Mazathlan bis churz vor Acapulco

Mazathlan noch Guadalajara

In Mazathlan acho hemmer grad no e gueti Tat gmacht und dHeather 50 kilometer mit em Velo mitgno. Da mir leider ka Platz gha hend im Auto, hemmers eifach uf de Fahrersiite agmacht.

Mir hendüs den vo de Velofahrerin verabschieded und sind wiiters richtig Sayulita gfahre.

uf em We hend mir den e super Plätzli direkt am Meer gunde in la Palma womor üses Zelt ufkurblet hend. Natürli simmer den au grad no is Wasser gumped zum üs abchüele. Am Obed hend mir chli de Kampf gha mit ide Mugge und de Sandflöh! Die chönd denn udfrege! Mir sind den ganz verstoche is Bettli kroche.

Am Morge früäh sind mir den grad zersch mol go renne und hend üsi Chraftüebige gmacht, bevor mir den is Wasser sind.

So ganz under üs: es isch eifacher em Hund Velofahre biibringe, als de Marco zu Sport züberrede.... Aber es chunnt langsam.

Am Nomi simmer wiiters gfahre richtig süde, alles schön im Strand entlang und hend denn in San

Marco wieder e schöns Plätzli am Strand gfunde. Sisch so richtig schön wämö eifach vo Strand zu Strand chan fahre und bizli chille.

Am Mittwuch sind mir den is Sayulita acho. Es surferparadies schlecht hin. Natürlich hend au mir mol wieder wele ufs Surfbrett stroh und zeige was mir chönd. brav iigwärmt sind mir denn go dWelle bekämpfe. liechter gseit wiä gmacht. Tina het scho noch de 2 te Welle sBikine Hösli ade Chnü unne gha und het zersch no müäsä go es anders Hösli go hole. De Marco het kämpft wie en grosse.... Und verlohre wie en chliine. Nochore Stund abkämpfe im Wasser und noch paar Liter Salzwasser -schlucke isch Tina den mol abkämpft us em Wasser kroche, dicht gfolgt vom Marco. Noch ore Verschnuufpause hemmers den nomol probiert. De Marco hets echt super gmscht... Tina het ihm zersch mol no chli gholfe bide Welle lese und wenn er mues padle und denn dhet er das super guät älei gmacht. Tina het ehner chli verseit. Sie hets nid mol würkli bis ufs Brett gschafft. Sie het den au relativ früäh wieder ufgeh. Fazit vo dem super Surftag? tina het de En Nerv iiklemmt und de Marco het dDbrustwarze halbe abagschürft.... 

Häjodas chunnt den schono besser... Mir hoffed uf e paar tips vom Sven.

Gestert simmer no go Guadalajara aluege. Vo anderne Blogs und vom Reiseführer hend mir chöne entneh, dass es nid so e schöns Städtli isch. Aber mir sindecht positiv überrascht gsi. 

Sisch den au no grad en riese Markt gsi. Paar Gebäude sind würki schön. 

Mir hönd au gmerkt, dass die Mexxe do ganz und gar nid arm sind. Imne Shoppingcenter womor gsi sind het also alles genau soviel kostet wiä au ide schwiiz!

Ihr froged eu was mir imne iichaufszentrum mached? Mir sind immerno uf de Suechi noch de Go Pro 3 black edition. Die isch überall usverchauft. Nid zum glaube :(

Guadalajara bis Acapulco

Mir sind den mol wiiters richtig Guanajuato. Uf em Wäg dört ane hemmer inore Chisgrueb gschlofe und  üs mit em Buur sinere Chuä aagfrundet. Mir hend ihre probiert zverklickere das sie doch kei PET Fläschä söll habere, aber mir glaubed das es wiä än Cheugummi isch für diä J Brav wiä Tina isch. Hät Sie den die Chuä no chli Mais gfuetered. Pflichtbewusst wiä mir sind, hemmer den au no grad gfätzläd i de ganze Chiisgrueb (De ÖKO-Hans wär stolz uf üs).  Mir sind wiiters und hend Halt gmacht amne Wiähnachtsmärkt. Irgendwiä än komische Märkt wäns so warm isch. Natürli hemmer au vergebens de Glühwii gsuächt. Dafür hemmer für 40 Rappe 10 Manderindli übercho. Für e super Wiähnachte hemmer natürli au no Spanischinüssli kauft und susch no paar Frücht.

In Guanajato acho, hemmer üs grad uf de Wäg is Städli gmacht. Haiidäbeii isch das ä wunderschöns Städli! Fasch alli Hüser sind farbig aagmolet und so verleihts richtig Charme! Am Obed hend mir denn Heilig Obed zersch im Auto verbrocht mit SpanischNüssli und Manderindli und nochane sind mir nomol is Städli. Eigentli hemmer is Internet welä zum Wiähnachtsgrüäss verschickä... Nu leider hät alläs zuä gha womor gfunde hend. Janu, mir hend den halt diä schön Altstadt no chli gnosse und sind chli umägirrt. Do muämä no erwähne, das es also würkli no verlockend isch zum sich verlaufe. Es hät uu viel Tunnel wome amne ganz andere Ort  usechunnt als me eigentli wett. Ei mol simmer so lang imne Tunnel gloffe, do hets üs nid verwunderet wemer jetzt die Schwiiz wieder usecho wäräd J

