf de Chopf gleit und sind in Fluss iä gloffe. Nu paar Meter vom Ufer entfern gseht de Marco 200 Meter wiiter ännä 3 Fraue wo durd  Sandbänk as andere Uder übere laufed. Mir hend nid lang überleit, sind umkehrt und die paar Meter em Ufer entlang gloffe und somit den au über dSandbank. Mir sind gottefroh gsi, hemmer nid dur de Fluss dure müäsä :) Puh!
 

Ach wie schön ist Panamaaa

Wo mir wieder uf em Campingplatz gsi sind, hemmer üs den grad uf de Weg gmacht richtig Panama. dIris hät sich scho gfreut wiä i chlises Chind. dGrenze isch wiä gschmiert abgloffe. Shät kei Komplikatione geh und will mir so viel gsi sind, hemmer au immer chli öppis zum pläuderle gha.

Hochland

Üsen erst Stop isch in Boquete gsi. Es härzigs Dorf im Hochland vo Panama. Es het scho rechti Ähnlichkeit gha mit de Schwiiz. Het üs echt drum gfalle? Üses Luxusmobil hend mir chli absiits vom Dorf abgstellt. Grad näbäd ämä härzige Hüüsli. Mir hend de Maa mit sine 3 Hünd grad zersch gfroged öbs für Ihn in Ornig isch wemer do pfused. Natürli het de usgwanderet Amerikaner überhaupt ka Problem demit gha und scho hend mir e super Plätzli gfunde ohni Moskitos.

Sisch grad chli en Chälteschock gsi. Innert chürzestert Ziit hend alli langi Hose, Socke und en Pulli agha. Do hät niämert meh reklamiert das es zheiss isch.

Eigentli hemmer jo no wele go wandere go i dere Region. Aber weme Tina agluägäd hät, wo immerno umägloffe isch als hets sie en Schiissdreck ide Hose, isch klar gsi das diä kani 200 Meter am Stuck mag laufe. Also hemmer üs für die heisse Quelle entschiede.

De Weg zude Quelle isch nume miteme 4x4 zerreiche gsi und das hend mir jo. Die letschte paar Meter sind denn doch no würkli aaspruchsvoll worde, und de eint oder ander het nid wele im Auto hocke weme do duruf fahrt ( was au sehr verständlich isch )

Wo mir den gmeint hend die Quelle gfunde zgha, simmer chli enttüscht gsi. So warm sind die nämmli gar nid gsi. De Marco hät sich schomol mit de Ente aagfründet, wo üs den plötzli dInhaberin informierthät, dass de Tümpel do nur für Tier isch. Die heisse Quelle sind 100 Meter wiiter hinne. Mir hend üs kabutt glached und sind i di richtig Quelle. Mir hends aber überhaupt nid lang usghalte. Es isch so abartig heiss gsi, dass üs so richtig schwindlig worde isch.

Nochere guätä halb Stund sind mir schowieder uf em Weg zum Boudi und Panchu gsi.

Will mir alli zämä Lust gha hend uf Panama City, hend mir üs uf de Weg gmacht. Mir sind fasch en ganze Tag gfahre bis mir öppä 2 Stund vor de Hauptstadt ,e Schlofplätzli amne abglägne chline Fischerdorf, e schöns verschlofes Plätzli gfunde hend. Mir hend nomol de Strand gnosse und baded wie die grosse. sWasser isch richtig schön warm gsi und sBier schön chalt. Also eifach perkeft wiäs sii muäs! Am Obed hemmer no probiert es paar lässi Bilder zmachä und sind den völlig erschöpft go schlofe gange.

Panama City

dIris und dClaud sind so spendabel gsi und hend e Hotelzimmer buächt wo mir au hend chönä pfusä. Und mir sind so was vo häppy gsi zum wieder mol so richtig dusche! Es isch natürli nid numä so än Backpacker gsi wos buächäd hend sondern es Hilton Garden Inn! So ä Duschi isch halt scho öppis schöns, und e WC isch halt au LUXUS! Aber de absolut Hammer sind jo dSpiegel gsi wo fasch immer bsetzt gsi sind vo üs Frauä. Ändli mol wieder en grössere Spiegel weder de Rückspiegel vom Auto :)

Inere Stadt dörf mä sich jo au mol wieder schön machä und das hend mir au! Am erste Obed sind mir ine Pizzeria go Znacht esse und hends üs guät go lo miteme super Rotwiii. sAnni und de Erhard hend üs de spendiert inklusive em Usgang. Nomol Danke viel viel mol für die Spend.. Will mir so sparsam gsi sind, hets sogar grad no für en Zmorge glanged :)