Am negste Tag sind mir den wiiters gfahre zude Monarchfalter. Im Reiseführer isch gstande, dass mir „früh morgens“ söläd i dem Schmetterling Park sii. So gseht mä wiä diä Monarchfalter ufwached und den miteme riese Lärm id Wälder verschwind. Häjo mir sind den au äxtra scho am viertel vor 6i ufgstand und uf de Hügel ufä gfahre. Am halbi 8i simmer acho und es isch iiisig chalt gsi. Will mir aber äs gfühl ka hend, das mir scho fasch zspot sind für das ultra Erlebnis zgseh, hemmer weder zmorge gesse no Socke agleit oder susch was. Tina hät aber no ä Jagge mitgno will Sie halt doch än gfröhtli isch.

Mir sind den zum Park und dä hät nonig mol göffnet gha. Janu, denn laufed mir halt eifach mol so dure.... (mir hend ehrli gseit sowiso es Bar-Geld im Auto vergesse gha) 40 Minute spöter hend mir de Wald den au gfunde gha. (Zum Glück) sind uf em Bode hunderti vo tote Schmetterling glägä, susch hetted mir worschindli gar nid gmärkt das mir richtig sind und wäräd eifach wiiters gloffe. Mir sind den mol chli im Wäldli umägschneugged und hend gwartet und gwarted und gwarted. Am 10 sind den fängs mol 2 Mexä cho und hend die ganze Bäum mol abgsperrt wo diä Monarchfalter am schlofe gsi sind. E halb Stund spöter sind den die erste Guides mit ihrne Turiste cho. Die meiste sind Mexä gsi. Uslander wiä mir hets nu ganz wenig gha.

Es isch iiszapfe chalt gsi und mir hend langsam nümme möge warte.... Mir hend üs den mol überleit, was ächt „früh morgens“ für so Reiseführer Autore heisst.... Mittlerwiiile isch halbi 12i gsi und es hend sich numä es paar Schmetterling blicke loh.... Da mir da Fachchinesisch (spanisch) vo dene Mexä nid verstande hönd, chönd mir eu jetzt au nid genau erchlärä worum diä blöde Falter eifach nid verwached sind. Üsi Erchlärig isch.... äs isch eifach viiiil zchalt gsi zum sich zbewege... knappi 7ä Grad häts uf dem Hügel gha  (isch hüt natürli au no grad bewölkt gsi)

Janu mir sind den halt wieder abätrottled und sind wiiters gfahre.

Eigentli hemmer jo no welä uf en Vulkan die nöchi uäwatschle... aber mir hetteds nid überlebt nomol id Chälti zgo.... verschiäbäd mir halt... mir hend jo kann Stress.

Mir hend nu no as Meer wele....aber das isch nid so eifach gsi. Mir hend 250 kuvendi kilometer vor üs gha. dKuve uf Arosa sind also än Schiiiisdreck degege!!!

Aber äs hät sich glohnt. Endli simmer wieder am Meer. Schnäll no de Frisbi uspacke und chli spiele so langs no hell isch. Bem Znacht esse hend üs den plötzli dMoskitos überfalle. Die hend üs fasch ztod bisse! Abartig!!! Mir hend üs iigschmiert aber es isch zspot gsi. Mir sind dene Fiiicher underlege gsi. Hai isch das ä beschissni Nacht gsi. Es hät bisse wos nu gange isch. Mir hend ka Körperbeherrschig me gha und hend eifach müäsä chratze!

ganz lieb dtierli am fuettere

glücklich mit em reserverädli

mir wünsched eu nume sbeste fürs 2013

hihi mir hend schön warm

Marco der Kokosbezwinger

Am nägste morge hend üsi Bei usgseh wiä Masere. Mir sind den schleunigst wäg vo däm Plätzli und zum nögste Strand gfahre.

Es freut mich eu mitteile zdörfe das de Marco het dörfe 2 Mexikanerinne hälfä bem Rädli wächsle. Er hät das usgezeichnet gmacht. Und diä 2 Fraue hetted Ihn am liäbstä grad für sich bhalte.... aber Tina hät do natürli au no äs Wörtli mitgred! :)

Playa Blanco

Absolut es Träumli. Nu ganz wenig Hüsli und en riese lange Strand. Eifach numä schön ischs gsi. Mir hend üsen Boudi anes abglägäs Plätzli gstellt und hends chli chillt. Immer mol wieder simmer is Wasser und hend mit de Welle gspielt. Mir sind under de Welle duregschwumme oder hend üs vode Welle as Land trägä loh. Irgendwenn gege Obed hemmer no welä mit einere Welle mitschwümme. Do no en chline Tip vo üs: MACHED DAS NIE WENN DWELLE 2 METER HOCH ISCH UNDS NID SEHR TÜF ISCH!

Mir hend das gmacht und es isch so üsecho: Welle kommt, Tina und Marco paddeln und sind auf Welle. Weil Welle sehr viel Wasser angezogen hat von hinden und forne, hat es nur noch ca. einen halben Meter Wasser vor der Welle. Die böse 2 Meter Welle wirft Marco und Tina auf den Boden und strudelt weiter. Fazit: Autsch!

Mir hend also würkli gmeint jetzt isch färtig. Äs hät üs so abartig uf de Bode tätscht!

Noch dem Strand hemmer üs mol en ruhigere uusgsuächt. 1 kilometer Strand ohni Turis! Nu 2 Fischer und mir.... Alli Hüser sind leer.... Mir suächäd üs äs Plätzli grad zwüsched Palme und Meer us. Schampaar schön isch es do. De Marco aliäs Coco Hunter stüred grad zude Palme zuä und wett sich die erst Kokosnuss hole. 2 Stund spöter chunnt er mit Chriegsverletzige retour. Ohni Nuss! Er loht aber nid locker! Hüt muä är ä Cocosnuss heim bringe. Er leit Socke aa und sini giftig grüänä Wanderschuäh und kämpft wiiters wiä änn Stier. E halb Stund später hetters den ändli gschafft. Grad 4 Nüss hetter erleit und bringt sini beuti miteme riese Stolz heim J Natürli het sini Frau de Znacht scho koched und sie fiired im Hercules sin Erfolg

Guät Nacht

Fotos

hät do öppert angst vorere Muus?

zuckersüäss

ab id Wärmi

dHeather hend mir no 50 Kilometer mitgno und denn id Freiheit gloh :)

Lang ersehnts Mexico!

Viel zlang hend mir ide Chälti verschwended und endlich sind mir im Süde vode USA acho.
Vor em Zoll simmer no es ganze Münz go verprasse gange im 1Dollar Shop.

Mir hend us uf de Weg übers Zoll.  Sind ganz ufgregt gsi zum endli dWärmi zgspühre.... Mir sind den mol go umeluege wo mir do üsi Stempel überchömed. gfunde hemmers schnell, aber de Mansgoggel het den aber au gar ka Englisch gred. Mir hend de Stempel den aber irgendwenn mol übercho. Wichtiger isch üs aber gsi, wie chömmer üs abmelde ide Staate. Imne Blog hend paar gschriebe das me umbedingt de grüen Zettel wieder mues useneh loh bem uusreise. De Fötzel hend üs aber scho be de Iiireis wieder usegnoh. Hejo mir sind denn mol zum Zoll vode Staate gange go frooge. aber au die hend nid englisch gred. Mit hend und Füess hemmer üs probiert zverstendige. di eint vode Polizei het üs den wider zum Gliiche Mansgoggel zruggbrocht. Er het de Polizistin öppis erchlert und die het üs wieder mitgno zum Zoll vo de USA. Mir hend denn dörfe nebed de ganze Schlange verbii laufe wo gha het..... sisch üs aber irgendwie nid so mulmig gsi. Notzment stömmer vor de Passkontrolle zum us Mexico uszreise. Ändlich hemmer den en englisch sprechende Bulle gfunde wo üs erchlert het das mir üs gar nid müänd abmelde... Pa pii pa pooo..... Häjo. Mir hend schlussendli denn no gfroged wo mir üsen Boudi chönd iilöse für Mexico und denn hemmer gmerkt, dass mir über de falsch Zoll usgreist sind. Jo guet hemmer denkt und sind denn uf de Mexico Siite zum Auto Zoll gahre. Tönt alles eifacher als getan. Ein Abzwiiger hemmer verpasst und scho simmer ide Schlange zum Usreise gstande. 

Manno mir wend nid us Mexico use... Mir sind doch erst grad cho! Wend ihr üs den nööd?

Marco het den halt de retourgang ine tue und die 2-spuurig Einbahnstross wieder retour gfahre. Shät zum Glück nonig viel Autos hinder üs gha. Polististe hend chli komisch glueged womor anene verbii gfahree sind, aber Tina het brav glächlät und gseit: wrong way sorry :)
Poliziste het den das au nid gross intressiert und hend nünt gseit. 
Mir hend den de ganz Papierkram erledigt und sind zuegfahre.

Ändlich in MEXICO acho! Mir hend üs schleunigst uf de Weg noch Baja California gmacht. Normalerwiis lueged mir das mor vor em 4i e Schlofplätzli hend, aber hüt hemmer eifach in Süde wele und sind no chlei gfahre bis am 10i. Mir hend den e Plätzli gfunde und sind go pfuse.
Die erst Nacht in Mexico wir üs ganz bestimmt no länger in erinnerig bliibe..... Und zwor ischs esoo gsi...
Mir hend jo scho jensti Gschichte ghört, dases in Mexico mega gföhrlich isch und me kitnäpt oder verschosse wird und und und...... Au wenn mir das für Habakuk finded, denkt me amigs vor em iischlofe halt scho do dra.... Hejo also....
Mir sind am pfuse gsi und do ghört Tina es Auto anefahre. Brav wie immer stellt Sie sich tot. Irgendwenn chlopfed aber so richtig heftig am Boudi das SIe den afangt zum usrüefe. hey ... hey hey heeey..... De Marco isch den au verwached und fangt au gradaa usrüefe, obwohl er gar nid weiss um was es goht :) Nochdem es umerüefe nünt brocht he hemmer halt mol üse Dachzelt ufgmacht. natürlich hemmer gar nid gross öppis gseh ohni brülle bis uf da das die öppe 15 Persone Maskiert gsi sind. heilige Scheisse hemmer denkt... De Beschützer Marco het scho wele im einte wo uf de Leitere gstande isch de Kopf paniere do rüeft Tina: Halt Stopp Militär! 
Mir hend dene den gseit das mir Schwiizer Touriste sind und denn hends den au scho wieder dFlüüge gmacht. thats is. So em Schock für nünt. Mir hend beidi gmeint das es letschte Stündli gschlage het und denn hauets grad wieder ab noch dems erfahred das mir touriste sind. 