Am nögste Tag sind mir grad mol loostrottet und hend dCity wele go aagüggsle. Mir hend den aber schnell gmerkt dass es inere grössere Gruppe nid so eifach isch zum alli Bedürfnis abzdecke und drum hend mir üs trennt. De Marco und ich hends zwor schad gfunde die letschte paar Täg nid no ganz chönä zgnüsse mit em Bsuäch, aber mir hend natürli au verstande das sie anderi Sachä hend wele gseh wiä mir. Mir sind den go ä riesse Shopping Tour go machä. Ändli mol wieder Gäld usgeh und nid immer nu luägä das mä so wenig wiä möglich verbruucht. Leider isch äs nu halb so lässig wämä das mit em Fründ macht. So under Frauä isch shoppe halt scho no anders. Aber de Marco het sich tapfer gschlage und het so guät wiä möglich probiert wiänä Frau zshoppe. Am Obed hemmer üs den wieder troffe und sind zämä go znacht ässä gange und no is Casino uf Frauejagt. Do häts also alli Chörbli und Füdli Grössene gha vo A bis Z.

Am nögste Tag sind dGirls nomol ufd Gass und mir hend am Morge Kleider gwäschä und de Boudi wieder iigruumt, bevor mir au wieder id Stadt gange sind. Am 3 hemmer abgmacht gha zum bim Fischmarkt go ässä goh. dClaud und DIris sind pünktlich uf dMinute dört gsi, nu leider hets de reste nid gschafft. dBeate de Marco und dTina hend bim Shoppe en dütsche Opi im beste alter ufgabled ( de het dClaudi scho 2 mol verher troffe in Panama) do hemmer denkt mir nemed ihn uf en Spatziergang mit. Leider sind mir wäg däm 40 Minute zspot cho. DClaud hät sich dän super um ihren abgschleppte Opi kümmered und ihm de Fischmärk zeiged. Will er usgseh het als hetter nögstens en Kollapps het sie ihm au mo ä Wasser kauft.

Wo de Opi den ufs Taxi gange isch sind mir no wiiters go dAltstadt vo Panama go aagugge. Richtig iidruckend gsi. Dhelfti vode Hüüser sind Ruine und me cha sich nur no vorstelle wiä schön die mol gsi sind. Im Gegesatz hets super schön renovierti Gebäude gha. Nocheme churze Spatziergang sind mir no öppis go trinke ine noble Bar (ganz unfründlichi Lüüt gsi) und denn richtig hei gloffe. Mir hends üs den aber nid chönä verkneife zum nomol churz i üsem Stamm-Casino verbii zluägä. Mir hend den au alli grad no chli Roulett gspielt und sisch ziemli lustig gsi. Wils üs so guät gfalle het be dene Edelnuttene und de Gaffer hend mir beschlosse zum nomol eis ztrinke und nomol und... naja nomol :) Es isch super Musik gloffe zum abgoh, und dass hend mir den au so gmacht. Dank em Alkohol hend mir üs also für gar nünt meh gschämt und sind so was vo abgange. dLüüt rundumä händ nu gstuuunet. Am 2 hend mir üs den aber langsam uf de Heimweg müäsä machä, immerhin packed sich dRücksäck nid vonälei und am 7i fahrt sTaxi schowider uf de Flughafe....

Am 6i het den au scho wieder de Wecker glütte und all sind meh oder weniger hellwach gsi. Diris hät no de Tina ihri Finger und Zeche Nägeli root laggiert bevor sie gange isch. Churz ä Umarmig....und den ischs wieder ruhig gsi... 3 Stund spöter sind mir miteme chline Kater verwached und es isch gsi, als wered dGirls gar niä do gsi... Isch alläs nu äm Traum gsi??? Tina luägt ihri rote Nägeli aaa und seit: Dankä Iris und Claudi. Sisch ä Hammer Ziit gsi mit eu :) Danke für alläs!

ganz viel Schoggi :)

Hundesticks für de Panchuuu :) hmm fein

das Bild spricht für sich

zwor bewölkt, aber en Sunnebrand hets gliich geh

bis uf San José hends üsi Osterentli überlebt, aber nu ein Tag spöter sinds verloffe gsi :(

Bescheeerung

Chuächä und Schoggibrötli

Tina uf de Slackline

was luägsch so blöd

DSicht us em Flüger

üsen Nochbor, er isch aber nie uf Bsuäch cho - zum Glück

•