frohes Mutes sind mir denn am nögste Morge wiiters gfahre richtig Süde. irgendwie hemmers mit em Wetterfrosch chli verspielt. Hüt hets nämmli en Tempratursturz vo 7 grad geh und sisch uu windig gsi di ganz Ziit. Noch e paar Stund dur dWüesti fahre hemmers den langsam au gseh gha mid de Kaktüs und de viele töte Chüeh am Strosserand. Mir sind chli enttüscht gsi vo dere Halbinsle. Hends üs also scho chli andersch vorgstellt gha. Vilicht ischs aber au nu d chälti wo üs imne affezah in Süde zoge het. In La Paz acho hemmer üs um de negst Termin für uf dFähre erkundigt. leider isch bereits scho alles udbuecht gsi und die nögst Glägäheit wer erst im Januar gsi. Mir sind denn no zude Andere Fähre wo nid so bekannt isch und hend für i 3 Täg en Platz ergattered für 1/4 günstiger als die ander kosted het. 

Mir sind denn no 2 Täg an Strand vo Todo Santos gange. E herzigs Künstler-Städtli und mir hend e super Schlofplätzli ufeme Hügeli nebed em Meer mit eme EGO Strändli gfunde. Am nögste Tag het den am Strand nebed üs grad no en Surf Contest stattgfunde. Es het nu so vo geile knackige Surfer type gwimmlet i jedem Alter. Mir hend den de ganz Taag am Strand verbrocht und hend de Surfer chli Tricks abglueged ( mir als angehendi Profis )

wils üs so guet gfalle het, simmer grad nomol e Nacht blibe und sind den miteme chline Umweg wieder uf La Paz gfahre. Es SüdKap vo Baja isch übersäät mit Hotelaalage und het üs drum nid so gfalle.

Uf de Fähre noch Mazathlan hemmer au mol chli Kontakt mit anderne Reisende gha. Isch richtig intressant und lässig gsi. also do wer zum einte dHeather. sie isch ursprünglich us de USA aber isch scho sit 5 johr am reise. Sie isch momentan mit em Velo underwegs und wett ine paar Johr in Argentinie acho. Denn hemmer no de Alex und dRobin kenne glernt womor morn gönd go bsueche. er isch halb Franzos und halb Mex und dRobin halb Ami halb Japser. beidi super geili Surflüüt und denn no Ihren hund dBella. Noch em erste Bierli hemmer denn au no de Russel und dAnna kenne glernt wo üs grad no uf en Schlummertrunk zu Ihne is Pop up Hüsli iiglsde hend. 2 Kiwis ( neuseeländer ) wo in Australie wohned. puh die hend denn imne Tempo gred.... Natürli ischs nid be eim Schlummertrunk bliebe. und die Kiwis hend und hend nid wele ufhöre rede. Sich uu lustig gsi aber au ziemlich aastrendend zum zuelose. die beide sind die letschte 3 monet dur Afrika toured und gönd jetzt no uf Argentinie wie mir. Jedesmol wemer hönd müese go seiche het das Schiff no meh gwaggled und no meh gwaggled. Irgendwenn hemmer den aber chöne dene Ossis entfliehe und sind go pfuse.

Slick Rock Trail in Moab und Rodeo in Vegas

Moab – Slik Rock Trail

Wer noch Moab goht muä eifach mol uf em Slik Rock Trail gsi sii. Das ghört eifach so däzuä. Ein absolutes Muss. Das hät sich au de Marco und Tina nid welä entgo loh. Doch also Tina jo eigentli scho... aber äbä... dTina hät sich ä ganz eifach Biker Route usgsuächt, wo au Sie sGfühl hät das ganze durezstoh. De Marco isch au hell begeisteret gsi vode usgsuächtä Rute vom Tini und so hend sich diä beide uf de Wäg gmacht nochore Bike-Vermiätig. Will die bekannte Bike-Wägli nid grad um de Egge gsi sind vermiätäd diä au grad no Veloträger fürs Auto. Aber da diä 15 Dollar üs greut hönd hemmer denkt mir fahred doch eifach mol schnäll zu dene Trails. Gesagt getan.

40 Minute später sind Tina und de Marco am Start gsi. Beidi sind de Meinig gsi das es scho gnuäg aasträngänd gsi isch de Berg uf zstrample und mir eigentli wieder chented umchere. Will mir de eifachi Wäg nid gfunde hend wo Tina so schön usgsuächt hät simmer eifach mol uf de nögst best Wäg abboge. Bim verbiiflitze ade Starttafle het Tina nur chönä läsä das es än Wäg für Fortgschrittni isch. Sie hät den de Marco mol schüüch gfroged öb mir ächt würkli de richtig Wäg usgsuächt hend. De Marco isch natürli fest devo überzoge gsi das dä Wäg super zuägschnitte isch uf üs 2 Sportskanone.

Tina hät scho bem erste Högerli durab angst übercho und de Marco so richtig apfurred.

De Marco hät im Tindli aber den grad mol churz paar Tips geh wiämä weli Stelle am beste fahrt und scho hät klein Tina riese freud übercho. Sisch durab und duruf und nomeh duruf und wieder durab und no steiler durab gange. Abartig geilo isch es gsi.... am Afang uf jedefall no.... noch 2 Stund isch den mol ä Päuseli dinne glägä und dTina hät dCharte mit de verschidene Wäg mol agluägäd. Sie hät fasch de Schlag troffe wo Sie bemerkt hät das mir uf em Slick Rock Trail fahred. Eini vode schwärste Bike Streckene uf de Welt. Häjo hend diä beide denkt... den rocked mir diä Strecki mol J e halb Stund spöter isch den aber nünt me mit Rocke gsi. Klein Tini hät än Lätsch bis am Bode grisse und hät kann Meter wiiter me welä fahre oder besser gseit laufe. Sisch nur no steil berguf gange und Ihres Fudi hät abartig weh gmacht. Ihri Hüft hät notzmeht ahgfange ischnappe wiä anodazumals vor de zweite Hüftoperation. Im Marco ischs hinne und forne nümmä rächt gsi. So liide hät är das arme Tindli worschindli no niä gseh... Aber au de Marco hät fasch nümme möge. Sini Chnüü wo au nüm di jungste sind hend ihm recht zschaffe gmacht.

Nochore halb stund umätrötzele hät sich sTini den aber wieder beruhigt gha und die beide sind wiitersgfahre. Noch guät 4 Stund sind die 2 Helde wieder am Ziel acho und sind richtig stolz gsi uf enand.

Für alli wo au mol gärn de Slick Rock Trail machä wend schlönd mir vor: Bitte gönd mit em Auto an Start so dass ihr nid scho usglauged sind bevors würkli afangt und tüänd eu chli vorbereite. Bizli Muskle und Usduur isch ä absoluts muss.

Ah und au no ganz wichtig. Me chan de Loup uf 2 Siite fahre. Im Uhrzeiger sin ischs eifacher. (mir hend da natürli nid gwüsst und sind geg de Uhrzeiger gfahre)

Am Obed hemmer den nünt me gross gmacht und sind früäh is Bettli.

***

 Zur Info: Tina und de Marco händ au en Adventskalender, wil mir dWiähnachtä au chli vermissed.  Jede Tag wird abgwächslät wär ä Gschänkli dörf ufmachä. Wil mir jo eigentli ka Gäld hend für so habakuk Gschäkli machäd mirs in Form vo Guätschiiii wiä zum Biispiel. Fuässmassage, Manicüür Pedicüüür, Hoorschniide und so wiiters.

***

üsi Duplex Huus Tier:

Mir hend ab neuem 2 Huustier. Also das hät sich so ergeh.... in Moab hät sich ä frächs Wüästä-Müüsli i üsem Wohnzimmer iignested und womors usägworfe hend ischs eifach wieder iä cho L Häjo, hämmer dänk.... mo üs jo nid stresse... das goht dänn scho wieder wänn de Motor ufhüüült.... War leider nichts. Dere häts ä so guät gfalle, dass Sie grad mit uf Las Vegas cho isch... Will üs den aber irgendwenn diä Schissiibölleli ufgregt hend vom Müüsli, hemmer üs en Hund zuä tuä. En American Pitbull namens Panchu. Ganz än liäbä. Är isch erst 3 Monet alt und schwarz wiis. Mir würded eu jo gärn äs Foti zeige. Aber komischer wiis loht er sich nid fotografiere...

Rodeo in Las Vegas

Di einte gönd uf Vegas go zocke mir gönd uf Vegas go Rodeo luägä. Sit mir i de Staate sind, simmer uf de Suächi nocheme Rodeo gsi. Vor paar Täg hend mir den im Internet gseh, dass es grosse Finale vo de Staate und Kanada in Las Vegas isch. Natürli hend mir das nid dörfe verpasse. Leider isch es no cheibe schwär gsi zum Tickets uftriiibe. Niämert hät würkli gwüsst wo mä diä Tickets chaufe chan bis üs den mol e liäbi Frauä im MGM Hotel gseit hät das mir doch söläd vor Ort go luägä.

Da mir ka Gäld fürs Taxi hend welä zahle, simmer i diä Arena gloffe. ¾ Stund hemmer gha für ein Wäg.  Vor Ort händ diä üs den mitteilt, dass alläs scho usverchauft isch. Sie verchaufäd aber no Tickets für 62.00 womä zwor kann spezifische Platz hät, aber falls mir  en Platz gsend wo niämert hocked, dörfed mir eifach anä hocke. Falls diä Person mit de Tickets no chunnt mömmer de Sitz ruume und en andere suächä. Falls mä kann Platz find, chamä bis am halbi 8i s Ticket retour bringe und me chunt äs Gäld reour über.

Mir sind zersch mega skeptisch gsi aber hend gfunde besser diä Tickets weder gar kani.

Und mir hends nid bereut. Mir hend zersch 2 Sitz obe gha und hend den müäsä Plätz wächslä. Ä liäbi Frau wo die Arena gschafft het hät üs gholfe zum wieder en Platz süächä. Und damol hemmer schön eine i de Mitti gha bide tüürere Sitz. Abartig super Stimmig ischs gsi.

***

Für alli wos intressiert: diä Cowboys sind gar nid so schön wiä i de Film! Also erstens sind di meiste scho über di beste Johr uus... Das heisst scho nööch a 40gi und also das sind den rechti Fiicher (und ich rede nid vom Stier) Däzuä hemmer usägfunde, dass fasch all Cowboys umähumpläd wils worschindli scho paar mol vom Stier ufgabled worde sind....

Und no wichtiger isch.... diä wo do Rodeo riited sind alläs riiichi Säck. Nünt mit chli Dräckig wärdä... diä buured nid no so chli näbäd draaa, das sind alläs nu Sportler....

Aber trotzdem Cowboys sind suuuper!

Also im Marco händ jo dCowgirl besser gfalle....

***

Mir sind jo sooo was vo sportlich do in Vegas! I dene 3 Täg sind mir sicher 9 Stund umägloffe. Am zweite obed simmer nu scho 2 Stund i 4 Hotels umägstiflet will mir üs verloffe hend. Isch eifach abartig riesig do.

Natürli sind mir au no go shoppe gange. Ändli hät Tina wieder mol dörfä öppis chaufe.. Nu leider hät Sie eifach nünt gfunde. Chum zum glaube aber äs hät eifach nünt geh wo sie hät welä und wo sie au brucht het. Also shät xtuusig geili Täschänä gha, aber das brucht mä jo nid für ufd Reis. Me muä do däzuä au no sägä, dass Sie chli ä Problem gha hät mit Hose poste nochdem di eint Verchäuferin gseit hät das Sie dNr 40/ 42 hät. Weli Frau het do nid Komplex wän e Verchäuferi meint Sie hät 2 Nummere grösser als susch??? Snif.... Egal, Tina isch den ohni öppis wiitergreist und de Marco hät ä paar neuei Jeans und e neue Pulli.

Noch Vegas simmer richtig Phoenix gfahre zum go skydive. Churz vom dem Zentrum hend mir e Schlofplätzli gsuächt. Bizli wäg vode Stross hend mir ä super schöns Plätzli gfunde. Chum simmer anäglägä hämmer gmeint üs es letschte Minütli hät gschlage. Mir hend en Zug ghört wo immer nächer cho isch und immer meh ghuuuped hät. dTina hät scho welä us äm Zelt gumpä wo dä Marco aber gmeint hät das de Zug näbäddure fahrt.

Ich säg eu: Ich han scho mis Schlussgebet gret. I dere Nacht sind ca. 20 Güäterzüg a üs verbii gfahre i abständ vo 20 Minute. Nünt mit Schönheitsschlof gsi!

Und was lärnäd mir druus? Schloof niä näbäd Gleis.

Amen

(ah und diä wo jetzt en Schock hend wäg üsem neue Huustier namens Panchu..... är isch nu üsen imaginärä hund. Mir sind erst am üäbä öb mir üs als Hundebsitzer eigned....)

......Hans, chasch di wieder beruhige...... J

Arches National Park

Mir hend hüt en abartig schöne Tag im Arches National Park verbrocht. SWätter isch genau richtig gsi zum bitzli go wandere. 

Ufbruch

Mir hends ändlich gschafft. Am Mittwuch Nomittag hend mir äs letschte Ersatzteili becho und sind grad loos gfahre richtig Moab. Zersch hemmer üs aber no vo allne wichtige Persone verabschieded. Soo lang hemmer uf de Tag gwartet und jetzt hemmers fasch nid färtig brocht üsen allerliäbstä Polo zverloh. Au wämer meistens anenand verbiigred hend wil er nur spanisch und mir alles ander nu nid spanisch gred hend.

Noch nur 3 Stund simmer scho im Schnee glanded und hend vor Freud grad mol schnäll än Stopp igleit :) Ei Halbstund spöter sind mir den scho wieder ide Wüästi in Reno acho. Mir sind aber grad wiitersgfahre wil mir jo ka Geld hend zums in Reno ide Casino zverspiele. Am Obed am 10i simmer den uf e Raststätte gfahre und hend üs tod müäd is Zelt gleit. Am Morge am 2 hät das ghudlet und tuä, so än richtig lässä Sturm hets geh... Aber üses super Zält hät ka bizli wind iägloh. Am Morge früäh am halbi 7i hemmer üs den us em Zält gwogt. Tina das Flügegwicht (oder au nid) häts fasch wäggwindet. Abartig wiä das gstürmt hät. Egal, mir hend den imne ziemlich zügige Tempo (so schnäll wiä no niä) äs Zält abäkurblät und sind wägdüsed. Je wiiter mir id Wüästli gfahre sind desto wärmer ischs worde. Also eigentli hemmer das nur gemeint. S cha nämmli au ide Wüästi Winter wärdä. Wär hätte das gedacht?
Tina hät den halt anstatt es Bikini wieder ihri Winterjagge agleit.

üsen nögste Stop uf de Reis isch Bonneville gsi. Dört sind die legendärä Salt Flats wo all Gschwindigkeits-Weltrekört ufgstellt werded. Das Motosport Mekka schlechthin. Nu leider halt nu eimol im Johr und natürli nid denn wänn mir dört sind. Au für Tina sehr iidrücklich gsi. (Wer hätte das gedacht)

Nocheme churze Fährtli über dSalt Flats sind mir den wiiters gfahre und hend in Salt Lake City de nögst halt iigleit. Dört hend mir den au so ä Mormone Chile bsuächt. De Marco hät diä Religion jo scho länger intressiert, wil mä dört me Frauä dörf hürote. Wo är den aber ghört hät das mä sit aafangs 20gste Johrhundert nur no 1 Frau hürote dörf, hetter sich den doch wieder umentschiede. :)

Mormone Chile

Mir sind den wiitersgfahre richtig Moab. üs hend jensti Autos überholt und im Marco sind immer meh Zwiefel cho öber do ächt äs richtige Auto kauft hät. Er hät irgendwenn sini Tina gfroged: "Tina, ich dörf dir gar nid sägä was ich grad denkt han. (Tina seit nünt..... er hät jo gseit das ers nid dörf verzelle) Ich glaube mir hend es falsche Auto kauft. Meinsch mir chönd en probiere zverchaufe und en Pick Up chaufe? Weisch eine wo schnäll fahrt.
Au jetzt seit dTina nünt. Aber de Marco hät ahand Ihrem Blick genau gwüsst das er sich uf dünnem Iiiis bewegt. Sit do hät är ka einzigs Wort be über sini Gedanke verlohre.

Mir chaufed üs jetzt en Chläber wo druf stoht: You can go fast, we can go everywhere!

Flaute

Eigentli weiss ich gar nid so genau was schriiibe... es sind ettlichi Beschwerde id Redaktion iitrudlet das mol wieder e Fortsetzig mo geh, aber mini Redaktore hend leider nünt zbrichte. Alles bem alte L

Also guät, äs paar Chlinikeite sind do scho passiert:

Mir sind ändlich färtig mit äm Boudi. Er isch jetzt 15 höcher gleit und hät ä Solarzelle ufm Zelt. Also wämä so ä Auto hät, dänn isch mä niä färtig.... irgendöppis mome immer mechä und verbessere... aber immerhin ischs sowiet färtig wiämers hend welä.... alläs wichtige isch erneueret und sött die erste Wuche hebe J oder hoffentlich au länger

Bis es jedoch sowiit gsi isch....... uiuiuiui de Marco het grausam graui Hoor übercho ab däm Auto. Sisch än rächtä Murks gsi. Aber do mome Ihn grad mol looobe... Er hät das würkli super gmacht. Ich mein.... är isch jo kann Mech oder so... Applaus Applaus

Do häts doch no ä chlini story zum verzelle vo wägä „guät gmacht“...

Einäs Tages noch dem de McGuyver de Chopf zum 10000 mol aagschlage het am Boudi, isch är so was vo uusgrastet und het in Grill iägingged, so dass de grad mol paar Meter gspickt isch. (Do säg ich nur: Zum Glück isch Tina nid nöcher gstande wiä dä Grill)

Tina hät dänn brav de Grill wieder zämägsammlet und de Marco hät no viel meh aagfange fluächä und grausam humple. De Chopf hät äm nümmä weg gmacht, aber jetzt däfür de Zeche... (Tina hät dänn mol wieder müäsä is Füstli lachä) Am Obed hät de Dr Dr Dr Martin Trüeb (Jetzt scho mit 3 Dr Titel ....1 mol für die liäb Füürsorg, 1 mol für die Nähkünst und 1 mol für di super Schliiifkunst) im Marco sin Zeche denn füürsorglich undersuächt und festgstellt, dass dä Zeche zwor no dra isch aber worschindli ka Luft me übercho hät be däm Schock... total blau und ufdunse isch de gsi. 1 mol voltaren druf gschmiert und wieder guät isch gsi. Guät also soo schnäll isch dänn das au nid guät gsi...  De arm Marco humplät nämmli jetzt no und stönt wiä än groosse weme im uf de Zeche stoht (ich bi ihm würkli nid äxtra uf de Zeche gstande.... au äs zweite mol nid.... überhaupt ka Absicht gsi)

De Absoluti Oberknaller hät dän aber Tina bote e paar Täg spöter. Sie isch mol wieder chli aapisst gsi will äs Solar Pannel verspötig gha hät (wiä do jo alläs) und denn hend ihre no 2 Mexä drii gred wo Sie hät welä äs Füür machä.... Zickenterrer mol 10

Segs wiäs well... Sie hät dänn früäh is Bett welä und no än Film à la Härzschmärz luägä... Brav hät si es Stägli welä ufä und zoberst obe, wosi grad het welä is Zelt iä hüpflä do hät dLeitere ka Lust me gha und hät än Abgang gmacht. Natürli mit dä Tina druf. Klein Tina hät dänn eifach mol churz än Sturzfluug gmacht. Pummm tätsch klirr häts gmacht. De Marco isch den mol zlaufe cho und hät fürchterlich aagfange lachä. Är hät fasch nümm chönä schnuuuufe wils än so vertätscht hät. (also mol so under üüüs: was isch den das für än Fründ?)

Noch däm äs Tindli denn immernonig ufgstande isch und chli umägjömmerlät hät hätter dän mol gfroged öbmer ächt in Spitol müänd. Aber sie häts dän doch gschafft zum sich ufzraffe und zrede. (Wohl vermerkt: de Marco isch immerno am lache gsi) Wo sie de Boudi aagluägäd hät und gseh het was für än riiiise Chratzer sie ihm zuägfüägt hät ischs Sie grad i Tränä usbroche L Armä armä Boudi.

Zum Glück isch be Ihre aber nünt broche gsi. Nur paar Schürfwunde,2 blaue SkiBei und ä blaui Hüft.

Mir sind am letschte Dunnstig as Thanks Giving iiglade worde vom Gary. Isch würkli mega lässig gsi. De Gary hät gseit äs fangt am Obed aa... und will är ka genaui Ziit gseit het simmer natürli au nid dävo uusgange das für Ihn Obed scho am nomittag am 3i isch.

Alli Gäst hend sich ziemlich schön gmacht und dPenners (Marco & Tina) sind immerno die Mecher Klamotte die Garage umenand girrt. Häjo hemmer dänkt dänn gömmer doch no churz go duschä (au wänns nonig nötig gsi wär) ..... dTina hät scho di neue Klamotte usegsuäch do hemmer gmerkt, dass mir jo gar nid chönd go dusche, wil üsi Duschi im Durchgang vom Huus id Garage isch wo dLüüt di ganz Ziit hin und her spaziiiired... Häjo hemmer dänk...für öppis gits jo DEOs gäll und hend üs eifach id Sunntigs Klamotte gschmisse (Mir hend gar ka Sunntigsklamotte J)

Noch ä bizli Small Talk hets den au scho Znacht geh am 5i. Woooow isch das fein gsi. Mir hend scho sit langem nünt meh sooo feins gässä wiä a dem Fäst. (Also Tina isch scho ä super Chöchin....Meh als super, aber das hät au Sie nonig fertig brocht.)

Wiäs halt so isch häts Trutan geh mit green Beans und und und ganz feini süässi Härdöpfel und komisch guätem Brot. Eifach hammer mössig.

Gege Obed simmer den no chli as Füür ane ghocked dusse und hend pläuderlet.

De Eduardo, sind Sohn de Ed,  de Polo und de Pancho sind au iiglade gsi am Fest. De Eduardo isch en Künstler wo ab und zuä i sim riiise Wohnmobil im Garte usse huuset, de Polo isch de Sklav do und de Pancho isch Choch und wohnt eifach do imne Wohnwage.

De Ed isch au än Künschler. Er wohnt scho sit 12 Johr in Hollywood. Er isch Musiker und Schauspieler. Hät aber no kann Erfolgt gha. Er hät üs den au mol no äs Liädli vorträllerlät uf de Gitarre... aber au be de Gäst hättor nid würkli chönä Ufmerksamkeit errege. Mir hend denn mol no usägfunde dasor scho 36i isch... mir hend än so afangs mitte 20i gschätzt... also än ganz komische Kauz gsi und het gred als wärer uf Droge... Aber anschiinend isch das sis Ich.

Irgendwenn frogt üs de Eduardo so am füür wo mir den als nögsts ane gönd (mir hends em scho paar mol gseit i de letschte paar Wuche) Mir hönd em den nomol erklärt, dass mir uf Moab wend.  Do hättor aagfange zverzelle das äs dört scho bald wird schneie unds saumössig chalt isch dört. Sisch aber wunderschön und super läss. E knappi halb Stund spöter froged de Halbschuäh Eduardo üs doch i allem ärnst wieder wo ane das mir als nögsts gönd.... Aber jetzt chunnt jo de Best.... Mir sägäd nomol brav dasmor uf Moab gönd, do seit er doch voll: Wo isch das? Er hät ka Ahnig gha vo Moab und hät üs e halb Stund vorher volltexted wiä chalt aber schön dases dört isch.

Mir hend dWelt nümm verstande.

Noch dem abartig intressante Thanks Giving hemmer üs den au no paar Täg frei gönnt und sind an Strand gfahre. Eigentli hemmer jo welä go wellnesse zude Orr Springs. Dört ischs aber leider scho usbuächäd gsi.

Mir sind denn ad Küste gfahre uf Mendocino und ufä richtig Eureka und het dRüäh gnosse. Isch abartig schön gsi.

Häjo und jetzt warted mir eigentli nur no uf paar Ersatzteili für ufd Reis. De Gary meint das es recht schwierig isch zum diä ufztriibe i dene Länder wo mir ande gönd.

Ah und mir sind jetzt stolzi Bsitzer vomne IPad. Mir chömäd zwor hinne und forne nonig druus, aber das chunnt den scho mit de Ziit.

So das wärs gsi us de Welt vo üs. Mir hoffed das mir so schnell wiä möglich wäg vo Sonoma chömäd. Diä Lüüt meined do doch scho ernsthaft Sonoma isch üses Dihei.

Zzz üses dihei isch doch Schaffuuuuuuse.